नवरात्रीत गरब्यासाठी प्लेलिस्ट: सनेडो, छोगाडा, ढोलिडासह बॉलिवूडची सहा गाणी

लाडक्या बाप्पाला निरोप दिल्यानंतर आता सगळ्यांना नवरात्रोत्सवाची वाट असते. नवरात्रीला अवघे काही दिवस उरले आहेत आणि देवीच्या आगमनाची तयारी सर्वत्र सुरू झाली आहे. नऊ दिवसांचा हा उत्सव देशभरात मोठ्या उत्साहात आणि भक्तिभावाने साजरा केला जातो.

या काळात देवी दुर्गेची पूजा, आरती आणि धार्मिक विधी होतात. त्यांच्यासोबत गरबा आणि दांडियाचीही धूम पाहायला मिळते. रंगीबेरंगी पारंपरिक पोशाख, ढोल-ताशांचा गजर आणि संगीताच्या तालावर थिरकणारी पावलं यामुळे नवरात्रीचा आनंद आणखी वाढतो.

या जल्लोषात गाण्यांना खास महत्त्व असतं. गरबा आणि दांडिया खेळताना जोशपूर्ण गाणी वाजली की उत्साहाला आणखी रंग चढतो. यंदाच्या नवरात्रीत गरबा खेळण्यासाठी खास प्लेलिस्ट तयार करत असाल, तर बॉलिवूडमधील ही लोकप्रिय गाणी ऐकून पाहा.

यादीतलं पहिलं गाणं आहे 'सनेडो' (Sanedo). हे गाणं अनेकांच्या आवडीचं आहे. त्याचा ठेका आणि जोशपूर्ण संगीत गरबा खेळणाऱ्यांना ताल धरायला भाग पाडतं. मित्रपरिवारासोबत गरबा खेळताना हे गाणं नक्कीच रंगत आणू शकतं.

दुसरं गाणं 'नगाडा संग ढोल' (Nagada Sang Dhol). दीपिका पदुकोण आणि रणवीर सिंह यांच्या 'गोलियों की रासलीला राम-लीला' या चित्रपटातलं हे लोकप्रिय गरबा गाणं आहे. दमदार संगीत, पारंपरिक नृत्यशैली आणि दीपिकाचा आकर्षक अंदाज यामुळे नवरात्रीच्या उत्सवात हे गाणं विशेष रंगत आणतं.

तिसरं गाणं 'छोगाडा' (Chogada). 'लव्हयात्री' चित्रपटातलं हे गाणं गरबा आणि दांडियासाठी लोकप्रिय पर्याय आहे. उत्साही संगीत आणि ठेका धरायला लावणारी धून यामुळे नवरात्रीच्या प्लेलिस्टमध्ये या गाण्याला खास स्थान मिळालं आहे.

चौथं गाणं 'कमरिया' (Kamariya). 'मित्रों' चित्रपटातलं हे गाणं जोशपूर्ण संगीतासाठी ओळखलं जातं. गरबा खेळताना किंवा दांडियाच्या तालावर थिरकताना हे गाणं उत्साह वाढवू शकतं.

पाचवं गाणं 'ढोलिडा' (Dholida). आलिया भट्टच्या 'गंगूबाई काठियावाडी' चित्रपटातलं हे गाणं गरबाप्रेमींसाठी खास आहे. पारंपरिक गरब्याची झलक, दमदार ठेका आणि आलियाचा ऊर्जावान डान्स यामुळे नवरात्रीच्या उत्सवात हे गाणं चांगलीच रंगत आणतं.

सहावं गाणं 'राधे राधे' (Radhe Radhe). 'ड्रीम गर्ल' चित्रपटातलं हे गाणंही नवरात्रीच्या प्लेलिस्टमध्ये घेता येईल. भक्तिभावाची झलक आणि उत्साही संगीत यांचा संगम असलेलं हे गाणं सणाच्या वातावरणात आनंदाची भर घालू शकतं.

नवरात्रीचे नऊ दिवस देवीची आराधना, संगीत आणि नृत्याच्या उत्साहाने भरलेले असतात. त्यामुळे गरबा आणि दांडियाचा आनंद घेताना ही बॉलिवूड गाणी प्लेलिस्टमध्ये ठेवा आणि मित्रपरिवारासोबत नवरात्रीचा उत्सव जल्लोषात साजरा करा.