नागपूरच्या डॉ. हेडगेवार उड्डाणपुलाखाली फक्त 2 जॅकचा आधार, सुरक्षेवर प्रश्नचिन्ह

नागपूर शहरातील इंदोरा चौक ते दिघोरी चौकादरम्यान उभारण्यात आलेल्या 8.9 किलोमीटर लांबीच्या उड्डाणपुलाच्या लोकार्पण समारंभात मुख्यमंत्री देवेंद्र फडणवीस यांनी सांगितले की, नागपूरला आंतरराष्ट्रीय शहर बनवण्याची संधी देणाऱ्या इथल्या जनतेचे हे ऋण विकासाच्या रूपाने फेडले जात आहे.

रेशीमबाग येथील भट सभागृहात झालेल्या या कार्यक्रमात मुख्यमंत्र्यांनी या पुलाला 'डॉ. केशव बळीरामपंत हेडगेवार उड्डाणपूल' असे नाव देण्याची घोषणा केली. पुलाचे लोकार्पण मुख्यमंत्री फडणवीस आणि केंद्रीय मंत्री नितीन गडकरी यांच्या हस्ते झाले.

मुख्यमंत्र्यांनी नमूद केले की, केंद्रीय मंत्री नितीन गडकरी यांच्या संकल्पनेतून साकारलेला हा उड्डाणपूल उत्तर आणि दक्षिण नागपूरला जोडणारा केवळ पूल नसून एक प्रकारचा हवाई मार्गच आहे. आधुनिक तंत्रज्ञानाचे हे उत्तम उदाहरण असल्याचे ते म्हणाले. पुलाला दिलेले नाव हे डॉ. हेडगेवार यांना खऱ्या अर्थाने आदरांजली असल्याचेही फडणवीस यांनी सांगितले.

डॉ. हेडगेवार, राजा बख्त बुलंद शाह, राजा भोसले यांच्यासारख्या मोठ्या व्यक्तिमत्त्वांमुळे नागपूरची ओळख निर्माण झाली आहे, असे मुख्यमंत्री म्हणाले. संघाच्या शताब्दी वर्षात पुलाला डॉ. हेडगेवार यांचे नाव देणे ही समर्पणाची भावना असल्याचे त्यांनी सांगितले. गडकरी यांनी नागपूरकरांना एक वेगळाच पूल भेट म्हणून दिला, त्याबद्दल नागपूरवासीयांच्या वतीने आपण त्यांचे आभार मानतो, असेही फडणवीस यांनी नमूद केले.

मात्र लोकार्पणानंतर आता याच डॉ. हेडगेवार उड्डाणपुलावर धोका घोंगावू लागला आहे. इंदोरा ते दिघोरी जोडणाऱ्या या पुलाचा ताळमेळ बिघडल्याने पुलाखाली जॅक लावण्यात आले आहेत. पाचपावली पोलीस स्टेशनसमोर लावलेल्या अवघ्या 2 जॅकच्या आधारावर हजारो वाहने रोज या पुलावरून धावत आहेत.

याशिवाय पुलाखालील पृष्ठभागाचा थर उखडू लागला होता. हा भाग नंतर लिंपून झाकण्यात आल्याचे समोर आले आहे. स्थानिक पातळीवर अशी चर्चा आहे की, पुलाच्या बांधकामानंतर काही भागांत अपेक्षित ताळमेळ बसू शकला नाही, त्यामुळे खालून आधार देण्याची गरज भासली. मात्र यासंदर्भात संबंधित एजन्सीने सविस्तर तांत्रिक माहिती जाहीर करण्याची गरज आहे.

इंदोरा ते दिघोरी दरम्यानच्या वाहतुकीसाठी हा पूल अत्यंत महत्त्वाचा आहे. त्यामुळे पुलाच्या संरचनात्मक सुरक्षेबाबत कोणत्याही प्रकारची शंका दुर्लक्षित करता येणार नाही. पुलाखाली जॅक का लावण्यात आले, पुलाची भार क्षमता किती आहे आणि बांधकामाची सद्यस्थिती काय आहे, याची स्वतंत्र चौकशी करण्याची मागणी होत आहे.