कोरेगावच्या दोघा तरुणांकडून विराट-अनुष्काने घेतल्या मधमाशांच्या ५० पेट्या

सातारा जिल्ह्यातील कोरेगाव तालुक्यातल्या दोन होतकरू तरुणांच्या मधमाशी पालनाच्या व्यवसायाची दखल थेट भारतीय क्रिकेट संघाचा माजी कर्णधार विराट कोहली यांनी घेतली आहे. कोरेगावचे सतीश शिर्के आणि प्रतीक कर्पे या दोघांकडून कोहली आणि त्यांची पत्नी, अभिनेत्री अनुष्का शर्मा यांनी मधमाशांच्या पेट्या विकत घेतल्या आहेत.

अलिबाग येथे या दाम्पत्याचे फार्म हाऊस आहे. तिथे नैसर्गिक पद्धतीने शेती केली जाते. या मधमाशा परागीभवनाच्या मदतीने शेतीचे उत्पादन वाढवण्यासाठी उपयोगी पडतील, असे सांगण्यात आले आहे. त्यासाठी एकूण ५० पेट्या अलिबागला रवाना झाल्या आहेत.

सतीश शिर्के हे कोरेगाव तालुक्यातील बोबडेवाडी गावचे, तर प्रतीक कर्पे बोरजाईवाडीचे. या दोघा तरुण उद्योजकांनी आठ वर्षांपूर्वी अगदी छोट्या प्रमाणावर मधमाशी पालन सुरू केले होते. सुरुवातीला त्यांना अनेक अडचणींचा सामना करावा लागला. तरीही त्यांनी पूर्णपणे सेंद्रिय पद्धतीनेच मधमाशी पालन करण्यावर भर दिला. हीच ऑरगॅनिक पद्धत कोहली यांच्या टीमपर्यंत पोहोचली.

अलिबागच्या फार्म हाऊसवरील पिकांचे उत्पन्न रसायनांवर नव्हे, तर नैसर्गिक परागीभवनावर अवलंबून असावे, या उद्देशाने कोहली दाम्पत्याने या तरुणांकडून पेट्या घ्यायचे ठरवले. खतांचा मारा केल्याने उत्पादन वाढले तरी आरोग्याला धोका होण्याची शक्यता असते. म्हणून मधमाशा पाळून त्यांच्या मदतीने परागीभवन करून उत्पादन वाढवण्याची ही वेगळी कल्पना आहे.

प्रत्येक पेटीत आठ ते बारा हजार मधमाशा असतात. या मधमाशांमुळे वीस ते तीस टक्के उत्पादन वाढण्याची शक्यता आहे.

कोहली यांच्या व्यवस्थापकांना या मधाची माहिती ऑनलाइन मिळाली. सेंद्रिय उत्पादनांना ऑनलाइन मागणी जास्त असल्याने शिर्के आणि कर्पे यांनी आपल्या व्यवसायाची जाहिरात डिजिटल प्लॅटफॉर्मवर केली होती. फार्मवरील शेतीचे उत्पन्न वाढवण्याबद्दल चर्चा झाली, तेव्हा मधमाशी पालनाचा विषय पुढे आला आणि मग कोरेगावच्या या उद्योजकांचा शोध सुरू झाला.

कोहली यांच्या अलिबागच्या फार्म हाऊसवर आता या मधमाशा फळबागा आणि भाजीपाल्याचे नैसर्गिक पद्धतीने परागीभवन करून उत्पादन वाढवणार आहेत. सतीश शिर्के, मधुमक्षिका उत्पादक, म्हणाले: शेतीमध्ये मधमाशांचे महत्त्व अनन्यसाधारण आहे. त्यांच्यामुळे केवळ मधच मिळत नाही, तर पिकांची गुणवत्ता आणि उत्पन्न ३० ते ४० टक्क्यांनी वाढते.

कोरेगावसारख्या छोट्या तालुक्यातून सुरू झालेला व्यवसाय थेट राष्ट्रीय स्तरावरील सेलिब्रिटीच्या फार्म हाऊसपर्यंत पोहोचल्याने परिसरातील तरुण उद्योजकांमध्ये नवा उत्साह निर्माण झाला आहे. जिद्द, सातत्य आणि ऑरगॅनिक कामाला नेहमीच किंमत मिळते, हेच या दोघा तरुणांनी दाखवून दिले आहे.