वाईच्या समृद्धी पार्टेला ज्युदोमध्ये रौप्यपदक, किसन वीर महाविद्यालयाच्या शिरपेचात मानाचा तुरा

वाई येथील जनता शिक्षण संस्थेच्या किसन वीर महाविद्यालयात बी.एस्सी. भाग १ ला शिकणाऱ्या समृद्धी पार्टे हिने ज्युदोमध्ये रौप्यपदक पटकावले आहे. शिवाजी विद्यापीठाच्या आंतरविभागीय ज्युदो चॅम्पियनशिप स्पर्धेत तिने हे यश मिळवले.

या स्पर्धा नुकत्याच कोल्हापूर येथील शिवाजी विद्यापीठाच्या कुस्ती संकुलात पार पडल्या. तिथे समृद्धीने आपल्या कौशल्याच्या जोरावर उत्कृष्ट कामगिरी केली आणि रौप्यपदकावर आपले नाव कोरले. तिच्या या दैदीप्यमान कामगिरीमुळे महाविद्यालयाच्या शिरपेचात आणखी एक मानाचा तुरा रोवला गेला आहे. तिच्या या यशाचे सर्व स्तरांतून कौतुक होत आहे. क्रीडा क्षेत्रात महाविद्यालयाने आपल्या इतिहासात विशेष प्राविण्य मिळवले आहे.

या यशाबद्दल जनता शिक्षण संस्थेचे अध्यक्ष मदनदादा भोसले यांच्या हस्ते समृद्धीचा शाल आणि गुलाबाचे रोप देऊन सत्कार करण्यात आला. या सत्कार प्रसंगी भैय्यासाहेब जाधवराव, प्रा. नारायण चौधरी, चंद्रकांत इंगवले, प्रभारी प्राचार्य प्रा. (डॉ.) अंबादास सकट, सतीश भोसले, प्रशांत डोंगरे आणि जितेंद्र चव्हाण उपस्थित होते.

सत्कारानंतर बोलताना मदनदादा भोसले म्हणाले की, जिद्द, चिकाटी आणि आत्मविश्वासाच्या जोरावर कोणतेही यश मिळवता येते. आजच्या स्पर्धेच्या काळात मुली शिक्षण, कला आणि क्रीडा अशा वेगवेगळ्या क्षेत्रांत उल्लेखनीय कामगिरी करत आहेत, असेही ते म्हणाले. विद्यार्थ्यांनी क्रीडा स्पर्धांमध्ये मोठ्या संख्येने सहभागी व्हावे आणि आपल्या कौशल्याला वाव द्यावा, असे आवाहन त्यांनी केले. तसेच समृद्धीचे अभिनंदन करून त्यांनी तिला पुढच्या स्पर्धांसाठी शुभेच्छा दिल्या.

समृद्धीच्या या यशाबद्दल जनता शिक्षण संस्थेचे सचिव डॉ. जयवंत चौधरी आणि सर्व संचालक मंडळाने समाधान व्यक्त करत तिचे विशेष कौतुक केले. महाविद्यालयाचे प्राचार्य डॉ. गुरुनाथ फगरे आणि क्रीडा विभागप्रमुख मेजर (डॉ.) समीर पवार यांचे समृद्धीला उत्तम मार्गदर्शन मिळाले.

यावेळी समृद्धीने सांगितले की, महाविद्यालयाच्या क्रीडा विभागाकडून मिळणारे योग्य मार्गदर्शन आणि प्रोत्साहन यामुळेच हे यश मिळवता आले. समृद्धी पार्टे हिने मिळवलेल्या या यशाबद्दल महाविद्यालयातील प्राध्यापक, शिक्षकेतर कर्मचारी, विद्यार्थी आणि वाई पंचक्रोशीतील नागरिक तिचे अभिनंदन करत आहेत.