नायगाव, विरार स्थानकातच मिळणार किराणा सामान आणि झेरॉक्स, पश्चिम रेल्वेचे कियोस्क

मुंबईत कामावरून घरी परतताना किराणा सामान हवे असेल किंवा एखाद्या तातडीच्या कागदपत्राची झेरॉक्स आणि प्रिंट काढायची असेल, तर वसई-विरारकरांना आता बाजारात धावपळ करावी लागणार नाही. पश्चिम रेल्वेच्या मुंबई विभागाने उपनगरीय स्थानकांतील मोकळ्या जागांचा व्यावसायिक वापर करण्याचा निर्णय घेतला आहे. या निर्णयानुसार नायगाव आणि विरार स्थानकात थेट किराणा स्टोअर आणि फोटोकॉपी कियोस्क उभारले जाणार आहेत.

लोकल प्रवाशांचा रोजच्या प्रवासातला वेळ वाचावा आणि रेल्वेला अतिरिक्त बिगर-भाडे महसूल मिळावा, या दोन उद्देशांनी हा पाच वर्षांचा करार करण्यात आला आहे. या सुविधा लवकरच प्रत्यक्ष प्रवाशांच्या सेवेत दाखल होणार आहेत. या उपक्रमांतर्गत लोकलमधून उतरताच प्रवाशांना पॅकबंद किराणा माल, दुग्धजन्य उत्पादने आणि घरगुती वापराच्या वस्तू थेट स्थानकातच खरेदी करता येतील.

सरकारी, निमसरकारी किंवा वैयक्तिक कामांसाठी लागणाऱ्या कागदपत्रांची झेरॉक्स आणि प्रिंट काढण्यासाठीही आता स्थानकाबाहेर शोध घेत फिरावे लागणार नाही, कारण ही सुविधाही स्थानक परिसरातच उपलब्ध करून दिली जात आहे. प्रवाशांच्या नेहमीच्या ये-जा करण्यात अडथळा येऊ नये आणि त्यांना सहज खरेदी करता यावी, अशा मोक्याच्या जागा निवडण्यात आल्या आहेत. मुंबईच्या धावपळीतून रात्री उशिरा वसई-विरारमध्ये परतणाऱ्या नोकरदारांना, विशेषतः महिला प्रवाशांना, या सुविधेमुळे मोठा दिलासा मिळणार आहे.

जागा आणि भाड्याचा तपशील असा आहे. नायगाव स्थानकात पूर्वेकडील भुयारी मार्ग आणि मुख्य प्रवेशद्वाराजवळ १२० चौरस फुटांची जागा देण्यात आली असून, तिचे वार्षिक परवाना शुल्क २.१६ लाख रुपये आहे. विरार स्थानकात पूर्वेकडील तिकीट आरक्षण कार्यालयालगत तब्बल ३८७ चौरस फुटांची मोठी जागा उपलब्ध करून दिली आहे. तिचे वार्षिक भाडे ४.५६ लाख रुपये ठरले आहे.

तसेच अंधेरी स्थानकात १६० चौरस फूट जागेसाठी वार्षिक १३.०९ लाख रुपये शुल्क आकारण्यात आले आहे. ५ स्थानकांचे मिळून एकूण कंत्राट मूल्य सुमारे १.२० कोटी रुपये आहे.

पश्चिम रेल्वेचे मुख्य जनसंपर्क अधिकारी विनीत अभिषेक यांनी याबाबत माहिती दिली. ते म्हणाले, "८८ रेल्वे स्थानकांतील मोकळ्या जागांचा व्यावसायिक वापर करून प्रवाशांना दर्जेदार सेवा देणे आणि त्याचबरोबर रेल्वेचा अतिरिक्त महसूल वाढवणे हे आमचे मुख्य उद्दिष्ट आहे. हा उपक्रम प्रवासी सुविधा आणि रेल्वेचे उत्पन्न या दोन्ही आघाड्यांवर फायदेशीर ठरेल." या अभिनव मॉडेलमुळे नायगाव आणि विरार ही रेल्वे स्थानके प्रवासासोबतच नागरिकांसाठी बहुपयोगी सुविधा केंद्रे म्हणून नावारूपास येतील, असेही त्यांनी सांगितले.