नागपुरात भेसळखोरांवर FDAची कारवाई; चक्रफूल, तांदूळ, खवा आणि गुळासह २५ लाखांहून अधिकचा माल जप्त

सणासुदीच्या दिवसांत खाद्यपदार्थांची मागणी वाढते. नेमक्या याच काळात भेसळ आणि नियमबाह्य पद्धतीने होणारी अन्नविक्री रोखण्यासाठी अन्न व औषध प्रशासनाने (FDA) नागपूरमध्ये विशेष मोहीम सुरू केली आहे. शहर आणि आजूबाजूच्या भागातील वेगवेगळ्या आस्थापना, गोदामे आणि अन्ननिर्मिती केंद्रांवर तपासणी करून FDAच्या पथकाने संशयित अन्नसाठ्यावर कारवाई केली. या मोहिमेत एकूण २५ लाख रुपयांहून अधिक किमतीचा माल जप्त करण्यात आला.

उंझा रायपूर ट्रान्सपोर्ट येथील आमसर अँड कंपनीच्या ठिकाणी १,९९७.६ किलो चक्रफूल सापडले. त्यात कृत्रिम रंग वापरल्याचा संशय आहे. ६ लाख २२ हजार ४९२ रुपये किमतीचा हा साठा ताब्यात घेण्यात आला. न्यू नागपूर कोल्ड स्टोरेजमधील समधा कॉर्पोरेशन आणि मंत्री ट्रेडिंग प्रा. लि. येथे लेबलिंगमध्ये त्रुटी आढळल्या. त्यामुळे तेथून ३६ किलो मनुके जप्त करण्यात आले.

कळमना धान्य बाजारातील दोन व्यापाऱ्यांनी नियमांचे पालन न करता तांदूळ पॅक केला होता. त्यांच्याकडून १०,४३६ किलो सॉर्टेक्स तांदूळ जप्त झाला. या मालाची किंमत ५ लाख ८२ हजार ४१६ रुपये असल्याचे सांगण्यात आले.

हिंगणा येथील सुपीरियर बिस्किट्स अँड प्रॉडक्ट्समधून कॅफिनयुक्त पेयांचा साठा ताब्यात घेण्यात आला. तर खामला येथील जयशंकर किराणा स्टोअर्समधून ५६८ किलो संशयित गूळ घेण्यात आला. या दोन्ही कारवायांमध्ये अनुक्रमे २ लाख ३७ हजार रुपयांचा आणि २ लाख १४ हजार ८० रुपयांचा माल जप्त झाला.

कामठी आणि सावनेर येथे विनापरवाना अन्ननिर्मिती सुरू असल्याचे आणि लेबलिंगच्या नियमांचे उल्लंघन होत असल्याचे आढळले. तेथून कॉर्न फ्लोअर, कस्टर्ड पावडर, मेझ स्टार्च आणि तांदळाचा साठा जप्त करण्यात आला.

वकीलपेठ येथून ४७९.२ किलो संशयित क्रीम जप्त करण्यात आले. तसेच इतर डेअरी व्यावसायिकांकडूनही दूध, रसगुल्ला, साखर, खवा आणि गायीचे तूप जप्त करण्यात आले आहे.

जप्त केलेल्या या सर्व नमुन्यांची प्रयोगशाळेत तपासणी केली जाणार आहे. तपासणीचा अहवाल आल्यानंतर संबंधितांविरोधात कायदेशीर कारवाई केली जाणार आहे, अशी माहिती FDAने दिली आहे.