लावाच्या स्मार्टफोनच्या किमती 3 हजार रुपयांपर्यंत वाढणार, 15 नोव्हेंबर 2026 पासून नवीन दर

लावा कंपनीने आपल्या स्मार्टफोनच्या किमती वाढवण्याची घोषणा केली आहे. सैमसंग, विवो, ओप्पो यांसारख्या टेक कंपन्यांनंतर आता लावानेही हे पाऊल उचलले आहे. कंपनीने आपल्या स्मार्टफोन पोर्टफोलिओमधील किमतींत होणाऱ्या आगामी बदलांची माहिती दिली असून, त्यामुळे स्मार्टफोन वापरणाऱ्या ग्राहकांना धक्का बसला आहे. ग्लोबल मेमरी सप्लाईमध्ये येत असलेल्या अडचणींमुळे कंपनीने हा निर्णय घेतल्याचे सांगितले जात आहे.

कंपनीने दिलेल्या माहितीनुसार, स्मार्टफोनच्या किमतीत 3 हजार रुपयांपर्यंत वाढ केली जाणार आहे. या नवीन किमती 15 नोव्हेंबर 2026 पासून लागू होतील. म्हणजेच आत्ताच्या किमतीत लावाचा स्मार्टफोन घ्यायचा असेल, तर ग्राहकांकडे 15 नोव्हेंबरपर्यंतच वेळ आहे. त्यानंतर फोन घेताना त्यांना जास्तीचे पैसे मोजावे लागणार आहेत.

सेमीकंडक्टर आणि घटकांच्या पुरवठा साखळीत मेमरी मॉड्यूल्सची कमतरता दिसून येत आहे. त्याचा परिणाम मूळ उपकरण उत्पादकांच्या (ओरिजिनल इक्विपमेंट मॅन्युफॅक्चरर्स) खरेदी खर्चावर झाला आहे. लावाचे म्हणणे असे आहे की, हा बदल उद्योगातील व्यापक परिस्थितीचे प्रतिबिंब आहे, जिथे हार्डवेअर इनपुटच्या किमती वाढल्या आहेत.

ही घोषणा सध्याच्या सणासुदीच्या खरेदीच्या हंगामात झाली आहे. या काळात प्रमुख किरकोळ विक्री केंद्रे सहसा ग्राहक इलेक्ट्रॉनिक्स वस्तूंवर प्रमोशनल डिस्काऊंट देत असतात. अशा वेळी किमती वाढण्याची बातमी आल्याने ग्राहकांचे लक्ष तिकडे गेले आहे.

कंपनीने स्पष्ट केले आहे की, उपलब्ध असलेला साठा मुदत संपेपर्यंत आधी ठरवलेल्या सवलतीच्या दरांवरच विकला जाईल. मात्र कोणत्या स्मार्टफोनची किंमत किती रुपयांनी वाढणार, याची अचूक माहिती कंपनीने अजून जाहीर केलेली नाही. त्यामुळे नवीन किमतींसाठी ग्राहकांना थोडी वाट पाहावी लागणार आहे.

या घोषणेबद्दल लावाने सांगितले, "मेमरीच्या सततच्या कमतरतेमुळे आमच्या स्मार्टफोन पोर्टफोलिओच्या किमतींमध्ये 3,000 रुपयांपर्यंत वाढ करणे आवश्यक झाले आहे." हा बदल 15 नोव्हेंबर 2026 पासून लागू केला जाणार आहे. कंपनीच्या म्हणण्यानुसार, डिव्हाईस अपग्रेड करण्याची योजना असेल तर ग्राहकांसाठी 15 नोव्हेंबर 2026 पर्यंत उत्तम संधी आहे. कारण सध्या सणानिमित्त कंपनीची उत्पादने प्रमुख ई-कॉमर्स प्लॅटफॉर्मवर आणि ऑफलाइन किरकोळ विक्री नेटवर्कवर विशेष किमतींत मिळत आहेत. किमतींतील हा बदल लागू होण्यापूर्वीच ग्राहकांनी सुरू असलेल्या ऑफर्सचा लाभ घ्यावा, म्हणजे नंतर नवीन उत्पादने खरेदी करताना त्यांना जास्तीचे पैसे मोजावे लागणार नाहीत, असेही कंपनीने म्हटले आहे.