लातूर लोखंड लाईन परिसरात भीषण आग; स्फोटात चार ते सहा दुकाने भस्मसात

लातूर शहरातील लोखंड लाईन भागात सोमवारी एका वायरच्या दुकानात भीषण आग लागल्याची घटना घडली. प्राथमिक माहितीनुसार शॉर्ट सर्किटमुळे दुकानात मोठा स्फोट झाला आणि त्यानंतर आग वेगाने पसरली. आगीची तीव्रता इतकी जास्त होती की जवळपासची चार ते सहा दुकानेही या आगीत भस्मसात झाली. मूळ दुकानापासून सुरू झालेली ही आग बघता बघता शेजारच्या दुकानांपर्यंत पसरली आणि संपूर्ण परिसर आगीच्या भक्ष्यस्थानी सापडला.

या घटनेमुळे परिसरात भीतीचे वातावरण पसरले. माहिती मिळताच अग्निशमन दलाचे जवान तातडीने घटनास्थळी दाखल झाले आणि आग विझवण्यासाठी शर्थीचे प्रयत्न सुरू केले. आगीचे नेमके कारण अद्याप स्पष्ट झालेले नाही, पण या आगीमुळे दुकानांचे मोठे नुकसान झाल्याचे सांगण्यात येत आहे. आग नेमकी कशामुळे लागली याबाबत अद्याप कोणतीही अधिकृत माहिती समोर आलेली नाही.

लोखंड लाईन परिसरातील एका दुकानाला आग लागल्यानंतर काही वेळातच परिसरात आगीचे लोटच्या लोट पसरले, त्यामुळे काही काळ स्थानिक नागरिकांमध्ये भीतीचे वातावरण निर्माण झाले. स्थानिक नागरिकांच्या म्हणण्यानुसार, दुकानात वेल्डिंगचे काम सुरू असल्यामुळे ही आग लागली असावी. यासोबतच लोखंड लाईन परिसरात स्टिलची दुकाने मोठ्या प्रमाणात असल्यामुळेही आग लागली असावी, असा अंदाज वर्तवला जात आहे. दुकानांमध्ये पेट्रोबेस केमिकल असल्यामुळेही आग भडकली असण्याची शक्यता वर्तवली जात आहे. या परिसरात स्टिलच्या दुकानांची संख्या मोठी असल्याने आग इतक्या वेगाने पसरली असावी, असेही स्थानिकांचे म्हणणे आहे.

आग लागल्याची माहिती मिळताच अग्निशमन दलाचे जवान तात्काळ घटनास्थळी पोहोचले आणि आग आटोक्यात आणण्यासाठी प्रयत्न सुरू केले. घटनास्थळी मोठ्या प्रमाणात नागरिकांची गर्दी जमली होती. मात्र अग्निशमन दल आणि पोलिसांनी परिसर सील करून बचावकार्य आणि सुरक्षेची जबाबदारी पार पाडली. गर्दी नियंत्रणात ठेवत बचावकार्य सुरळीत व्हावे यासाठी पोलिसांनी परिसराभोवती बंदोबस्त ठेवला.

लातूर शहरातील लोखंड लाईन परिसरात लागलेल्या या आगीत कोणत्याही प्रकारची जीवितहानी झालेली नाही, ही एक दिलासादायक बाब आहे. मात्र आगीमुळे दुकानांचे मोठ्या प्रमाणात नुकसान झाले असून दुकानांमधील संपूर्ण सामान जळून राख झाले आहे. या घटनेमुळे स्थानिक दुकानदारांचे मोठे आर्थिक नुकसान झाले आहे. जीवितहानी टळली असली तरी दुकानदारांचे आर्थिक नुकसान मोठे असल्याचे सांगण्यात येत आहे.