मुंबई बीएमडब्ल्यू अपघात : कोस्टल रोडवर अपघात, लाला कॉलेजसमोरील लोटस जेट्टीजवळ घडली घटना

मुंबईच्या कोस्टल रोडवर रविवारी पहाटे भरधाव वेगात जाणाऱ्या बीएमडब्ल्यू कारचा भीषण अपघात झाला. मरीन ड्राईव्हवरून हाजी अलीच्या दिशेने जाताना ही कार लाला कॉलेजसमोरील लोटस जेट्टीजवळ अपघातग्रस्त झाली. पहाटे साधारण पाच वाजून वीस मिनिटांनी ही घटना घडली. कोस्टल रोड नियंत्रण कक्षाने दिलेल्या माहितीनुसार, कारचालकाने अतिवेगाने गाडी चालवल्यामुळेच हा अपघात झाला असे सांगण्यात येत आहे.

मुंबईच्या कोस्टल रोडवर रात्री आणि पहाटेच्या वेळी गाड्या अतिवेगाने चालवल्या जात असल्याच्या तक्रारी आधीपासूनच वारंवार येत होत्या. यापूर्वीही या रस्त्यावर अपघात घडल्याच्या घटना समोर आल्या होत्या. या ताज्या अपघातामुळे रस्त्यावरील वाहतूक शिस्तीचे महत्त्व पुन्हा एकदा अधोरेखित झाले आहे.

बीएमडब्ल्यू कारमध्ये असलेले चौघेजण या अपघातात गंभीर जखमी झाले. सर्वांना तातडीने उपचारासाठी मुंबईच्या नायर रुग्णालयात दाखल करण्यात आले. रुग्णालयाच्या सीएमओंकडून मिळालेल्या माहितीनुसार, २१ वर्षीय शनाय गज्जल याला रुग्णालयात दाखल करतानाच मृत घोषित करण्यात आले. तसेच १७ वर्षीय धैर्य सेठ यालाही मृत घोषित करण्यात आले. या अपघातात एका २५ वर्षीय अनोळखी व्यक्तीलाही रुग्णालयात आणण्यात आले होते, मात्र उपचारादरम्यान त्याचाही मृत्यू झाला. २० वर्षे वयाच्या आणखी एका अनोळखी तरुणाला ट्रॉमा वॉर्डमध्ये दाखल करण्यात आले असून त्याची प्रकृती चिंताजनक असल्याचे सांगण्यात येत आहे.

अपघाताची बातमी समजताच परिसरात खळबळ उडाली. पोलिसांनी तातडीने घटनास्थळी धाव घेऊन पाहणी केली आणि अपघात घडलेली जागा सील केली. पोलीस या प्रकरणाचा पुढील तपास करत असून बीएमडब्ल्यू कार ताब्यात घेऊन ती तांत्रिक तपासणीसाठी पाठवण्यात आली आहे. अपघातस्थळाच्या परिसरातील सीसीटीव्ही फुटेजही तपासले जात आहे. अपघाताचे नेमके कारण आणि कारचा नेमका वेग किती होता, याबाबत अधिक माहिती पुढील तपासातून समोर येईल, असे पोलिसांनी सांगितले.

अपघातातील सर्व मृतदेह पोस्टमॉर्टमसाठी मुंबईच्या नायर रुग्णालयात दाखल करण्यात येणार आहेत. २५ वर्षीय अनोळखी तरुणाच्या नातेवाईकांचा शोध पोलीस घेत आहेत. अपघातात गंभीर जखमी झालेल्या तरुणावर डॉक्टरांचे बारकाईने लक्ष आहे. पोलिसांनी या प्रकरणी गुन्हा दाखल करून तपास सुरू ठेवला आहे. या दुर्घटनेमुळे तीन तरुणांच्या कुटुंबीयांवर शोककळा पसरली आहे. मुंबईच्या कोस्टल रोडसारख्या मोठ्या आणि मोकळ्या रस्त्यावर वेगावर नियंत्रण नसल्यास काय घडू शकते, याचे हे ताजे उदाहरण असल्याचे बोलले जात आहे. या रस्त्यावर याआधीही अशाच प्रकारच्या घटना घडल्या असल्याने वाहतूक शिस्तीचा प्रश्न पुन्हा ऐरणीवर आला आहे. पोलिसांनी नागरिकांना वेग मर्यादेचे पालन करण्याचे आवाहन केले असून तपास पूर्ण झाल्यानंतर अपघाताचे नेमके कारण आणि जबाबदारी स्पष्ट होईल, असे सांगण्यात येत आहे.