कशेडी-लोटे महामार्गावर नऊ महिन्यांत ४० अपघात, १२ मृत्यू; ब्लॅक स्पॉटवर उपाययोजना नाहीत

कोट्यवधी रुपये खर्च करून मुंबई-गोवा महामार्गाचे चौपदरीकरण पूर्ण झाले, तेव्हा प्रवास वेगवान आणि आरामदायी होईल अशी अपेक्षा होती. पण कशेडी घाट ते लोटे या सुमारे ३० किलोमीटरच्या टप्प्याने वाहनचालकांसाठी वेगळेच रूप धारण केले आहे. अवघ्या नऊ महिन्यांत या मार्गावर तब्बल ४० अपघात झाले असून त्यात १२ जणांचा जीव गेला आहे, तर ३० हून अधिक जण जखमी झाले आहेत. एवढे होऊनही प्रशासनाची यंत्रणा हलत नसल्याने संताप वाढत चालला आहे.

या मार्गावर चार ठिकाणे विशेष धोकादायक ठरत आहेत - कशेडी बोगदा, खवटी वळण, जगबुडी पूल आणि लोटे फाटा. या चारही ठिकाणी आवश्यक त्या सुरक्षा उपाययोजना अजूनही केलेल्या नाहीत. सतत अपघात होत असतानाही हे 'ब्लॅक स्पॉट' केवळ कागदावरच राहिले आहेत का, असा प्रश्न विचारला जात आहे.

कशेडी बोगद्यातून वाहतूक वेगाने होत असली तरी पावसाळ्यात बोगद्याच्या आत पाणी वाहणे, गळती लागणे आणि रस्ता निसरडा होणे यामुळे मोठा धोका निर्माण होतो. आतील लाईटिंग आणि घसरणरोधक उपाययोजना पुरेशा नसल्याने विशेषतः दुचाकीस्वारांना हा टप्पा जीवघेणा ठरत आहे. काही दिवसांपूर्वी बोगद्यातील अनेक दिवे बंद असल्याचेही समोर आले होते.

खवटी येथील रेल्वे पुलाजवळचे तीव्र वळणही अपघातप्रवण बनले आहे. तिथे दिशादर्शक फलक, ब्लिंकर आणि इतर सावधगिरीच्या उपाययोजना नसल्याने चालकांना वळण अचानक समोर येते आणि अंदाज चुकतो. यामुळे या ठिकाणी अपघातांची मालिका थांबलेली नाही.

जुलै आणि ऑगस्ट महिन्यात जगबुडी पुलावरून नियंत्रण सुटलेले अवजड कंटेनर थेट नदीपात्रात कोसळल्याच्या घटना घडल्या होत्या. त्यानंतर तरी प्रशासनाने धडा घेऊन ठोस पावले उचलणे अपेक्षित होते. पण धोकादायक ठिकाणी मजबूत क्रॅश बॅरिअर्स उभारण्याचे काम अजूनही सुरू झालेले नाही. मोठा जीवघेणा अपघात झाल्यावरच प्रशासन जागे होणार का, असा सवाल यातून उपस्थित होतो.

गणेशोत्सव असो, दिवाळी असो, शिमगोत्सव असो किंवा कोकणवासीयांचा रोजचा प्रवास असो, या महामार्गावरील प्रवास असा रक्तरंजित होणे थांबायला हवे. नऊ महिन्यांत १२ बळी आणि ३० हून अधिक जखमी हा आकडा प्रशासनासाठी धोक्याची घंटा मानला जात आहे.

त्यामुळे कशेडी ते लोटे या संपूर्ण टप्प्याचे तातडीने सेफ्टी ऑडिट व्हावे आणि सर्व ब्लॅक स्पॉटवर शास्त्रोक्त पद्धतीने क्रॅश बॅरिअर्स, दिशादर्शक फलक, ब्लिंकर, पुरेशी लाईटिंग व घसरणरोधक उपाययोजना तातडीने कराव्यात, अशी मागणी जोर धरत आहे. आता केवळ पाहणी, बैठका आणि आश्वासनांचा फार्स नको, तर वाहनचालकांचा जीव वाचवण्यासाठी प्रत्यक्ष काम कधी सुरू होणार, याचे उत्तर प्रशासनाने द्यावे अशी अपेक्षा व्यक्त होत आहे.