फोनवरूनच घरबसल्या बदलता येणार पॅन कार्डवरील फोटो आणि सही, जाणून घ्या पद्धत
पॅन कार्डवरील जुना फोटो किंवा सही बदलण्यासाठी आता नवीन कार्ड काढण्याची गरज नाही, ऑनलाइन अर्ज करून घरबसल्या हे काम पूर्ण करता येते.
आधार कार्डप्रमाणेच पॅन कार्ड हे सुद्धा सरकारी कामकाज आणि बँकिंगच्या प्रत्येक टप्प्यावर लागणारे महत्त्वाचे दस्तऐवज आहे. प्रत्येक व्यक्तीकडे आधार आणि पॅन कार्ड असणे बंधनकारक असल्याने ही दोन्ही कागदपत्रे सांभाळून ठेवावी लागतात. आधार कार्डला पॅन कार्ड लिंक केलेले असल्यामुळे एका क्लिकवर संबंधित व्यक्तीची संपूर्ण माहिती ऑनलाइन उपलब्ध होते.
पॅन कार्ड अनेक वर्षे वापरले जात असल्याने त्यावरील फोटो किंवा सही कालांतराने जुनी वाटू लागते किंवा बदलण्याची गरज भासते. आधी अशा वेळी नवीन पॅन कार्डसाठी अर्ज करावा लागत असे, मात्र आता फोनवरूनच पॅन कार्डवरील फोटो आणि सही अपडेट करता येते. यासाठीची पद्धत तशी सोपी आहे, फक्त ऑनलाइन दुरुस्ती विनंती भरताना दिलेली माहिती व्यवस्थित आणि अचूक भरावी लागते. कोणतीही ऑनलाइन माहिती भरण्यापूर्वी संबंधित वेबसाईट खरी आहे की नाही, याची खातरजमा करून घेणे अत्यंत गरजेचे आहे, अन्यथा चुकीच्या वेबसाईटवर माहिती भरल्यास नुकसान होण्याची शक्यता असते.
अर्ज करण्यापूर्वी काही तयारी करून ठेवणे आवश्यक आहे. आवश्यक कागदपत्रे, नवीन फोटो आणि नवीन सहीच्या स्कॅन केलेल्या प्रती आधीच तयार ठेवाव्या लागतात. अर्ज भरताना ठरलेले शुल्कही भरावे लागते. फोटो किंवा सही बदलण्यासाठी अर्ज करताना आधार कार्ड किंवा वाहन चालविण्याचा परवाना लागण्याची शक्यता असते. त्यामुळे नवीन पासपोर्ट आकाराच्या फोटोची डिजिटल प्रत आणि सुस्पष्ट दिसणाऱ्या नव्या सहीची प्रतिमा आधीच तयार ठेवावी. ही दोन्ही फाईल पोर्टलवर सांगितलेल्या आकार आणि फॉरमॅटमध्येच असावी, याची खात्री करून घ्यावी.
अर्ज करण्यासाठी सर्वप्रथम अधिकृत वेबसाईटवर जाऊन ऑनलाइन अर्जाचा पर्याय निवडावा लागतो. तिथे विद्यमान पॅन डेटामधील बदल किंवा दुरुस्ती हा पर्याय निवडायचा असतो. श्रेणीमध्ये व्यक्ती हा पर्याय निवडून नाव, जन्मतारीख यांसारखी मूलभूत माहिती भरावी लागते. फॉर्म सबमिट केल्यावर एक टोकन नंबर तयार होतो, त्यानंतर पॅन अर्ज पुढे चालू ठेवण्याचा पर्याय निवडावा लागतो. पुढील टप्प्यात पॅन अर्जाशी संबंधित माहिती भरावी लागते.
जिथे स्कॅन केलेली कागदपत्रे सादर करण्याचा पर्याय येतो, तिथे ई-स्वाक्षरीद्वारे स्कॅन केलेल्या प्रतिमा सादर करा हा पर्याय निवडावा. दुरुस्तीनंतर नवीन भौतिक पॅन कार्ड हवे असल्यास संबंधित पर्यायात होय निवडावे लागते. त्यानंतर पालकांशी संबंधित आवश्यक तपशील भरून पुढे जावे लागते. ओळखपत्र निवडल्यानंतर नवीन फोटो आणि सहीची डिजिटल प्रत अपलोड करावी लागते. सर्व माहिती भरून कागदपत्रे अपलोड केल्यावर शुल्क भरावे लागते.
पेमेंट पूर्ण झाल्यानंतर आधार क्रमांक टाकून प्रमाणीकरण प्रक्रिया पूर्ण करावी लागते. आधारशी जोडलेल्या मोबाईल नंबरवर आलेला ओटीपी टाकल्यानंतरच अर्ज सबमिट होतो. अर्ज सबमिट झाल्यावर मिळणारी पोचपावती जपून ठेवावी, कारण पुढील प्रक्रियेसाठी ती लागू शकते.
