नांदेडमध्ये FDA ची धडक तपासणी, सहा दुकानांतून 675 किलो अन्नसाठा जप्त
सणासुदीच्या तोंडावर मिठाई आणि दुग्धजन्य पदार्थांच्या मागणीत वाढ होत असल्याने नांदेड जिल्ह्यात अन्न व औषध प्रशासनाने भेसळखोरांविरुद्ध मोहीम उघडली आहे.
सणासुदीच्या दिवसांत खवा, पेढे, मिठाई आणि दुधाचे पदार्थ यांना बाजारात मोठी मागणी असते. याच काळात भेसळ होण्याची शक्यताही वाढते, त्यामुळे अन्न व औषध प्रशासनाने नांदेड जिल्ह्यात तपासणीची मोहीम हाती घेतली आहे. 'सुरक्षित अन्न, सुरक्षित महाराष्ट्र' या अभियानाअंतर्गत ही कारवाई सुरू आहे.
या मोहिमेत आतापर्यंत सहा आस्थापनांवर छापे टाकून तब्बल ६७५ किलो अन्नसाठा जप्त करण्यात आला. या साठ्याची अंदाजे किंमत २ लाख ८९ हजार ८० रुपये इतकी सांगण्यात येते. जप्त केलेल्या साठ्यात तूप, खवा, कुंदा पेढा, स्वीट पेढा, मावा पेढा आणि खाद्यतेल यांचा समावेश आहे. या पदार्थांचे एकूण ५४ नमुने विश्लेषणासाठी प्रयोगशाळेत पाठवण्यात आले आहेत.
नांदेड कार्यालयाच्या पथकाने जिल्ह्यातील मिठाईची दुकाने, दूध व दुग्धजन्य पदार्थ विकणारी केंद्रे आणि इतर खाद्यपदार्थ विक्रेते यांची तपासणी केली. कुठून किती साठा जप्त झाला याचा तपशीलही समोर आला आहे. देगलूर नाका, नांदेड येथील मे. शिवकृपा दूध भांडार येथून ८८ किलो तूप आणि ४९ किलो खवा जप्त करण्यात आला. मालेगाव रोडवरील मे. श्रीसाई खवा सेंटर येथून ९९ किलो खवा, तर एमआयडीसी परिसरातील मे. खंडेलवाल मिठाई येथूनही ९९ किलो खवा जप्त झाला. भोकर तालुक्यातील पाळज येथील मे. बदामराव पेढेवाले यांच्याकडून ३८ किलो कुंदा पेढा आणि ७८ किलो स्वीट पेढा हाती लागला. बिलोली तालुक्यातील कुंडलवाडी येथील मे. काशीराम दाचावर यांच्याकडून १४६ लिटर रिफाइंड सोयाबीन तेल, तर माहूर तालुक्यातील वाई बाजार येथील मे. जगदंबा बिकानेर येथून ७८ किलो मावा पेढा जप्त करण्यात आला.
या शिवाय जिल्ह्यातील स्वीट मार्ट, दूध व दुग्धजन्य पदार्थ विक्रेते आणि इतर खाद्यपदार्थ विक्रेते अशा एकूण २८ आस्थापनांचीही स्वतंत्रपणे तपासणी करण्यात आली. या तपासणीदरम्यान खवा, पनीर, पेढा, बर्फी आणि खाद्यतेल यांसह २६ नमुने विश्लेषणासाठी घेण्यात आले. या नमुन्यांचे अहवाल आल्यानंतर पुढील कायदेशीर कारवाई करण्यात येणार आहे.
सहायक आयुक्तांनी नागरिकांना सणासुदीच्या काळात परवानाधारक विक्रेत्यांकडूनच खाद्यपदार्थ खरेदी करण्याचे आवाहन केले आहे. पॅकबंद पदार्थ घेताना पॅकिंगवरील माहिती, वैधता कालावधी आणि इतर आवश्यक तपशील तपासून घ्यावा, तसेच मिठाई व दुग्धजन्य पदार्थांची साठवणूक योग्य पद्धतीने झाली आहे का याचीही खात्री करावी, असे त्यांनी सांगितले. भेसळयुक्त किंवा असुरक्षित अन्नपदार्थांची विक्री होत असल्याचे आढळल्यास नागरिकांनी अन्न व औषध प्रशासनाच्या नांदेड कार्यालयाशी संपर्क साधावा किंवा FOSCOS या ऑनलाइन पोर्टलवर अथवा complaints.ma-hafda.in या संकेतस्थळावर तक्रार नोंदवावी, असे आवाहन सहायक आयुक्तांनी केले.
