कर्जमाफीत नाव न आल्याची व्यथा मांडून नांदेडच्या बोरगावातील शेतकरी शंकर क्षीरसागर यांनी जीवन संपवले

नांदेड जिल्ह्यातील बोरगाव येथील अल्पभूधारक शेतकरी शंकर आबनराव क्षीरसागर यांनी दसऱ्याच्या पूर्वसंध्येला, म्हणजे 19 ऑक्टोबर रोजी, टोकाचे पाऊल उचलून आपले जीवन संपवले. असे करण्यापूर्वी त्यांनी सोशल मीडियावर एक व्हिडिओ शेअर केला होता.

या व्हिडिओतून त्यांनी जिल्हाधिकाऱ्यांना (कलेक्टर) आणि प्रशासनाला विनंती केली. आपली व्यथा मांडताना त्यांनी शेतकरी कर्जमाफीबाबत प्रश्न उपस्थित केले. या प्रकरणावर आता विरोधकांकडून तीव्र प्रतिक्रिया उमटत आहेत.

व्हिडिओमध्ये अश्रू ढाळत क्षीरसागर म्हणाले, "कलेक्टर साहेब, मी विनंती करतो की कर्जमाफी झालीच पाहिजे. शासनाने तीन वेळा कर्जमाफी जाहीर केली, पण एकाही कर्जमाफीच्या योजनेत माझे नाव आले नाही. त्यामुळे निराश होऊन मी आज आत्महत्या करत आहे."

कलेक्टर ऑफिसने आपली चौकशी करावी, असेही त्यांनी या व्हिडिओत म्हटले. शासन कर्जमाफी झाल्याचे सांगते, पण अर्ज करूनही आपल्या बाबतीत काही झाले नाही, अशी त्यांची तक्रार होती. आपण शेतकरी म्हणून आत्महत्या करत आहोत, तेव्हा आपल्या विनंतीकडे गांभीर्याने लक्ष द्यावे, असे सांगून त्यांनी "तुमच्या लेकरांची शपथ घेऊन सांगतो, चौकशी करा" असे आवाहन केले.

कर्जबाजारीपणा आणि शेतीचे नुकसान यांच्यासोबतच मुलांच्या शिक्षणाचा मोठा ताण त्यांच्यावर होता. त्यांची मुलगी पुण्यात मेडिकलचे शिक्षण घेत आहे. सरकारने विद्यार्थ्यांचे शैक्षणिक शुल्क माफ केल्याच्या मोठ्या घोषणा केल्या असल्या, तरी अनेकदा अर्ज करूनही त्यांच्या मुलीची फी माफ झाली नाही, असे यात सांगण्यात आले आहे.

क्षीरसागर यांची दीड एकर शेती होती. त्यात त्यांनी मोठ्या आशेने सोयाबीनचे पीक घेतले होते. मात्र यंदा पावसाने दीर्घ काळ ओढ दिली आणि दुष्काळासारखी भीषण परिस्थिती निर्माण झाली. त्यामुळे त्यांचे संपूर्ण पीक जळून गेले.

हा व्हिडिओ सोशल मीडियावर वाऱ्यासारखा पसरल्यानंतर नातेवाईक आणि पोलीस तातडीने त्यांच्या शेताकडे धावले. पण ते पोहोचण्यापूर्वीच क्षीरसागर यांनी आपले जीवन संपवले होते.

त्यांचे नाव सरकारच्या ऑनलाइन डेटाबेसमध्ये दिसत होते आणि येणाऱ्या कर्जमाफीच्या यादीत त्यांचा समावेश होण्याची शक्यता होती, असेही समोर आले आहे. या अत्यंत वेदनादायी घटनेनंतर नांदेडचे जिल्हाधिकारी राहुल कर्डिले यांनी प्रकरणाच्या सखोल चौकशीचे आदेश दिले आहेत.