नवरात्रीच्या गरब्यात चिमुकल्यांचा 'छोटा तुकाराम मुंढे' अवतार, व्हिडीओ व्हायरल

यंदाच्या नवरात्रीत फॅन्सी ड्रेस गरबा स्पर्धेत लहान मुलं तुकाराम मुंढे यांचा वेश घेऊन आली आणि त्यांचे व्हिडीओ सोशल मीडियावर तुफान व्हायरल होत आहेत. एका मुलाचा फॉर्मल कपडे, चष्मा, मिशी आणि हातातली फाईल असलेला लूक विशेष लक्षवेधी ठरला आहे.

सध्या महाराष्ट्रात अन्न आणि औषध प्रशासनाचे आयुक्त तुकाराम मुंढे यांचं नाव खूप गाजत आहे. गेल्या काही महिन्यांपासून त्यांनी राज्यात भेसळीवर ज्या पद्धतीने कारवाया केल्या आहेत, त्यामुळे ते सगळीकडे चर्चेत आहेत. जिथे नियम तोडले जातात तिथे थेट जाऊन कारवाई करणे, दुकानं सील करणे आणि लोकांच्या आरोग्यासाठी कडक भूमिका घेणे, हे त्यांचं काम लोकांना खूप आवडत आहे. आता ही चर्चा फक्त ऑफिसपुरती किंवा बातम्यांपुरती राहिली नसून त्यांची क्रेझ थेट गरब्याच्या मैदानात पोहोचली आहे.

व्हिडीओत एक छोटा मुलगा अगदी मुंढे साहेबांसारखा तयार झालेला दिसतो. अंगात फॉर्मल शर्ट-पँट, नाकाखाली छोटी मिशी, डोळ्यांवर चष्मा, गळ्यात आयडी कार्ड आणि हातात एक फाईल आहे. एका मुलाच्या हातात पाटी असून त्यावर "मी छोटा तुकाराम मुंढे आहे" असं लिहिलं आहे. खाली "Honesty is the best policy" हे वाक्य असून त्याचा अर्थ प्रामाणिकपणा हाच खरा दागिना आहे, असा दिला आहे.

अशा वेशात मुलं गरब्याच्या स्टेजवर आली की लोक टाळ्या आणि शिट्ट्या वाजवून त्यांचं स्वागत करतात. सहसा मुलं जेठालाल, सिंघम, झाशीची राणी असे काहीतरी बनतात. यावेळी मात्र एका प्रामाणिक अधिकाऱ्याचा लूक घेऊन येणं वेगळं ठरलं आहे.

सरकारी अधिकारी म्हटलं की लोकांच्या डोळ्यासमोर भ्रष्टाचार येतो, पण तुकाराम मुंढे यांचं नाव याला अपवाद आहे. ते कडक शिस्तीसाठी ओळखले जातात. आजपर्यंत त्यांच्या अनेकदा बदल्या झाल्या, तरी ते ज्या ठिकाणी गेले तिथे त्यांनी आपल्या कामाने छाप सोडली. नियमात तडजोड नाही, कामात पारदर्शकता आणि लोकांच्या हिताला पहिलं प्राधान्य, यामुळे सामान्य माणसाला त्यांच्याबद्दल आदर वाटतो. 5 लाखांपेक्षा जास्त लोकांनी हे व्हिडीओ पाहिले आहेत.

व्हिडीओवर लोक भरपूर कमेंट करत आहेत. sahnavaidya म्हणतो, "शेवटी लोकांनी योग्य माणसाला आदर्श मानायला सुरुवात केली आहे." pranita_thakur26 म्हणते, "बाळा खूप छान केलंस, तुकाराम सर लवकरच तुला भेटायला येतील." nehasalviofficial यांनी गंमतीत लिहिलं आहे, "मुंढे साहेब लवकरच तुझ्या आईच्या किचनला भेट देतील", कारण सध्या ते घरातल्या भेसळीवरही लक्ष देत आहेत.

अनेकांनी हसण्याचे इमोजी टाकून मुलांचं कौतुक केलं आहे. अशा छोट्या गोष्टींतून मुलांमध्ये चांगले संस्कार रुजवता येतात, एखाद्या हिरोचा नाही तर प्रामाणिक अधिकाऱ्याचा आदर्श घेणं हीच खरी नवरात्रीची शिकवण आहे, असं म्हणायला हरकत नाही, असं या वेळी म्हटलं जात आहे.