महाराष्ट्रात पुढील 4 दिवस मुसळधार पाऊस आणि विजांचा धोका, हवामान खात्याचा येलो अलर्ट, जाणून घ्या तुमच्या
मुंबई हवामान विज्ञान केंद्राने 22 ते 25 सप्टेंबर या काळात राज्यातील डझनभर जिल्ह्यांत मेघगर्जना, विजांचा कडकडाट आणि सोसाट्याच्या वाऱ्यासह पावसाची शक्यता वर्तवत येलो अलर्ट जारी केला आहे.
महाराष्ट्रातून मान्सून परतण्याआधी हवामानाने पुन्हा एकदा कूस बदलली आहे. मुंबई हवामान विज्ञान केंद्राने राज्यातील विविध भागांत पुढील चार दिवस मेघगर्जना, विजांचा कडकडाट आणि सोसाट्याच्या वाऱ्यासह पाऊस पडण्याची शक्यता वर्तवली आहे. ही परिस्थिती लक्षात घेऊन हवामान खात्याने राज्यातील डझनभर जिल्ह्यांत येलो अलर्ट जारी केला असून नागरिकांना सतर्क राहण्याचे आवाहन केले आहे.
हवामान खात्याच्या माहितीनुसार, मध्य महाराष्ट्र, कोकण, मराठवाडा आणि विदर्भातील अनेक भागांत या काळात जोरदार वारे वाहण्याबरोबरच आकाशातून वीज कोसळण्याचा मोठा धोका कायम राहणार आहे. म्हणजेच केवळ पाऊसच नव्हे, तर तुफानी वारे आणि विजांचा कडकडाट या तिन्ही गोष्टी एकाच वेळी या भागांत जाणवणार आहेत.
हवामान खात्याने दिवसनिहाय जिल्ह्यांची यादीच जाहीर केली आहे. 22 सप्टेंबर रोजी नाशिक, नाशिक घाट, अहिल्यानगर, ठाणे, रायगड, पुणे घाट, पुणे, सातारा, सातारा घाट, रत्नागिरी, सिंधुदुर्ग, कोल्हापूर, कोल्हापूर घाट, सांगली, सोलापूर, बीड, धाराशिव, लातूर, नांदेड, परभणी, हिंगोली, यवतमाळ, चंद्रपूर, वर्धा, नागपूर, गोंदिया, भंडारा आणि गडचिरोली या जिल्ह्यांना येलो अलर्ट देण्यात आला आहे.
23 सप्टेंबरसाठी नाशिक, नाशिक घाट, अहिल्यानगर, रायगड, पुणे घाट, पुणे, सातारा, सातारा घाट, रत्नागिरी, सिंधुदुर्ग, कोल्हापूर, कोल्हापूर घाट, सांगली, सोलापूर, बीड, धाराशिव, लातूर, नांदेड, जालना, परभणी, वाशिम, बुलढाणा, अकोला, हिंगोली, अमरावती, यवतमाळ, चंद्रपूर, वर्धा, नागपूर, गोंदिया, भंडारा आणि गडचिरोली जिल्ह्यांत येलो अलर्ट जाहीर करण्यात आला आहे. या दिवशी जालना आणि वाशिम, बुलढाणा, अकोला, अमरावती हे जिल्हेही यादीत नव्याने समाविष्ट झाले आहेत.
24 सप्टेंबर रोजी सातारा, सातारा घाट, सिंधुदुर्ग, कोल्हापूर, कोल्हापूर घाट, लातूर, नांदेड, जालना, परभणी, वाशिम, बुलढाणा, अकोला, हिंगोली, अमरावती, यवतमाळ, चंद्रपूर, वर्धा, नागपूर, गोंदिया, भंडारा आणि गडचिरोली या जिल्ह्यांना इशारा देण्यात आला आहे.
25 सप्टेंबरसाठी वाशिम, बुलढाणा, अकोला, हिंगोली, अमरावती, यवतमाळ, चंद्रपूर, वर्धा, नागपूर, गोंदिया, भंडारा आणि गडचिरोली जिल्ह्यांत येलो अलर्ट जारी करण्यात आला आहे. म्हणजेच 22 सप्टेंबरपासून सुरू झालेला हा इशारा 25 सप्टेंबरपर्यंत टप्प्याटप्प्याने पश्चिम महाराष्ट्र आणि मराठवाड्याकडून विदर्भाच्या दिशेने सरकत जाणार आहे.
या इशाऱ्याच्या पार्श्वभूमीवर स्थानिक प्रशासन आणि आपत्ती व्यवस्थापन विभागाने नागरिकांना विशेष खबरदारी घेण्याचे आवाहन केले आहे. वीज चमकत असताना सुरक्षित ठिकाणी थांबावे, असे सांगण्यात आले असून उघड्या मैदानात, झाडाखाली किंवा लोखंडी खांबांजवळ आसरा घेऊ नये, अशी स्पष्ट सूचना देण्यात आली आहे. पाऊस आणि विजांचा कडकडाट सुरू असताना टीव्ही, फ्रीज आणि मोबाईल चार्जिंगसारखी इलेक्ट्रॉनिक उपकरणे सावधगिरी म्हणून बंद ठेवावीत, असेही सांगण्यात आले आहे.
प्रवासादरम्यान घ्यायची काळजी म्हणून घाट भागांत आणि पाणी साचलेल्या रस्त्यांवरून प्रवास करताना गाडी चालवताना विशेष सावधानी बाळगावी, असेही प्रशासनाने स्पष्ट केले आहे. तसेच शेतकऱ्यांसाठी वेगळी सूचना देत, शेतांमध्ये कापून ठेवलेले पीक सुरक्षित ठिकाणी झाकून ठेवण्याचा सल्ला देण्यात आला आहे, जेणेकरून अचानक येणाऱ्या पावसामुळे पिकाचे नुकसान होऊ नये.
