नागपूर मनपात 30 वर्षे रखडलेली पवित्र पोर्टलवरील माहिती अद्ययावत, शिक्षक भरतीचा मार्ग मोकळा
नागपूर महानगरपालिकेच्या शिक्षण विभागाने तीन दशके रखडलेली पवित्र पोर्टलवरील माहिती अद्ययावत केल्याने शिक्षक भरती प्रक्रियेतील अडथळा दूर झाला आहे.
नागपूर महानगरपालिकेच्या शिक्षण विभागातील पवित्र पोर्टलवरील माहिती अद्ययावत करण्याच्या कामाला अखेर वेग आला आहे. सन 1997 पासून मार्च 2026 पर्यंतच्या नियुक्त्या, सेवानिवृत्ती आणि शिक्षकांच्या सेवेसंबंधी आवश्यक माहिती वेळेवर पोर्टलवर अद्ययावत न झाल्याने शिक्षक भरती प्रक्रियेत प्रत्यक्षात अडचणी येत होत्या.
आता इयत्ता नववी आणि दहावीशी संबंधित आवश्यक माहिती अद्ययावत करून प्रलंबित नोंदी पूर्ण करण्यात आल्या आहेत. यामुळे मनपाच्या शाळांमध्ये शिक्षक भरती प्रक्रिया पुढे नेण्याचा मार्ग मोकळा झाला आहे. शिक्षण विभागाच्या म्हणण्यानुसार, पवित्र पोर्टलवर माहिती उपलब्ध आणि अद्ययावत असणे शिक्षक भरती प्रक्रियेसाठी महत्त्वाचे आहे.
दीर्घकाळ माहिती अद्ययावत न झाल्याने रिक्त पदांची स्थिती आणि संबंधित सेवाविषयक तपशिलांबाबत प्रक्रियेवर परिणाम होत होता. या प्रकरणाचे गांभीर्य लक्षात घेऊन महापौर नीता ठाकरे यांच्या मार्गदर्शनाखाली विभागाने माहिती अद्ययावत करण्याच्या कामाला प्राधान्य दिले.
नववी-दहावीची माहिती अद्ययावत झाल्यानंतर आता माध्यमिक विभागातील उर्वरित माहितीही वेगाने अद्ययावत केली जात आहे. हे काम साधारण एका महिन्यात पूर्ण करण्याचे उद्दिष्ट विभागाने ठेवले आहे. यासोबतच मनपाच्या प्राथमिक विभागाच्या पवित्र पोर्टलवरील माहिती अद्ययावत करण्याचे कामही सुरू करण्यात आले आहे.
शिक्षक भरती प्रक्रियेतील तांत्रिक आणि प्रशासकीय अडचणी दूर झाल्याने मनपाच्या शाळांमधील रिक्त पदे भरण्याचा मार्ग सुकर होण्याची अपेक्षा आहे. यामुळे शाळांमध्ये आवश्यक शिक्षक उपलब्ध होण्यास आणि विद्यार्थ्यांची शैक्षणिक व्यवस्था बळकट होण्यास मदत होणार आहे. जवळपास तीन दशकांपासून प्रलंबित असलेली माहिती व्यवस्थित करण्याच्या दिशेने झालेली ही प्रगती शिक्षण विभागासाठी महत्त्वाची मानली जात आहे.
नागपूर महानगरपालिकेच्या शिक्षण विभागाने नववी आणि दहावीच्या पवित्र पोर्टलवरील आवश्यक माहिती अद्ययावत केल्यानंतर शिक्षक भरती प्रक्रियेतही पुढे जाण्याची स्थिती निर्माण झाली आहे. पहिल्या टप्प्यात 14 शिक्षकांना नियुक्ती पत्र देण्यात आले आहे.
याशिवाय 3 शिक्षकांची छाननी प्रक्रिया सुरू आहे. तर उर्वरित 40 पदांसाठी संबंधित शाळांमध्ये पुढील टप्प्यात भरती प्रक्रिया राबवली जाणार आहे.
या कामात अतिरिक्त आयुक्त मुरुगानंथम एम., उपायुक्त डॉ. मेघना वासनकर, शिक्षणाधिकारी अमित भदाणे, उपशिक्षणाधिकारी सुभाष उपासे यांच्यासह शिक्षण विभागातील संबंधित अधिकारी आणि कर्मचाऱ्यांचे महत्त्वाचे योगदान राहिले. या प्रगतीबद्दल महापौर नीता ठाकरे आणि मनपा आयुक्त डॉ. विपिन इटनकर यांनी शिक्षण विभागाच्या प्रयत्नांचे कौतुक केले.
