मध्य रेल्वेचा खोळंबा, प्रवासी रुळांवर; भांडुपमध्ये एसी लोकलच्या धडकेत तरुणाचा मृत्यू

आठवड्याच्या पहिल्याच दिवशी मध्य रेल्वेच्या लोकल वाहतुकीचा चांगलाच खोळंबा झाला. त्यात भांडुप रेल्वे स्टेशनवर एक दुर्दैवी घटना घडल्यामुळे प्रवाशांच्या अडचणी आणखी वाढल्या. रूळ ओलांडत असलेल्या साहिल थिटे या २१ वर्षांच्या तरुणाला एसी लोकलची धडक बसली आणि त्यात त्याचा मृत्यू झाला. या घटनेनंतर सगळीकडे हळहळ व्यक्त होत आहे.

सकाळी ९ वाजून २३ मिनिटांनी मुलुंड आणि ठाणे स्टेशनांच्या मध्ये डाउन स्लो मार्गावर ओव्हरहेड इक्विपमेंटच्या वायरमध्ये बिघाड झाल्याचे लक्षात आले. त्याचा थेट परिणाम रेल्वे वाहतुकीवर झाला. दुरुस्तीसाठी सकाळी १० वाजण्याच्या सुमारास वीजपुरवठा बंद करण्यात आला आणि अडकलेल्या तारा काढण्याचे काम सुरू झाले. या बिघाडामुळे मुंबईच्या दिशेने येणाऱ्या लोकल गाड्यांचे वेळापत्रकही कोलमडले.

अडचण फक्त वायरपुरतीच नव्हती. कांजूरमार्ग स्टेशनवरील सिग्नल यंत्रणेत तसेच विक्रोळी आणि भांडुप यांच्या दरम्यान तांत्रिक अडचणी निर्माण झाल्याचे सांगण्यात आले. त्यामुळे लोकल गाड्यांच्या संचालनावर परिणाम झाला. काही लोकल १५ ते ६० मिनिटे उशिराने धावत होत्या, तर विलंबामुळे प्रवाशांना एक ते दोन तासांपर्यंत त्रास सहन करावा लागला. गाड्या मध्येच थांबल्यामुळे काही प्रवासी मुलुंड आणि नाहूर यांच्या दरम्यान रुळांवरून चालत जाताना दिसत आहेत.

अशा गोंधळाच्या वेळीच भांडुप स्टेशनवर हा अपघात झाला. प्लॅटफॉर्म क्रमांक ३ वरून तरुण रेल्वे रूळ ओलांडत होता. त्याच वेळी मुंबईहून ठाणेमार्गे कल्याणच्या दिशेने जाणाऱ्या एसी लोकलने त्याला धडक दिली आणि त्यात त्याचा जीव गेला. घटनेची माहिती मिळताच रेल्वे पोलीस आणि संबंधित अधिकारी घटनास्थळी पोहोचले. मृत तरुणाची ओळख पटवण्याचा आणि त्याच्या घरच्यांशी संपर्क साधण्याचा प्रयत्न सुरू असल्याचे सांगण्यात आले.

ओव्हरहेड वायर आणि सिग्नल यंत्रणेतील तांत्रिक अडचणी दूर करण्यासाठी रेल्वे प्रशासनाने दुरुस्तीचे काम हाती घेतले आहे. मात्र बिघाड एकाच ठिकाणी नसून अनेक ठिकाणी झाल्यामुळे वाहतूक पूर्वपदावर येण्यास वेळ लागत असल्याची माहिती आहे. या उशिरामुळे ऑफिसला निघालेले कर्मचारी, विद्यार्थी आणि इतर प्रवाशांना मनस्ताप सहन करावा लागत आहे. सकाळच्या गर्दीच्या वेळी झालेल्या या गोंधळाचा फटका मुंबईतील अनेक प्रवाशांना बसला आहे.