नव्या वर्षात मुंबई उपनगरीय रेल्वेच्या ताफ्यात 20 नव्या एसी लोकल, रोज 240 ते 280 फेऱ्यांचा मार्ग मोकळा

मुंबई उपनगरीय रेल्वेच्या प्रवाशांसाठी एक दिलासा देणारी बातमी आहे. नव्या वर्षात रेल्वेच्या ताफ्यात तब्बल 20 नवीन वातानुकूलित (एसी) लोकल दाखल होणार आहेत. प्रवाशांची वाढती मागणी लक्षात घेऊन रेल्वे प्रशासनाने हा निर्णय घेतला आहे. त्यामुळे महामुंबईतील रेल्वे प्रवाशांचा प्रवास येत्या काही दिवसांत आरामदायक, सुखकर आणि गारेगार होणार आहे, तसेच मुंबईकरांना काहीसा दिलासा मिळण्याची चिन्हे आहेत.

या 20 एसी लोकल गाड्यांची बांधणी चेन्नई येथील इंटिग्रल कोच फॅक्ट्रीत (ICF) वेगाने सुरू आहे. सध्या मुंबईच्या रुळांवर धावणाऱ्या एसी लोकलच्याच धर्तीवर या गाड्यांची रचना केली जात आहे. ही रचना आधीपासून परिचित असल्यामुळे गाड्या मुंबईत आल्यानंतर त्यांची वेगळी चाचणी घ्यावी लागणार नाही. म्हणजेच गाड्या मुंबईत येताच त्या लगेच प्रवासी सेवेसाठी रुळांवर उतरवल्या जाणार आहेत. लागणारे सगळे साहित्य जमा करण्याचे काम पूर्ण झाले असून आयसीएफने कामाला गती दिली आहे.

या गाड्या आल्यावर मध्य आणि पश्चिम रेल्वेवरील एसी फेऱ्यांची संख्या मोठ्या प्रमाणात वाढणार आहे. एक एसी लोकल साधारणपणे 12 ते 14 फेऱ्या चालवते. त्या हिशेबाने या 20 नव्या लोकलमुळे दररोज 240 ते 280 नव्या एसी फेऱ्या सुरू होण्याचा मार्ग मोकळा होणार आहे. प्रवाशांची मागणी आणि गर्दीचा अंदाज यांचा ताळमेळ घालून या गाड्या मध्य आणि पश्चिम रेल्वेवर योग्य प्रकारे वाटल्या जाणार आहेत.

हा एका मोठ्या आणि दीर्घकालीन प्रकल्पाचाच भाग आहे. मुंबई रेल्वे विकास महामंडळाच्या (MRVC) म्युटी 3 आणि 3 अ प्रकल्पांतर्गत एकूण 238 एसी लोकल गाड्यांच्या बांधणीला राज्य सरकार आणि केंद्र सरकारने मंजुरी दिली आहे. सुरुवातीला यासाठी निविदा प्रक्रिया राबवण्यात आली होती. पण त्या प्रक्रियेनुसार पहिली लोकल यायला सुमारे चार वर्षांचा काळ लागण्याची अपेक्षा होता. हा उशीर टाळण्यासाठी रेल्वे प्रशासनाने गाड्या थेट रेल्वेच्या कारखान्यांतच बांधण्याचा निर्णय घेतला.

रेल्वे मंडळाच्या निर्देशांनुसार आयसीएफसोबतच कपूरथला येथील रेल कोच फॅक्ट्री (RCF) आणि रायबरेलीतील मॉडर्न कोच फॅक्ट्री (MCF) या तिन्ही कारखान्यांत मिळून एकाच वेळी या 238 एसी लोकलची बांधणी होणार आहे. त्यात आयसीएफ नोडल एजन्सी म्हणून समन्वय साधणार आहे. 2030 पर्यंत सर्व 238 नव्या गाड्या मुंबईच्या रुळांवर धावत्या करण्याचे रेल्वे प्रशासनाचे नियोजन आहे. त्यामुळे येत्या काही वर्षांत मुंबई उपनगरीय रेल्वेचे चित्र पूर्णपणे बदलून जाईल आणि प्रवाशांना जागतिक दर्जाच्या सुविधांचा अनुभव घेता येईल.