शिलाई मशीनसाठी १५ लाखांचा धनादेश; दुष्काळग्रस्त महिलांना स्वयंरोजगाराची संधी

दिवाळीचा सण साजरा करताना गरजू कुटुंबांच्या चेहऱ्यावरही आनंद दिसावा, या हेतूने मुंबईतील स्वदेशी दिवाळी उत्सवात काही सामाजिक उपक्रम राबवण्यात आले. दुष्काळग्रस्त महिलांना स्वतःच्या पायावर उभे राहता यावे, स्वयंरोजगाराची संधी मिळावी, म्हणून शिलाई मशीन वाटपासाठी १५ लाख रुपयांचा धनादेश देण्यात आला.

स्वदेशी दिवाळी उत्सव २०२६ च्या दुसऱ्या दिवशी दुष्काळग्रस्त महिलांना शिलाई मशीन वाटप करण्याच्या उपक्रमासाठी हा धनादेश इंडियन मर्चंट्स चेंबरच्या (IMC) माध्यमातून प्रदान करण्यात आला. शिवसेना प्रवक्त्या सुशीबेन शहा यांच्या प्रयत्नांतून हा उपक्रम पार पडला. या उपक्रमाची माहिती देताना महिलांना आर्थिकदृष्ट्या सक्षम करण्याचा निर्धार शहा यांनी व्यक्त केला.

महिलांना स्वतःचा व्यवसाय सुरू करता यावा, त्यातून नियमित उत्पन्न मिळावे आणि कुटुंबाला आर्थिक आधार देता यावा, हा या मदतीमागचा मुख्य उद्देश आहे. केवळ आर्थिक मदत देऊन थांबायचे नाही, तर महिलांना स्वावलंबी बनवण्याचा प्रयत्न आहे, असे शहा यांनी सांगितले.

शिलाई मशीनबरोबरच दुष्काळामुळे अडचणीत आलेल्या कुटुंबांना दिलासा मिळावा, म्हणून अन्नधान्य किट देण्याचाही उपक्रम हाती घेण्यात आला आहे. डॉ. श्रीकांत शिंदे फाउंडेशनच्या माध्यमातून हे किट उपलब्ध करून दिले जाणार आहेत. त्यासाठी स्त्री शक्ती केंद्राच्या वतीने धनादेश सुपूर्द करण्यात आला.

याबाबत बोलताना सुशीबेन शहा म्हणाल्या की, दुष्काळग्रस्त कुटुंबांच्या अडचणी लक्षात घेऊन त्यांना मदत करणे ही आपली जबाबदारी आहे. दिवाळीच्या आनंदात गरजू कुटुंबांचाही सहभाग असावा, हीच या उपक्रमामागची भावना आहे.

या उत्सवात भारतीय उत्पादनांचा वापर वाढवण्यावर भर देण्यात आला आहे. स्थानिक उद्योजक आणि महिला बचत गटांना बाजारपेठ मिळवून देणे, हाही उत्सवाचा एक उद्देश आहे. वेगवेगळ्या वस्तूंचे स्टॉल्स आणि कार्यशाळा उत्सवात आहेत आणि नागरिकांचा त्यांना उत्स्फूर्त प्रतिसाद मिळत आहे.

उत्सवाच्या पहिल्या दिवशी शिवसेना नेत्या मीनाताई कांबळी, सिद्धेश कदम, शीतल म्हात्रे, सुशांत शेलार, तृष्णा विश्वासराव, महाराष्ट्र भूषण सीमा सिंग, कला शिंदे, यामिनी जाधव आणि संध्या वढावकर यांनी उपस्थिती लावली.

दुसऱ्या दिवशी खासदार डॉ. श्रीकांत शिंदे, खासदार मिलिंद देवरा आणि मुंबईच्या महापौर रितू तावडे यांनी उत्सवाला भेट दिली. त्यांनी वेगवेगळ्या स्टॉल्सची पाहणी केली आणि उद्योजकांशी संवाद साधला. कार्यशाळांमध्ये सहभागी झालेल्या महिलांचेही त्यांनी कौतुक केले. या वेळी शिवसेना उपनेत्या शिल्पा देशमुख उपस्थित होत्या.