मावळच्या उपजिल्हा रुग्णालयात सुविधांची वानवा, नागरिकांची तक्रार

मावळ तालुक्यात एमआयडीसी, रिंग रोड आणि इतर मोठे प्रकल्प वेगाने पुढे जात आहेत. औद्योगिकीकरणामुळे तालुक्याचा विस्तार होत आहे आणि मोठ्या कंपन्या तसेच विविध प्रकल्प तिथे उभे राहत आहेत. पण या वेगाच्या तुलनेत नागरिकांना लागणाऱ्या आरोग्य सुविधा अपेक्षित प्रमाणात वाढलेल्या नाहीत, अशी स्थिती आहे. म्हणूनच मावळ तालुक्यातील आरोग्य विभागाचा कारभार रामभरोसे आहे का, असा सवाल नागरिक विचारत आहेत.

शासनाच्या माध्यमातून मावळ तालुक्यात उपजिल्हा रुग्णालय सुरू करण्यात आले. मोठा निधी खर्च करून उभारलेल्या या रुग्णालयामुळे तालुक्यातील लोकांना अत्याधुनिक आणि परवडणाऱ्या आरोग्य सुविधा मिळतील, अशी अपेक्षा होती. मात्र रुग्णालय सुरू होऊन बराच काळ लोटला तरी काही महत्त्वाच्या वैद्यकीय सुविधा पूर्ण क्षमतेने मिळत नसल्याच्या तक्रारी नागरिक करत आहेत.

डायलिसिस, हृदयविकारावरचे उपचार, अत्यावश्यक निदान सुविधा, तज्ज्ञ डॉक्टर, गरजेची वैद्यकीय उपकरणे आणि इतर उपचार सुविधा पूर्ण क्षमतेने उपलब्ध करून द्याव्यात, अशी मागणी होत आहे. गंभीर आजारांवरच्या उपचारांसाठी लागणाऱ्या सुविधा गावातच मिळत नसल्याने अनेक रुग्णांना पुणे, पिंपरी-चिंचवड किंवा इतर मोठ्या शहरांतील रुग्णालयांत जावे लागते, असे नागरिकांचे म्हणणे आहे.

सरकारी रुग्णालयात सुविधा नसल्याने गरीब आणि मध्यमवर्गीय रुग्णांना खासगी रुग्णालयांकडे धाव घ्यावी लागते. गंभीर आजारांवरचे उपचार, विविध तपासण्या, स्कॅनिंग आणि वैद्यकीय प्रक्रियांसाठी मोठा खर्च येतो आणि त्याचा बोजा अनेक कुटुंबांवर पडत आहे. विशेषतः एमआरआय, डायलिसिस, हृदयविकाराशी संबंधित तपासण्या आणि इतर महागड्या तपासण्या व उपचारांच्या शुल्काबद्दल रुग्ण आणि त्यांचे नातेवाईक गंभीर तक्रारी करत आहेत. उपचाराची गरज असलेल्या रुग्णाला खर्चाचा विचार करून उपचार पुढे ढकलणे शक्य नसते.

त्यामुळे आर्थिक स्थिती कमकुवत असलेल्या कुटुंबांना कर्ज काढावे लागते, उधार पैसे घ्यावे लागतात किंवा बचत खर्च करावी लागते, असे नागरिक सांगतात. काही रुग्णांच्या मते मोठ्या तपासण्या आणि दीर्घकाळ चालणाऱ्या उपचारांचा खर्च सामान्य कुटुंबांच्या आवाक्याबाहेर जात आहे. त्यामुळे खासगी आरोग्यसेवेवरचा खर्च आणि त्यातली पारदर्शकता हा प्रश्नही चर्चेत आला आहे. खासगी रुग्णालयांत आकारल्या जाणाऱ्या शुल्काबाबतच्या नियमांचे पालन होते की नाही, याची आरोग्य प्रशासनाने तपासणी करावी, अशी नागरिकांची मागणी आहे.

"सरकारी रुग्णालयात सुविधा उपलब्ध नाहीत आणि खासगी रुग्णालयातील उपचार परवडत नाहीत, तर सर्वसामान्य रुग्णांनी जायचे कुठे?" असा सवाल नागरिक करत आहेत.

उपजिल्हा रुग्णालयाच्या उद्घाटनाला अनेक लोकप्रतिनिधी आणि मान्यवर हजर होते. वरिष्ठ नेत्यांच्या उपस्थितीत उद्घाटन झाल्याने लोकांच्या अपेक्षा खूप वाढल्या होत्या. आरोग्य विभागातील वरिष्ठ अधिकारी आणि आरोग्यमंत्र्यांनीही रुग्णालयाला भेट दिल्याचे सांगितले जाते. तरीही उद्घाटनानंतर गरजेच्या सुविधा पूर्ण क्षमतेने मिळत नसतील, तर त्या कधी मिळणार आणि नागरिकांनी आणखी किती वाट पाहायची, असा प्रश्न विचारला जात आहे.

मावळ तालुक्यात औद्योगिक आणि पायाभूत विकासाचा वेग वाढत आहे. एमआयडीसी, रिंग रोड आणि इतर मोठ्या प्रकल्पांमुळे पुढच्या काळात तालुक्याची लोकसंख्या आणि औद्योगिक क्षेत्र आणखी वाढण्याची शक्यता आहे. त्यामुळे आरोग्य सुविधांवरही जास्त ताण येईल. म्हणून उपजिल्हा रुग्णालयात गरजेचे डॉक्टर, तज्ज्ञ वैद्यकीय अधिकारी, परिचारिका, तांत्रिक कर्मचारी, अत्याधुनिक उपकरणे आणि निदान सुविधा तातडीने उपलब्ध करून देण्याची गरज असल्याचे नागरिकांचे म्हणणे आहे.

खासगी रुग्णालयांत उपचार आणि तपासणीसाठी आकारल्या जाणाऱ्या शुल्कात पारदर्शकता असावी, शासनाच्या नियमांचे पालन होते की नाही हे तपासावे आणि रुग्णांच्या तक्रारींसाठी प्रभावी यंत्रणा उभी करावी, अशीही नागरिकांची मागणी आहे. मावळचा विकास फक्त रस्ते, उद्योग आणि पायाभूत सुविधांपुरता न राहता लोकांना दर्जेदार, सोपी आणि परवडणारी आरोग्यसेवा मिळणेही तितकेच महत्त्वाचे आहे. त्यामुळे आरोग्य प्रशासनाने मावळ तालुक्यातील आरोग्य व्यवस्थेचा तातडीने आढावा घेऊन गरजेच्या सुविधा सुरू कराव्यात, अशी जोरदार मागणी नागरिक करत आहेत.