गरबा खेळायला गेल्याचा राग; पवईत पत्नीच्या पोटात चाकू भोसकल्याचा पतीवर आरोप, पोलिसांकडून अटक

नवरात्रीच्या सणात मुंबईत अनेक ठिकाणी गरबा रासचे आयोजन करण्यात आले होते. तरुणाईबरोबरच अनेक मोठ्या माणसांनीही या नऊ दिवसांत गरबा खेळण्याचा आनंद घेतला. मात्र पवई परिसरात अशी एक घटना घडली, ज्यामुळे हा संपूर्ण परिसर हादरून गेला आहे.

पत्नी गरबा खेळायला गेल्याचा राग मनात ठेवून पवईतील एका पतीने तिच्या पोटात चाकू भोसकल्याची घटना घडली आहे. या हल्ल्यात पत्नी गंभीर जखमी झाली आहे. पोलिसांनी आरोपी पतीला अटक केली आहे.

या हल्ल्यात जखमी झालेल्या महिलेचे नाव वैशाली महेश रजत असून त्यांचे वय 30 वर्षे आहे. आरोपी पतीचे नाव महेश सुभाष रजत असून त्याचे वय 35 वर्षे आहे. पोलिसांनी त्याला तातडीने अटक केली आहे. पोलिसांनी दिलेल्या माहितीनुसार, ही घटना पवईतील आयआयटी परिसरातल्या महात्मा फुले नगर येथे घडली. केडी रुग्णालयासमोर असलेल्या समता मित्र मंडळाजवळ हा प्रकार झाला.

वैशाली गरबा खेळण्यासाठी या मंडळात गेल्या होत्या. पण त्यांचे गरबा खेळायला जाणे पतीला पटले नाही. त्यामुळे याच कारणावरून नाराज झालेल्या महेशने त्यांच्यावर चाकूने हल्ला केला. त्याने त्यांच्या पोटात चाकू खुपसून त्यांना ठार मारण्याचा प्रयत्न केल्याचा आरोप महेशवर ठेवण्यात आला आहे.

वैशाली यांनी दिलेल्या तक्रारीवरून पार्कसाइट पोलीस स्टेशनमध्ये भारतीय न्याय संहितेच्या (बीएनएस) कलम 109(1) आणि 352 अंतर्गत गुन्हा दाखल करण्यात आला आहे. पोलिसांनी आरोपी पतीला अटक केली असून पुढील तपास सुरू आहे.

दरम्यान, नवी दिल्लीतील मौर्य एन्क्लेव्ह परिसरातही चाकूहल्ल्याची घटना घडली आहे. या प्रकरणात पोलिसांनी चार अल्पवयीन मुलांना ताब्यात घेतले असून हल्ल्यात वापरलेले शस्त्र जप्त केले आहे.

मंगळवारी पीतमपुरा येथील क्यूयू ब्लॉकमधील चौधरी डेअरीजवळ एका व्यक्तीला चाकू मारल्याची माहिती मौर्य एन्क्लेव्ह पोलीस स्टेशनला मिळाली. त्यानंतर पोलीस घटनास्थळी धावले आणि त्यांनी जखमींना बीएसए रुग्णालयात दाखल केले. मात्र तेथे डॉक्टरांनी अरुण नावाच्या व्यक्तीला मृत घोषित केले. आशू नावाची दुसरी व्यक्तीही या चाकूहल्ल्यात जखमी झाली.

प्राथमिक तपासानुसार, एका तरुणीशी संबंधित वादातून हा प्रकार घडल्याचा संशय आहे. वादानंतर आरोपींनी दोन्ही व्यक्तींवर खंजीराने हल्ला केल्याचे समोर आले आहे. या प्रकरणाचा पुढील तपास पोलीस करत आहेत.