Oracle कडून भारतात 3000 कर्मचाऱ्यांची कपात, सेव्हरन्स पेमेंटलाही मर्यादा
ओरॅकलने भारतातील हेल्थ, क्लाउड इन्फ्रास्ट्रक्चर आणि सेल्स विभागांतील सुमारे 3000 कर्मचाऱ्यांना कामावरून कमी केले असून, सेव्हरन्स पॅकेजच्या अटीही जाहीर केल्या आहेत.
टेक क्षेत्रातील मोठी कंपनी ओरॅकलने पुन्हा एकदा भारतात मोठ्या प्रमाणात कर्मचारी कपात केली आहे. कंपनीच्या ओरॅकल हेल्थ, क्लाउड इन्फ्रास्ट्रक्चर आणि सेल्स यांसारख्या विभागांमधून अंदाजे 3,000 कर्मचाऱ्यांना कामावरून कमी केले जाणार आहे. या कपातीबरोबरच कंपनीने कर्मचाऱ्यांना मिळणाऱ्या सेव्हरन्स पॅकेजच्या अटीही स्पष्ट केल्या आहेत.
कामावरून कमी केलेल्या कर्मचाऱ्यांसाठी सेव्हरन्स पॅकेजची कमाल मर्यादा 26 आठवडे, म्हणजेच साधारण सहा महिन्यांच्या मूळ पगाराइतकी ठेवण्यात आली आहे. यामागचं सूत्र असं आहे की, नोकरीच्या पहिल्या वर्षासाठी चार आठवड्यांचा मूळ पगार दिला जाईल आणि त्यानंतरच्या प्रत्येक सेवा वर्षासाठी एका आठवड्याचा मूळ पगार जोडला जाईल. याशिवाय ज्या कर्मचाऱ्यांचे स्टॉक ऑप्शन्स अजून वेस्ट झालेले नाहीत, म्हणजे अनव्हेस्टेड आहेत, ते रद्द केले जातील आणि हे कर्मचारी पुढील कॉर्पोरेट बोनससाठीही पात्र राहणार नाहीत.
सेवा समाप्ती वेतनाचं हे सूत्र कर्मचाऱ्याने कंपनीत किती वर्ष काम केलं यावर आधारित आहे. पहिल्या वर्षासाठी चार आठवड्यांचा मूळ पगार आणि पुढच्या प्रत्येक अतिरिक्त वर्षासाठी एका आठवड्याचा मूळ पगार, अशी ही रचना असून एकूण कमाल मर्यादा 26 आठवड्यांच्या मूळ पगाराइतकी आहे. जर एखादा कर्मचारी नोकरीच्या शेवटच्या वर्षात सहा महिने किंवा त्याहून जास्त काळ काम करत असेल, तर ते वर्ष पूर्ण वर्ष म्हणून धरलं जाईल. मात्र पेमेंट मिळण्याआधी कर्मचाऱ्याला सेवा समाप्तीच्या करारावर सही करावी लागेल आणि कंपनीच्या वस्तू परत केल्यानंतर साधारण तीन आठवड्यांनी हे पेमेंट केलं जाईल. एखादा कर्मचारी सहा महिन्यांच्या आत पुन्हा ओरॅकलमध्ये रुजू झाला, तर त्याला मिळालेल्या सेव्हरन्स भरपाईतील काही रक्कम परत करावी लागू शकते.
या कपातीचा परिणाम स्टॉक आणि बोनसशी संबंधित लाभांवरही होणार आहे. नोकरी संपुष्टात आल्यावर सर्व अनव्हेस्टेड स्टॉक ऑप्शन्स रद्द होतील आणि कर्मचाऱ्याची शेअर परचेस प्लॅनही संपुष्टात येईल. मात्र आधीच वेस्ट झालेले स्टॉक ऑप्शन्स वापरण्यासाठी साधारण तीन महिन्यांची मुदत मिळेल. तसंच योजनेच्या नियमांनुसार आधीच मिळवलेले बोनस किंवा कमिशन कर्मचाऱ्यांना मिळू शकतात.
भारतातील ओरॅकलच्या या कर्मचारी कपातीचा फटका अनेक विभागांना बसला आहे. ओरॅकल हेल्थ, ओसीआय सिक्युरिटी, ओरॅकल फायनान्शियल सर्व्हिसेस, सेल्स आणि डेटा सेंटर ऑपरेशन्स या प्रमुख विभागांतील कर्मचाऱ्यांवर याचा परिणाम झाला आहे. यात अगदी नवीन कर्मचाऱ्यांपासून मध्यम-स्तरीय व्यवस्थापनातील कर्मचाऱ्यांपर्यंत सगळ्यांचा समावेश आहे. या वर्षातील ओरॅकलची भारतातील ही दुसरी मोठी कर्मचारी कपात असल्याचं सांगितलं जात आहे.
