वय अवघे १३, दहाव्याच वर्षी SAT मध्ये १६०० पैकी १५९० गुण; आता थेट मास्टर्सची तयारी

अमेरिकेतील लाँग आयलंडमध्ये राहणाऱ्या जो पेट्रारो-हायपोलाइट या १३ वर्षांच्या मुलाने आपल्या शैक्षणिक कामगिरीने सगळ्यांचे लक्ष वेधून घेतले आहे. साधारणपणे याच वयात मुले शाळेत माध्यमिक शिक्षण घेत असतात, पण जो आता पदव्युत्तर शिक्षणासाठी म्हणजेच मास्टर्ससाठी तयारी करतो आहे. त्याला न्यूयॉर्क विद्यापीठाच्या पदव्युत्तर अभ्यासक्रमात प्रवेश मिळाला असून तो २०२७ मध्ये हा कोर्स सुरू करणार आहे.

जोची खास गोष्ट म्हणजे त्याने वयाच्या अवघ्या दहाव्या वर्षी अमेरिकेतील एक महत्त्वाची प्रवेश परीक्षा असलेल्या एसएटीमध्ये १६०० पैकी तब्बल १५९० गुण मिळवले होते. ही परीक्षा कॉलेज प्रवेशासाठी अमेरिकेत खूप महत्त्वाची मानली जाते, आणि इतक्या लहान वयात इतके गुण मिळवणे ही सोपी गोष्ट नाही.

जोची आई अॅन पेट्रारो-हायपोलाइट यांनी आपल्या मुलाच्या या प्रवासाला विलक्षण असे म्हटले आहे. विशेष म्हणजे जोला याआधी स्पेशल एज्युकेशनच्या म्हणजे विशेष शिक्षणाच्या वर्गात ठेवण्यात आले होते. आज मात्र तो आपल्याच वयाच्या इतर मुलांपेक्षा कित्येक पावले पुढे निघून गेला आहे. अभ्यासाबरोबरच जो लाँग आयलंडमधील एका वृद्धाश्रमात स्वयंसेवक म्हणून कामही करतो. मोठा झाल्यावर जीवाश्मशास्त्रज्ञ म्हणजे फॉसिल्सचा अभ्यास करणारा शास्त्रज्ञ व्हायचे, असे त्याचे स्वप्न आहे. गंमत म्हणजे पदव्युत्तर शिक्षण पूर्ण झाल्यावर तो साधारण त्याच वयात मास्टर्सची पदवी हातात घेणार आहे, ज्या वयात बाकीची मुले फक्त गाडी चालवण्याचा कायदेशीर परवाना मिळवण्याच्या विचारात असतात.

पदवी शिक्षण पूर्ण झाल्यावर जो न्यूयॉर्क विद्यापीठात क्रीडा व्यवस्थापन या विषयात पदव्युत्तर शिक्षण घेणार आहे. यासोबतच त्याच्या अभ्यासात शरीरक्रियाशास्त्र आणि जीवशास्त्र या विषयांचाही समावेश आहे. इतक्या कमी वयात मास्टर्स करणाऱ्या विद्यार्थ्यांमध्ये तो नक्कीच वेगळा ठरेल. स्वतःच्या बुद्धिमत्तेबद्दल बोलताना जोने सांगितले की त्याचा बुद्ध्यांक १६८ इतका आहे. पण त्याने हेही स्पष्ट केले की त्याला सगळंच सहज जमतं असं नाही, कुठलीही गोष्ट शिकण्यासाठी त्याला एक-दोन वेळा प्रयत्न करावा लागतो, त्यानंतरच ती त्याच्या लक्षात राहते.

जोने अवघ्या ११व्या वर्षी आपले माध्यमिक शाळेचे शिक्षण पूर्ण केले होते. त्यानंतर त्याने लुईझियाना स्टेट युनिव्हर्सिटीमध्ये पुढच्या शिक्षणाला सुरुवात केली आणि सध्या तो तिथे पदवीचे शिक्षण पूर्ण करत आहे. त्याची पदवी मे २०२७ मध्ये पूर्ण होण्याची अपेक्षा आहे, त्यानंतर लगेचच तो न्यूयॉर्क विद्यापीठात मास्टर्ससाठी दाखल होणार आहे.