आशा सेविकांना दिवाळी बोनस नाही, मुंबई महापालिकेसमोर 'भीक मांगो' आंदोलनाचा इशारा

मुंबई महापालिकेच्या (BMC) आरोग्य विभागांतर्गत तळागाळात आरोग्यसेवा पोहोचवणाऱ्या आशा सेविकांना यंदाही दिवाळी बोनस जाहीर झालेला नाही, असा आरोप सीटू संलग्न आशा युनियनने केला आहे. यावरून युनियनने तीव्र नाराजी व्यक्त केली आहे. राष्ट्रीय आरोग्य अभियान (एनएचएम) आणि मुंबई महापालिकेच्या आशा सेविकांना तातडीने भरीव बोनस द्यावा, अशी युनियनची मागणी आहे. तसे झाले नाही तर दिवाळीच्या तोंडावर मुंबई महापालिकेसमोर 'भीक मांगो' आंदोलन केले जाईल, असा इशाराही युनियनने दिला आहे.

आशा सेविकांना दिवाळी बोनस मिळावा, ही मागणी गेल्या अनेक वर्षांपासून केली जात आहे. त्यासाठी दरवर्षी आंदोलनही होते. यंदा 26 ऑक्टोबर रोजी आझाद मैदानावर आंदोलन करूनही बोनस जाहीर झाला नाही, त्यामुळे आशा सेविकांमध्ये नाराजी आहे, असे युनियनने म्हटले आहे.

युनियनने दिलेल्या माहितीनुसार, इतर महापालिकांमध्ये मात्र बोनस मिळतो आहे. नवी मुंबई महापालिकेने सर्वसाधारणपणे 45 हजार रुपयांचा बोनस जाहीर केला असून त्यात आशा सेविकांचाही समावेश आहे. कल्याण-डोंबिवली महापालिकेने आशा सेविकांना सहा हजार रुपये बोनस देण्याचे मान्य केले आहे. ठाणे, मीरा-भाईंदर आणि वसई-विरार महापालिकांमध्येही आशा सेविकांना दरवर्षी दिवाळी बोनस दिला जातो, असा दावा युनियनने केला आहे.

मुंबई महापालिका ही देशातील श्रीमंत महापालिकांपैकी एक आहे. तरीही येथील आशा सेविकांना बोनसपासून वंचित ठेवले जात आहे, असा आरोप संघटनेने केला आहे.

आशा सेविका घरोघरी जाऊन नागरिकांना आरोग्यसेवा मिळवून देण्यासाठी सतत काम करतात. कोरोना महामारीच्या काळातही त्यांनी स्वतःचा जीव धोक्यात घालून काम केले, याकडे युनियनने लक्ष वेधले आहे. मात्र, त्यांच्या कामाच्या मानाने त्यांना योग्य आर्थिक लाभ मिळत नाही, अशी संघटनेची भावना आहे.

आशा सेविका आणि सामुदायिक आरोग्य स्वयंसेविका (सीएचव्ही) यांचे काम सारख्याच स्वरूपाचे आहे, असे सांगत युनियनने सीएचव्हींना जाहीर झालेल्या 16 हजार रुपयांच्या बोनसचा मुद्दा मांडला आहे. सीएचव्हींना बोनस दिला जात असताना आशा सेविकांना त्यातून वगळणे अन्यायकारक आणि भेदभावपूर्ण आहे, असा आरोप करण्यात आला आहे.

आशा सेविकांना मानधनही नियमितपणे मिळत नाही, असा दावाही युनियनने केला आहे. अशा परिस्थितीत दिवाळीसारखा सण साजरा करणे आर्थिकदृष्ट्या कठीण होते, असे संघटनेचे म्हणणे आहे. म्हणूनच मुंबई महापालिकेने एनएचएम आणि बीएमसी आशा सेविकांसाठी तातडीने भरीव बोनस जाहीर करावा, अशी मागणी करण्यात आली आहे.

महापालिकेने लवकर निर्णय घेतला नाही, तर ऐन दिवाळीत महापालिकेसमोर 'भीक मांगो' आंदोलन केले जाईल, असा इशारा सीटू संलग्न आशा युनियनने दिला आहे.