खामेनी जिवंत आणि ठणठणीत, मी स्वतः ७ तास त्यांच्याशी बोललो - इराणचे अध्यक्ष पेझेश्कियान यांचा दावा

इराण आणि इस्रायल-अमेरिका यांच्यातलं लष्करी टेन्शन गेल्या काही महिन्यांपासून वाढतच चाललंय. याच काळात इराणचे सर्वोच्च नेते मोजतबा खामेनी यांच्या तब्येतीबद्दल आणि ते खरंच जिवंत आहेत की नाही याबद्दल जगभर वेगवेगळ्या चर्चा सुरू होत्या. अमेरिकन आणि इस्रायली मीडियाने तर थेट दावा केला होता की मोजतबा खामेनी खूप गंभीर आजारी आहेत आणि त्यांच्या शरीरातले महत्त्वाचे अवयवसुद्धा निकामी झालेत. अमेरिकेचे अध्यक्ष डोनाल्ड ट्रम्प यांनीसुद्धा स्वतः मोजतबा यांच्या तब्येतीवर शंका उपस्थित केली होती.

पण संयुक्त राष्ट्रांच्या महासभेसाठी (UNGA) न्यूयॉर्कला आलेल्या इराणचे अध्यक्ष मसूद पेझेश्कियान यांनी या सगळ्या अफवांना पूर्णविराम दिला. न्यूयॉर्कमध्ये आंतरराष्ट्रीय आणि अमेरिकन पत्रकारांशी बोलताना पेझेश्कियान यांनी मोजतबा खामेनी यांच्या तब्येतीबद्दल अधिकृतपणे माहिती दिली. ते म्हणाले, "बरोबर एक महिन्यापूर्वी मी इराणचे सर्वोच्च नेते मोजतबा खामेनी यांना प्रत्यक्ष जाऊन भेटलो होतो. त्यांची तब्येत एकदम उत्तम आहे आणि त्यांच्या शरीरातले सगळे महत्त्वाचे अवयव पूर्णपणे ठीक आहेत." पश्चिम आशियातल्या युद्धजन्य परिस्थितीत आणि अमेरिकेच्या दबावाच्या काळात इराणच्या सर्वोच्च नेतृत्वाबद्दल पसरवल्या जाणाऱ्या बातम्यांवर खुद्द इराणच्या अध्यक्षांनी दिलेलं हे स्पष्टीकरण खूप महत्त्वाचं मानलं जातंय.

पत्रकारांशी अधिक सविस्तर बोलताना पेझेश्कियान यांनी त्यांच्या भेटीचं वर्णन केलं. ते म्हणाले, "मी मोजतबा यांच्यासोबत जवळपास सात ते आठ तास सलग गप्पा मारल्या आहेत. आम्ही दोघेही एकाच ठिकाणी उशांवर बसून शांतपणे देशाच्या धोरणात्मक विषयांवर बोलत होतो. बोलता बोलता आम्ही एकत्र फिरायलासुद्धा गेलो. जो माणूस आठ तास सलग बसून इतक्या खोलवर विषयांवर बोलू शकतो, तो आजारी कसा असू शकतो?" असं म्हणत त्यांनी पाश्चात्य मीडियाचे दावे खोडून काढले. मोजतबा यांचे हात कापले गेलेत किंवा ते अंथरुणाला खिळून आहेत, या केवळ खोट्या अफवा आणि प्रोपगंडा आहे, असं पेझेश्कियान यांनी स्पष्ट केलं. "मी त्यांना स्वतः पाहिलं आहे, स्पर्श केला आहे आणि त्यांच्याशी बराच वेळ बोललो आहे," असं त्यांनी ठामपणे अमेरिकन पत्रकारांसमोर सांगितलं.

यानंतर पत्रकारांनी पेझेश्कियान यांना थेट प्रश्न विचारला की इराण अमेरिकेचे अध्यक्ष डोनाल्ड ट्रम्प यांची हत्या घडवून आणायचा प्रयत्न करतंय का. यावर पेझेश्कियान यांनी हा दावा पूर्णपणे फेटाळला. "इराण कधीच अशा प्रकारच्या राजकीय हत्यांचा विचार करत नाही. ती आमची संस्कृतीच नाही. पण अमेरिकेने मात्र इराणच्या सर्वोच्च नेतृत्वाला टार्गेट करायचा विचार नक्कीच केला आणि आम्हाला युद्धात ढकललं," असा थेट आरोप त्यांनी अमेरिकेवर केला. अमेरिकेने केलेल्या लष्करी कारवाया आणि आर्थिक निर्बंधांमुळे इराणचं मोठं नुकसान झालंय आणि पुढेही अमेरिका जास्त नुकसान करू शकते, याची जाणीव इराणला आहे, असंही त्यांनी सांगितलं. पण कितीही अवघड परिस्थिती आली तरी इराणची जनता आणि नेतृत्व वॉशिंग्टनच्या दडपशाहीपुढे कधीच झुकणार नाही, असा इशाराही पेझेश्कियान यांनी दिला.

इराणचे आधीचे सर्वोच्च नेते अयातुल्ला अली खामेनी यांच्या निधनानंतर मार्च महिन्यात मतदानाचा अधिकार असलेल्या ५० धार्मिक नेत्यांच्या समितीने मोजतबा खामेनी यांची इराणचे नवे सर्वोच्च नेते म्हणून निवड केली होती. पण सुरक्षेच्या कारणामुळे सूत्रं हातात घेतल्यापासून मोजतबा सार्वजनिकरीत्या कुठेच दिसले नाहीत आणि पूर्णपणे भूमिगत राहिले. अमेरिकन गुप्तचर यंत्रणा सीआयए (CIA) किंवा इस्रायली गुप्तचर यंत्रणा मोसाद यांनाही अजून मोजतबा नेमके कुठे आहेत याचा कुठलाही ठोस सुगावा लागलेला नाही. तरीही इराणच्या सगळ्या महत्त्वाच्या लष्करी, राजकीय आणि आर्थिक निर्णयांवर अंतिम शिक्कामोर्तब मोजतबा यांचंच होत असतं. सोशल मीडिया आणि अधिकृत मीडियातून त्यांच्या नावाने नियमित निवेदनं जारी होत असतात. पेझेश्कियान यांच्या या वक्तव्यामुळे मोजतबा खामेनी यांच्या तब्येतीबद्दल उठलेलं संशयाचं वादळ आता शांत होण्याची शक्यता निर्माण झाली आहे.