नागपूरमध्ये घरात घुसून दरोडा घालणाऱ्या एका आरोपीचा मृत्यू, पोलीस म्हणतात मारहाणीचा पुरावा नाही

नागपूरमध्ये दिवसाढवळ्या एका घरात घुसून दरोडा घालणाऱ्या दोघांपैकी एकाचा नंतर संशयास्पद मृत्यू झाला आहे. बेलतरोडी पोलीस ठाण्याच्या हद्दीतील मॉडेल मिल कॉलोनीत धार्मिक कुटुंबीयांच्या घरी काल, म्हणजे 29 सप्टेंबरला दुपारी ही घटना घडली. दोन चोरट्यांनी हा दरोडा घातल्याचे सांगितले जात आहे.

त्या वेळी घरात फक्त सासू उषा धार्मिक आणि त्यांची सून प्रणाली धार्मिक या दोघीच होत्या. आपण झोमॅटो डिलिव्हरी बॉय आहोत, असा भास निर्माण करून दोघे चोरटे घरात घुसले. आधी त्यांनी उषा धार्मिक यांच्यासोबत धक्काबुक्की केली आणि चाकूचा धाक दाखवला. त्यानंतर अंगावरील दागिन्यांची मागणी केली.

आरडाओरडा ऐकून आतल्या खोलीतून सून बाहेर आली. तिलाही एका चोरट्याने चाकू दाखवून मौल्यवान ऐवज देण्यास सांगितले. पण सुनेने प्रसंगावधान राखले. ती लगेच आतल्या खोलीत गेली आणि दार आतून लावून घेतले. त्यानंतर तिने शेजाऱ्यांना फोन करून घरात चोर घुसल्याची माहिती दिली. तोपर्यंत चोरट्यांनी सासूच्या अंगावरील सोन्याचे दागिने हिसकावून घराबाहेर पळ काढला होता.

काही मिनिटांनी चोरांचा शोध घेणाऱ्या स्थानिक नागरिकांना कपडे बदललेले दोन संशयित परिसरातून जाताना दिसले. त्यापैकी एकाला नागरिकांनी पकडून विचारपूस केली. त्याने उडवाउडवीची उत्तरे दिल्यामुळे नागरिकांचा संशय आणखी बळावला. मग पोलिसांना बोलावण्यात आले. पोलिसांनी त्याला ताब्यात घेतले आणि आधी पोलीस स्टेशनला नेले. तिथे त्याला अस्वस्थ वाटू लागल्यामुळे शासकीय वैद्यकीय रुग्णालयात नेण्यात आले, पण डॉक्टरांनी त्याला मृत घोषित केले. मृत आरोपीचे नाव सुमेध गजभिये असे असून तो यापूर्वीही चोरीच्या गुन्ह्यात सहभागी असल्याची पोलिसांकडे नोंद आहे.

जमावाच्या मारहाणीत त्याचा मृत्यू झाला, अशी चर्चा सुरू झाली होती. पोलिसांनी ही चर्चा फेटाळली असून प्राथमिक दृष्टीने आरोपीचा मृत्यू नैसर्गिक असण्याची शक्यता वर्तवली आहे. सध्या पोलिसांनी या प्रकरणी आकस्मिक मृत्यूची नोंद केली आहे.

पोलिसांचा दावा आहे की, आरोपीला ताब्यात घेतले तेव्हा त्याच्या अंगावर कोणतीही स्पष्ट जखम दिसली नाही. घटनास्थळावरील सीसीटीव्ही फुटेजमध्येही त्याला मारहाण झाल्याचे आढळले नाही, असेही पोलिसांचे म्हणणे आहे. प्राथमिक चौकशीत आरोपीने चोरी केल्याची कबुली दिली, अशी पोलिसांची माहिती आहे. मृत्यूचे नेमके कारण शवविच्छेदन अहवाल मिळाल्यानंतर स्पष्ट होणार आहे.

दरम्यान, स्थानिक नगरसेवकाने असा दावा केला आहे की नागरिकांनी चोरट्याला पकडून आपले कर्तव्य बजावले. पकडताना काहींनी त्याला मारहाण केली असली, तरी पोलिसांच्या स्वाधीन करेपर्यंत तो शुद्धीवर होता आणि त्याची स्थिती चांगली होती, असे नगरसेवकाचे म्हणणे आहे. मृत्यू कसा झाला हे पोलिसांच्या तपासातून समोर येईल. नागरिकांनी अफवांवर विश्वास ठेवू नये, असे आवाहन पोलिसांनी केले आहे.