कॅप्टन स्मित मच्छार यांच्या धाडसाला जगभरातील राजदूतांची दाद, शेकडो प्रवाशांचे प्राण वाचले

भारतातील अनेक परदेशी राजदूत आणि राजकीय विचारवंतांनी गुरुवारी कॅप्टन स्मित मच्छार यांच्या धाडसाचे कौतुक केले. त्यांच्या धाडसामुळे बुधवारी हवेत मोठा अपघात टळला आणि 100 पेक्षा जास्त प्रवाशांचे प्राण वाचले, असे सांगितले जात आहे.

फ्लायदुबईच्या फ्लाइट एफझेड 1073 वर आलेले संकट टाळण्यात कॅप्टन मच्छार यांनी जी भूमिका बजावली, त्याचे आंतरराष्ट्रीय पातळीवर कौतुक होत आहे. या घटनेत को-पायलटने कॅप्टन मच्छार यांच्यावर जीवघेणा हल्ला केला होता, त्यामुळे विमान अचानक खाली जाऊ लागले. रक्तबंबाळ अवस्थेतही भारतीय पायलटने हल्लेखोराचा सामना केला आणि कॉकपिटचा दरवाजा उघडला. त्यानंतर प्रवासी त्यांच्या मदतीला धावले, कॉकपिटमध्ये शिरले आणि त्यांनी हल्लेखोराला ताब्यात घेतले. को-पायलट ओमानचा असल्याची प्राथमिक माहिती आहे.

प्रवाशांनी हल्लेखोराला पकडल्यानंतर गंभीर जखमी असलेल्या स्मित यांनी विमान सावरण्याचा प्रयत्न केला. कसेबसे त्यांनी ते विमान सौदी अरबमध्ये तातडीने उतरवले. भारतातील श्रीलंकेच्या उच्चायुक्त महिशिनी कोलोन यांनी प्रवासी आणि क्रू मेंबर यांचे प्राण वाचवल्याबद्दल या भारतीय पायलटच्या असाधारण साहसाचे आणि विवेकबुद्धीचे कौतुक केले.

कोलोन यांनी एक्सवर लिहिले की, धोक्याच्या वेळी असाधारण साहस आणि विवेकबुद्धी दाखवल्याबद्दल कॅप्टन स्मित मच्छार यांना सलाम. गंभीर जखमी असतानाही आपल्या देखरेखीखालील लोकांचे प्राण वाचवण्यासाठी त्यांनी अद्भुत संयम आणि दृढ संकल्पाने काम केले. त्यांचे साहस आणि इतर प्रवासी व क्रू मेंबर यांच्या बहादुरीमुळे एक भयानक घटना टाळता आली. स्मित लवकर बरे व्हावेत, अशी ईश्वरचरणी प्रार्थना, असेही त्यांनी म्हटले.

संयुक्त राष्ट्रातील इस्रायलचे राजदूत डॅनी डॅनन यांनी या भारतीय पायलटला खरा हिरो म्हटले. एक्सवरील पोस्टमध्ये ते म्हणतात की, कॅप्टन स्मित मच्छार लवकर बरे व्हावेत ही ईश्वरचरणी प्रार्थना. जो भारतीय पायलट लोकांचे प्राण वाचवण्यासाठी बहादुरीने लढत राहिला, त्याच्यावर वारंवार हल्ले झाले आणि ते पूर्णपणे गंभीर जखमी झाले. कॅप्टन मच्छार, तुम्ही खरे हिरो आहात. इस्रायल तुमच्या आरोग्यासाठी प्रार्थना करत आहे.

भारतातील अर्जेंटिनाचे राजदूत मारियानो कॉसिनो यांनीही कॅप्टन स्मित यांच्या साहसाचे कौतुक केले होते. कॅप्टन स्मित हे भारताच्या साहसाचे आणि कर्तव्यभावनेचे प्रतीक आहेत. गंभीर जखमी असतानाही त्यांनी शेकडो निष्पाप लोकांचे प्राण वाचवले आणि ते हिरो ठरले. त्यांचे साहस आणि आदर्श नेहमी स्मरणात राहील. जगाला तुमचा अभिमान आहे, असे कॉसिनो यांनी म्हटले.

भारतातील इस्रायलच्या दूतावासानेही कॅप्टन यांचे आभार मानले. विशेष म्हणजे, या विमानातील प्रवाशांमध्ये सर्वाधिक प्रवासी इस्रायलचे होते. दूतावासाने एक्सवरील पोस्टमध्ये लिहिले की, हिम्मतीला कोणतीच सीमा नसते. कठीण वेळी कॅप्टन स्मित आणि इतरांचे साहस आमच्या लोकांमधील खोल नात्याची आठवण करून देते. हे नाते हिम्मत, एकजूट आणि माणुसकीच्या ताकदीवरील विश्वासावर उभे आहे. स्मित यांची प्रकृती लवकरच सुधारावी, अशी ईश्वरचरणी प्रार्थना, असेही दूतावासाने म्हटले आहे.