नागपुरात घरातून गुटख्याचा अवैध साठा जप्त; बेडरूम आणि स्टोअर रूममध्ये लपवला होता २ लाख २३ हजारांचा माल

प्रतिबंधित गुटखा आणि सुगंधित पान मसाल्याची अवैध विक्री करणाऱ्यांविरोधात नागपूर पोलिसांनी कारवाईचा धडाका सुरू केला आहे. या कारवाईत कलमना पोलीस स्टेशनच्या हद्दीत एस्कॉर्ट पथकाने एका घरावर छापा टाकला आणि तब्बल २ लाख २३ हजार ५०३ रुपयांचा प्रतिबंधित तंबाखूजन्य पदार्थांचा साठा जप्त केला. विशेष म्हणजे, हा माल आरोपीने घरातील बेडरूम आणि स्टोअर रूममध्ये लपवून ठेवला होता.

५ नोव्हेंबर रोजी सायंकाळी एस्कॉर्ट पथक गस्तीवर असताना पोलिसांना एक गोपनीय माहिती मिळाली. जुन्या कामठी रोडवरील न्यू ओम साई नगर परिसरात प्रतिबंधित गुटख्याचा साठा आहे, असे त्या माहितीत सांगण्यात आले होते. त्यानुसार पोलिसांनी प्लॉट क्रमांक १६ आणि १७ येथे राहणाऱ्या लखन चतरो छाडी (३५) याच्या घरी छापा टाकला. पोलिसांनी घराची झडती घेतली, तेव्हा तिथे विविध कंपन्यांचा गुटखा आणि सुगंधित पान मसाला आढळून आला.

आर्थिक फायद्यासाठी, म्हणजे विक्रीच्या उद्देशाने हा साठा जमा करण्यात आल्याचे प्राथमिक तपासात समोर आले आहे. अन्न व औषध प्रशासनाच्या सहायक आयुक्त रविना बबन नागले यांनी याबाबत तक्रार दिली. त्यांच्या तक्रारीवरून कलमना पोलीस स्टेशनमध्ये संबंधित कलमांनुसार गुन्हा दाखल करण्यात आला आहे. जप्त केलेल्या मुद्देमालासह आरोपीला पुढील कारवाईसाठी कलमना पोलिसांच्या ताब्यात देण्यात आले आहे.

पोलीस आयुक्त विश्वास नांगरे पाटील यांच्या मार्गदर्शनाखाली पोलीस उपनिरीक्षक अभिषेक बागडे आणि एस्कॉर्ट पथकाने ही कारवाई केली. जप्त केलेला गुटखा नेमका कुठून आणला होता आणि त्याची विक्री कोणाला केली जाणार होती, याचा पोलीस आता तपास करत आहेत.