पावसाची उघडीप, ऑक्टोबरच्या सुरुवातीलाच उन्हाचे चटके; कोकणात सरींची शक्यता

ऑक्टोबरच्या सुरुवातीपासूनच महाराष्ट्रातील हवामानात मोठे बदल जाणवू लागले आहेत. मान्सूनचा हंगाम संपल्यानंतर राज्यातील अनेक भागांत पावसाने उघडीप घेतली आहे आणि काही ठिकाणी तापमान वाढत आहे. सप्टेंबरअखेर राज्यात सरासरीपेक्षा कमी पाऊस झाला, त्यामुळे अनेक भागांत पावसाची तूट निर्माण झाली आहे. शेतीसमोरची आव्हाने वाढली असून ऑक्टोबरच्या सुरुवातीलाच नागरिकांना उन्हाचे चटके बसू लागले आहेत.

कोकणात 2 ऑक्टोबर रोजी काही भागांत हलक्या ते मध्यम पावसाच्या सरी पडण्याची शक्यता आहे. पालघर, ठाणे आणि मुंबई परिसरात काही ठिकाणी हलका पाऊस होऊ शकतो. त्यामुळे मुंबई आणि उपनगरांत अधूनमधून ढगाळ वातावरण राहण्याची शक्यता आहे. रायगड, रत्नागिरी आणि सिंधुदुर्ग जिल्ह्यांत काही ठिकाणी मेघगर्जनेसह सरी पडू शकतात. मात्र संपूर्ण कोकणात मुसळधार पाऊस पडण्याची शक्यता सध्या दिसत नाही. काही भाग वगळता हवामान प्रामुख्याने कोरडे राहील, असा अंदाज आहे.

उत्तर महाराष्ट्रात अनेक ठिकाणी अंशतः ढगाळ, पण प्रामुख्याने कोरडे हवामान राहण्याचा अंदाज आहे. पावसाची तूट कायम असल्याने शेतकऱ्यांची चिंता वाढली आहे. येत्या काही दिवसांतही पावसाची उघडीप राहिली, तर त्याचा शेतीवर परिणाम होण्याची शक्यता आहे.

पश्चिम महाराष्ट्रात अहिल्यानगर, पुणे, सातारा, सांगली आणि कोल्हापूर परिसरात काही ठिकाणी हलक्या सरी पडू शकतात. पण मोठ्या पावसाचा इशारा सध्या नसल्याने बहुतांश भागांत उष्ण आणि दमट वातावरण राहण्याची शक्यता आहे. दिवसा तापमान वाढल्यास 'ऑक्टोबर हिट'चा अनुभव अधिक तीव्र होऊ शकतो.

मराठवाड्यात छत्रपती संभाजीनगर, जालना, परभणी, बीड, हिंगोली, नांदेड, लातूर आणि धाराशिव जिल्ह्यांत पावसाने उघडीप घेतली आहे. या भागासाठी सध्या मोठ्या पावसाचा इशारा नाही. काही ठिकाणी ढगाळ वातावरण राहील, पण उष्णता आणि दमटपणा जाणवण्याची शक्यता आहे. तापमान वाढल्यास शेतीबरोबरच नागरिकांनाही उकाड्याचा त्रास होऊ शकतो.

विदर्भातही पावसाचा जोर कमी झाला आहे. अकोला, अमरावती, भंडारा, बुलढाणा, चंद्रपूर, गडचिरोली, गोंदिया, नागपूर आणि वाशिम या भागांत सध्या मोठ्या पावसाचा इशारा नाही. मागील काही दिवसांपासून पावसाने उघडीप घेतली असून पुढचे काही दिवस उष्ण हवामान राहण्याची शक्यता आहे.

2 ऑक्टोबरला कोकण आणि घाटमाथ्याच्या काही भागांत मेघगर्जनेसह सरी पडण्याची शक्यता असली, तरी राज्याच्या बहुतांश भागांत पावसाचा जोर कमी राहण्याचे संकेत आहेत. सप्टेंबरअखेरची पावसाची तूट आणि ऑक्टोबरच्या सुरुवातीपासून वाढणारी उष्णता यामुळे शेतकरी आणि नागरिकांसमोर वेगळी आव्हाने उभी राहिली आहेत.

आता पुढील काही दिवसांत परतीचा मान्सून कसा सक्रिय होतो, याकडे सर्वांचे लक्ष लागले आहे. स्थानिक पातळीवरील हवामानातील बदल लक्षात घेता नागरिक आणि शेतकऱ्यांनी हवामान विभागाच्या ताज्या सूचनांकडे लक्ष ठेवणे महत्त्वाचे ठरणार आहे.