कसारा मार्गावर ७ ते १८ ऑक्टोबरदरम्यान विशेष ब्लॉक; आसनगाव-कसारा दरम्यान लोकल सेवा बंद

रोज कसारा मार्गावरून प्रवास करणाऱ्यांसाठी महत्त्वाची बातमी आहे. आसनगाव-कसारा दरम्यान तिसऱ्या मार्गिकेचे काम सुरू करायचे आहे, तसेच कसारा 'अप' यार्ड मार्गिकेचा विस्तारही करायचा आहे. या कामांसाठी मध्य रेल्वेवर ७ ते १८ ऑक्टोबरदरम्यान विशेष ब्लॉक घेतला जाणार आहे. त्यामुळे या मार्गावरील लोकल सेवांच्या वेळांत मोठे बदल होणार आहेत.

या ब्लॉकचा फटका नाशिकमार्गे मुंबईकडे येणाऱ्या आणि मुंबईहून कसाऱ्याच्या दिशेने जाणाऱ्या अनेक मेल गाड्यांना बसणार आहे. काही गाड्यांना इगतपुरी येथून रेगूलेट केले जाईल, तर काही गाड्या खर्डी आणि आटगाव येथे थांबवल्या जातील.

या काळात प्री-नॉन-इंटरलॉकिंग, नॉन-इंटरलॉकिंग आणि पोस्ट-नॉन-इंटरलॉकिंगसारखी अनेक कामे केली जाणार आहेत. माहितीनुसार, ब्लॉकमुळे आसनगाव आणि कसारा दरम्यानच्या सेवा उपलब्ध राहणार नाहीत. त्यामुळे काही गाड्यांच्या वेळा बदलल्या जातील आणि काही गाड्या रद्द केल्या जातील. रोज रेल्वेने प्रवास करणाऱ्या हजारो प्रवाशांची या काळात तारांबळ उडणार आहे.

७ ऑक्टोबरला ब्लॉक सुरू होण्यापूर्वी सीएसटीहून कसाऱ्याकडे जाणारी शेवटची लोकल दुपारी १२.३० वाजता सुटेल. त्याच दिवशी कसाऱ्याहून सीएसटीकडे जाणारी ब्लॉकपूर्वीची शेवटची लोकल दुपारी २.४२ वाजता निघेल. ब्लॉक संपल्यानंतर सीएसटीहून कसाऱ्यासाठी पहिली लोकल सायंकाळी ६.२८ वाजता सुटेल, तर कसाऱ्याहून सीएसटीसाठी पहिली लोकल रात्री ८.३५ वाजता सुटेल. ८ आणि ९ ऑक्टोबरलाही लोकलच्या वेळापत्रकात बदल करण्यात आले आहेत. ब्लॉकपूर्वीच्या तसेच ब्लॉकनंतरच्या फेऱ्यांच्या वेळाही बदलणार आहेत.

मध्य रेल्वेच्या म्हणण्यानुसार, आसनगाव आणि कसारा दरम्यानचे हे काम कल्याणच्या तिसऱ्या आणि चौथ्या मार्गिकेच्या प्रकल्पाचा एक भाग आहे. मार्गिकेचे काम पूर्ण झाल्यानंतर मेल-एक्सप्रेस आणि उपनगरी गाड्यांची वाहतूक स्वतंत्र करायला मोठी मदत होणार आहे. त्यामुळे रेल्वे मार्गाची क्षमता वाढेल आणि अतिरिक्त गाड्यांची वाहतूक अधिक सुरळीत होण्यास मदत होईल.

लांब पल्ल्याच्या गाड्यांच्या वेळाही बदलण्याची शक्यता आहे. मुंबईकडे जाणाऱ्या आणि मुंबईकडून येणाऱ्या अशा या गाड्यांपैकी एलटीटी-बनारस, एलटीटी-पाटलीपुत्र, सीएसटी-अमृतसर, सीएसटी-बनारस महानगरी आणि एलटीटी-कुशीनगर एक्स्प्रेस यांच्या वेळा बदलण्यात आल्या आहेत. गोरखपूर-एलटीटी, पुष्पक एक्स्प्रेस, अयोध्या कँट-एलटीटी, बलिया-दादर आणि ज्ञानेश्वरी एक्स्प्रेस या गाड्या ब्लॉकदरम्यान इगतपुरी येथून रेगूलेट केल्या जाणार आहेत. भुसावळ विभागातूनही काही गाड्या रेगूलेट केल्या जातील. ब्लॉकदरम्यान गाड्यांना उशीर होण्याची शक्यता वर्तवली जात आहे, त्यामुळे नियमित प्रवाशांची गैरसोय होऊ शकते.