मुंबई वन ॲपवरून आता रिक्षा, टॅक्सीचे भाडेही भरता येणार; एमएमआरडीएची घोषणा

मुंबई महानगर प्रदेश विकास प्राधिकरणाने (एमएमआरडीए) एकात्मिक तिकीट प्रणालीअंतर्गत 'मुंबई वन स्मार्ट कार्ड' आणि 'मुंबई १ ॲप' सुरू केले आहे. या दोन्ही सेवांना प्रवाशांकडून चांगला प्रतिसाद मिळत आहे. आता या ॲपवरून टॅक्सी, रिक्षा, शेअर रिक्षा आणि बाइक टॅक्सीचे भाडेही भरता येणार असल्याची घोषणा एमएमआरडीएकडून करण्यात आली आहे. ही सेवा सहा महिन्यांत उपलब्ध होण्याची शक्यता आहे.

ॲप सुरू झाल्यापासून एका वर्षात त्यावरून १ कोटी ३२ लाखांहून अधिक तिकिटांची खरेदी झाली आणि त्यातून ३२ कोटी रुपये महसूल मिळाला. सध्या या ॲपवर मेट्रो, बेस्ट आणि रेल्वेसह एकूण ११ सेवांची तिकिटे मिळतात. एमएमआरडीएने आता 'मुंबई वन' ॲपशी मुंबईतील रिक्षा, टॅक्सी, शेअर रिक्षा आणि बाइक टॅक्सी सेवाही जोडण्याचा निर्णय घेतला आहे. महानगर आयुक्त डॉ. संजय मुखर्जी यांनी याची घोषणा केली.

मुंबई महानगर प्रदेशात प्रवासासाठी लोक उपनगरीय रेल्वे, बेस्ट, एसटी, मोनो आणि मेट्रो या सार्वजनिक वाहतुकीचा वापर करतात. यातील प्रत्येक प्रवासासाठी प्रवाशांना वेगळे तिकीट काढावे लागते. त्यामुळे त्यांचा वेळ जातो आणि त्रासही होतो. हे लक्षात घेऊन वेगवेगळी तिकिटे काढण्याच्या त्रासातून प्रवाशांची सुटका करण्यासाठी 'मुंबई १ स्मार्ट कार्ड' तयार करण्याचा निर्णय राज्य सरकारने घेतला होता. या कार्डची संपूर्ण जबाबदारी एमएमआरडीएवर सोपवण्यात आली होती.

मुंबईत रिक्षा, टॅक्सी, शेअर रिक्षा आणि बाइक टॅक्सीने प्रवास करणाऱ्यांची संख्या मोठी आहे. या प्रवाशांना लवकरच या ॲपवरून आपली राइड आरक्षित करता येईल आणि भाडेही भरता येईल. त्यासाठी ॲपमध्ये आवश्यक ते बदल करण्याचे काम सध्या सुरू आहे. येत्या सहा महिन्यांत ही सेवा सुरू करण्याचे एमएमआरडीएचे नियोजन आहे.

ही सेवा ८ ऑक्टोबर २०२५ रोजी पंतप्रधान नरेंद्र मोदी यांच्या हस्ते सुरू करण्यात आली. हे ॲप सध्या मुंबईतील सहा मेट्रो मार्गिका, नवी मुंबई मेट्रो मार्गिका, उपनगरीय रेल्वे आणि बेस्ट बससाठी वापरले जाते. याशिवाय नवी मुंबई महापालिका, ठाणे महापालिका, कल्याण-डोंबिवली महापालिका आणि मिरा भाईंदर महापालिकेच्या बस सेवांसह मिळून ११ सेवांसाठी ते चालते. पुढे या ॲपवरून विमानाचे तिकीट काढण्याचीही सोय उपलब्ध करून देण्याची योजना आहे.