कवलेवाडा आरोग्य केंद्रात दोन दिवसांचे सीपीएचसी प्रशिक्षण, परिसरात झाडेही लावली

गोरेगाव: कवलेवाडा प्राथमिक आरोग्य केंद्रात दोन दिवसांचे कौशल्याधारित सर्वंकष प्राथमिक आरोग्य सेवा (सीपीएचसी) प्रशिक्षण नुकतेच उत्साहात पार पडले. ग्रामीण आणि शहरी भागातल्या लोकांना घराजवळच चांगली आरोग्य सेवा मिळावी, यासाठी आयुष्मान आरोग्य मंदिर म्हणजेच आरोग्यवर्धिनी केंद्राच्या माध्यमातून हा कार्यक्रम घेण्यात आला.

जिल्हा शल्यचिकित्सक डॉ. पुरुषोत्तम पटले, जिल्हा आरोग्य अधिकारी डॉ. अभिजीत गोल्हार, अतिरिक्त जिल्हा शल्यचिकित्सक डॉ. तृप्ती कटरे आणि सहाय्यक जिल्हा आरोग्य अधिकारी डॉ. अरविंदकुमार वाघमारे यांच्या मार्गदर्शनाखाली जिल्ह्यातल्या प्रत्येक प्राथमिक आरोग्य केंद्रात हे प्रशिक्षण दिले जात आहे.

आजार झाल्यावर उपचार करण्यापेक्षा आजार होऊच नयेत यासाठी प्रतिबंधात्मक आणि प्रोत्साहनात्मक आरोग्य सेवांवर जास्त भर देणे, हा या प्रशिक्षणाचा मुख्य उद्देश आहे. त्यासाठी डॉक्टर, परिचारिका, समुदाय आरोग्य अधिकारी, आरोग्य सेवक, आरोग्य सेविका आणि आशा स्वयंसेविका यांची कार्यक्षमता आणि कौशल्य वाढवण्यावर या सत्रात विशेष लक्ष देण्यात आले.

लोकांच्या एकूण आरोग्यासाठी असलेल्या १३ प्रकारच्या विस्तारित आरोग्य सेवांचे सखोल प्रशिक्षण या दोन दिवसांत उपस्थितांना देण्यात आले. त्यात गर्भधारणा आणि बाळंतपणाची काळजी, नवजात आणि अर्भक आरोग्य सेवा, बाल आणि किशोरवयीन आरोग्य सेवा, कुटुंब नियोजन आणि प्रजनन आरोग्य सेवा यांचा समावेश होता. टीबी, डेंग्यू, मलेरिया यांसारख्या संसर्गजन्य आजारांचे व्यवस्थापन, सामान्य आणि किरकोळ आजारांवरचे उपचार, तसेच मधुमेह, उच्च रक्तदाब, कर्करोग या असंसर्गजन्य आजारांची तपासणी आणि व्यवस्थापन हेही विषय होते. शिवाय नेत्र आणि कान-नाक-घसा सेवा, प्राथमिक मौखिक (तोंड व दात) आरोग्य सेवा, मानसिक आरोग्य सेवा, वृद्ध आणि पॅलिएटिव्ह (निरामय) आरोग्य काळजी, आपत्कालीन वैद्यकीय सेवा, भाजणे आणि ट्रमा काळजी, योग आणि आरोग्य संवर्धन या विषयांवरही प्रशिक्षण देण्यात येत आहे.

आरोग्य कर्मचाऱ्यांना मार्गदर्शन करण्यासाठी जिल्हा प्रशिक्षण केंद्राचे वैद्यकीय अधिकारी तथा जिल्हा माता व बाल संगोपन अधिकारी डॉ. राजेश बेळमकर, बालरोग तज्ज्ञ डॉ. सचिन उईके, दंतरोग तज्ज्ञ डॉ. अनिल आटे, सालेकसा तालुका आरोग्य अधिकारी डॉ. अमित खोडणकर, समुदाय आरोग्य अधिकारी डॉ. चंदन रंगारी आणि डॉ. मनिषा येडे, तसेच मानसिक रोग तज्ज्ञ दीपक आगुलवार हे आले होते. त्यांच्यासोबत कुंदा कुंभरे, सूरजलाल दोनोडे, विजय मेश्राम, रंजना रोकडे आणि माधुरी टेंभुर्णीकर यांनीही वेगवेगळ्या आरोग्य विषयांवर कर्मचाऱ्यांना सविस्तर प्रशिक्षण दिले. कवलेवाडा प्राथमिक आरोग्य केंद्राच्या वैद्यकीय अधिकारी डॉ. स्नेहा भावे याही प्रमुख पाहुण्या म्हणून हजर होत्या.

या प्रशिक्षणाला झाडे लावण्याची जोड देण्याची कल्पना डॉ. राजेश बेळमकर यांची आहे. ज्या प्राथमिक आरोग्य केंद्रांत सीपीएचसी प्रशिक्षण होत आहे, त्या सगळ्या ठिकाणी वृक्षारोपण करायचे, असा निर्णय आरोग्य विभागाने घेतला आहे. त्यानुसार कवलेवाडा येथेही प्रशिक्षणादरम्यान आरोग्य केंद्राच्या परिसरात मान्यवरांच्या हस्ते झाडे लावण्यात आली. आरोग्यासोबत पर्यावरणाचे रक्षण करण्याचा हा संदेश उपस्थितांना प्रेरणा देणारा ठरला.

कवलेवाडा प्राथमिक आरोग्य केंद्राच्या क्षेत्रातले समुदाय आरोग्य अधिकारी, आरोग्य सहाय्यक, आरोग्य सहाय्यिका, आरोग्य सेवक, आरोग्य सेविका, गटप्रवर्तक आणि आशा स्वयंसेविका मोठ्या संख्येने आले आणि त्यांनी उत्स्फूर्तपणे सहभाग घेतला. या प्रशिक्षणामुळे आणि तज्ज्ञांच्या मार्गदर्शनामुळे कवलेवाडा परिसरातली ग्रामीण आरोग्य सेवा अधिक बळकट, गतिमान आणि लोकाभिमुख होण्यास मदत होईल, असा विश्वास आरोग्य प्रशासनाने व्यक्त केला आहे.