नागपूरच्या मानकापूर स्पोर्ट्स हबचा खर्च वाढून 1,144 कोटींवर; पालकमंत्री बावनकुळे यांच्या अध्यक्षतेखाली आढावा

नागपूरच्या मानकापूर भागातील विभागीय क्रीडा संकुलात उभारण्यात येत असलेल्या नागपूर स्पोर्ट्स हबसह इतर विकासकामांचा सुधारित खर्च वाढून आता 1,144.36 कोटी रुपयांवर पोहोचला आहे. या प्रकल्पांतर्गत बांधण्यात येत असलेल्या 11 प्रेक्षागृहांचे सरासरी 44 टक्के काम आतापर्यंत पूर्ण झाले आहे.

या प्रकल्पाचा आढावा घेण्यासाठी पालकमंत्री चंद्रशेखर बावनकुळे यांच्या अध्यक्षतेखाली विभागीय क्रीडा संकुल कार्यकारी समितीची बैठक विभागीय आयुक्त कार्यालयात पार पडली. या बैठकीत बांधकामाच्या सद्यस्थितीबाबत तसेच पुढील टप्प्यातील कामांबाबत संबंधित अधिकाऱ्यांकडून सविस्तर माहिती घेण्यात आली.

प्रकल्पाचा सुधारित खर्च वाढण्यामागचे कारण अधिकाऱ्यांनी स्पष्ट केले. या संकुलात आंतरराष्ट्रीय दर्जाची वीज व्यवस्था उभारली जात असून, त्याचबरोबर सीसीटीव्ही यंत्रणा, सोलर सिस्टिम आणि ग्रीन बिल्डिंग प्रमाणीकरण यांसारख्या अतिरिक्त सुविधांचा समावेश या प्रकल्पात करण्यात आला आहे. यामुळेच खर्चात वाढ झाल्याचे बैठकीत सांगण्यात आले.

बैठकीत सांगण्यात आले की स्पोर्ट्स हबअंतर्गत नव्याने उभारण्यात येत असलेल्या 11 प्रेक्षागृहांचे सरासरी 44 टक्के बांधकाम आतापर्यंत पूर्ण झाले आहे. यापैकी स्पोर्ट्स कॅफेटेरियाचे काम सर्वाधिक पुढे गेले असून, त्याचे जवळपास 80 टक्के बांधकाम पूर्ण झाले आहे. याशिवाय आंतरराष्ट्रीय दर्जाच्या ऑलिम्पिक आकाराच्या जलतरण तलावाचे कामही सध्या सुरू आहे. संकुलातील झाडे वाचवण्यासाठी इमारतींच्या नकाशात आवश्यक ते बदल करण्यात आले असून, याबद्दल पालकमंत्र्यांनी समाधान व्यक्त केले.

बैठकीत जुन्या इनडोअर हॉलच्या आधुनिकीकरणाच्या प्रस्तावावरही सविस्तर चर्चा झाली. यामध्ये हॉलची दुरुस्ती, लाकडी फ्लोरिंग, वातानुकूलन यंत्रणा आणि अग्निशमन यंत्रणा बसवण्याबरोबरच 400 मीटरचा सिंथेटिक ट्रॅक आणि पॅव्हेलियन इमारत आधुनिक करण्याचा प्रस्ताव मांडण्यात आला. या सर्व कामांसाठी 91.88 कोटी रुपयांच्या प्रस्तावाला प्रशासकीय मंजुरी देण्याची प्रक्रिया सध्या सुरू आहे.

पालकमंत्री चंद्रशेखर बावनकुळे यांनी संकुलात दर्जेदार स्ट्रीट लाईट बसवण्याचे तसेच जास्तीत जास्त प्रमाणात सोलर ऊर्जा प्रणालीचा वापर करण्याचे निर्देश संबंधित अधिकाऱ्यांना दिले. तसेच बांधकामादरम्यान सुरक्षा मानकांची विशेष काळजी घेण्याच्या सूचनाही त्यांनी यावेळी दिल्या.

याशिवाय बैठकीत राज्य सरकारच्या मिशन लक्षवेध योजनेअंतर्गत विभागीय निपुणता केंद्र आणि स्पोर्ट्स सायन्स सेंटरला कार्योत्तर मंजुरी देण्याबाबत चर्चा झाली. तसेच बॅडमिंटनसाठी राज्यस्तरीय उच्चस्तरीय प्रशिक्षण केंद्र सुरू करण्याच्या प्रस्तावावरही या बैठकीत चर्चा करण्यात आली.