पोस्टातील शिपायाच्या नोकरीसाठी ३४ लाख घेतल्याचा आरोप; चंद्रपुरात तिघांवर गुन्हा

चंद्रपूर शहर पोलीस ठाण्यात तिघांविरोधात फसवणुकीचा गुन्हा दाखल झाला आहे. नागपूरच्या पोस्ट ऑफिसमध्ये शिपाई (चपराशी) पदाची नोकरी लावून देण्याचे आश्वासन दिल्याचा आणि त्यासाठी पैसे घेतल्याचा आरोप या तिघांवर आहे. पोलिसांनी दिलेल्या माहितीनुसार, फिर्यादीच्या म्हणण्याप्रमाणे या कामासाठी एकूण ३४ लाख ५३ हजार ६०० रुपये देण्यात आले.

भारतीय न्याय संहितेच्या कलम ३(५) आणि ३१८(४) नुसार हा गुन्हा नोंदवण्यात आला आहे. पोलीस उपनिरीक्षक प्रकाश निकडे या प्रकरणाचा तपास करत आहेत. या गुन्ह्यात कोणाला अटक झाल्याचे पोलिसांनी सांगितलेले नाही.

फिर्यादी यशमीत बुधाजी बागेश्वर हे ३५ वर्षांचे असून तुकुम चव्हाण कॉलनी, डब्ल्यूसीएल क्वार्टर्स, चंद्रपूर येथे राहतात. सध्या ते दाताळा एमआयडीसीतील एका खासगी एजन्सीत सेक्युरिटी गार्ड म्हणून काम करतात. त्यांच्या आजीचा गंजवार्ड बाजारात भाजीपाल्याचा धंदा होता. त्यामुळे लहानपणापासून ते आजीसोबत भाजी विकायचे.

या काळात ते आरोपी केतन जोरगेवार याच्या डिस्पोजलच्या दुकानावर जायचे, म्हणून दोघांची चांगली ओळख झाली होती. फिर्यादीनुसार, जानेवारी २०२४ मध्ये केतन जोरगेवार याने नागपूरच्या पोस्ट ऑफिसमध्ये शिपायाच्या जागा निघाल्या आहेत, आपण सरकारी नोकरी लावून देण्याचे काम करतो, असे सांगितले. त्यासाठी २२ ते २४ लाख रुपये खर्च येईल, असेही त्याने सांगितल्याचे फिर्यादीने म्हटले आहे. भाजीपाल्याचा व्यवसाय चांगला चालत असल्याने फिर्यादीकडे पैसे होते.

फिर्यादीच्या तक्रारीनुसार, आरोपींनी त्यांना घरी बोलावले. ड्युटीचे काम पाहणारे साहेब दिल्लीत आहेत आणि त्यांना पैसे पाठवावे लागतील, असे सांगून वेळोवेळी रोख रक्कम, बँक चेक आणि फोनपेद्वारे पैसे घेतले जात होते. सुरुवातीला नागपूरमधील एका व्यक्तीचे काम झाले होते, पण त्याला कॅन्सर झाल्यामुळे तो नोकरी करणार नाही, त्यामुळे त्याचे पैसे तू भर आणि ती जागा तुझ्या नावावर करतो, अशा थापा आरोपीने मारल्याचेही फिर्यादीने सांगितले आहे.

सततच्या मागण्या आणि लवकरच नोकरीची ऑर्डर मिळेल या विश्वासाने फिर्यादीने स्वतःच्या मालकीचा फ्लॅट गहाण ठेवला. त्यातून २ लाख रुपये १२ जून २०२४ रोजी रीमा जोरगेवार यांच्याकडे दिले. अशा प्रकारे रोख, ऑनलाइन आणि चेकने मिळून एकूण ३४ लाख ५३ हजार ६०० रुपये आरोपींना दिल्याचे फिर्यादीने म्हटले आहे.

याच दरम्यान घरातील सोन्याच्या पाच अंगठ्या गायब असल्याचे फिर्यादीच्या लक्षात आले. एका मोपेडच्या डिक्कीत त्यांना मुथूट फायनान्सची स्लिप सापडली. चौकशी केल्यावर केतन जोरगेवार याने त्या अंगठ्या मुथूट फायनान्समध्ये गहाण ठेवून पैसे घेतल्याचे समोर आले. याबद्दल विचारायला गेले असता केतनने उडवाउडवीची उत्तरे दिली, मोबाइल बंद केला आणि तो फरार झाला, असे फिर्यादीचे म्हणणे आहे.

फिर्यादीने पोलिसात तक्रार करण्याची धमकी दिल्यानंतर आरोपी चंद्रपूरला परत आला आणि त्याने अंगठ्या सोडवून परत केल्या. मात्र नोकरीसाठी दिलेले ३४ लाख ५३ हजार ६०० रुपये परत मागितल्यावर त्याने फक्त १६ लाख रुपये देण्याची तयारी दाखवली आणि दोन महिन्यांची मुदत मागितली. दोन वर्षे उलटली तरी पैसे मिळाले नाहीत. उलट पैसे मागायला गेल्यावर आरोपींनी शिवीगाळ केली आणि घरातील महिलांना धक्काबुक्की केली, असाही फिर्यादीचा आरोप आहे. फसवणूक झाल्याचे स्पष्ट झाल्यानंतर फिर्यादीने तक्रार दिली आणि त्यावरून चंद्रपूर शहर पोलिसांनी गुन्हा नोंदवला.