गोरेगावात १८ महिन्यांच्या चिमुकलीचा सहाव्या मजल्यावरून पडून मृत्यू; १० वर्षांची मुलगी सोबत होती, सीसीटीव्ही

मुंबईतील गोरेगाव पूर्व भागातल्या शिवशाही सोसायटीत १८ महिन्यांची एक चिमुकली सहाव्या मजल्यावरील पॅसेजमधून खाली पडून दगावली. १४ ऑक्टोबरच्या रात्री ही दुर्दैवी घटना घडली आणि संपूर्ण परिसरात खळबळ उडाली आहे. विशेष म्हणजे, चिमुकली खाली पडली तेव्हा तिच्यासोबत शेजारी राहणारी १० वर्षांची मुलगीही तिथे होती. या घटनेचे सीसीटीव्ही फुटेज पोलिसांच्या हाती लागले असून हा अपघात की घातपात, याचा तपास सुरू आहे.

पोलिसांनी दिलेल्या माहितीनुसार, रात्री जेवण झाल्यावर ही १८ महिन्यांची चिमुकली घराबाहेरच्या सहाव्या मजल्यावरील पॅसेजमध्ये खेळायला गेली होती. शेजारी राहणारी १० वर्षांची मुलगीही त्यावेळी तिथे होती. काही वेळातच चिमुकली अचानक खाली कोसळली. प्राथमिक तपासात ती डक्टमधून खाली पडल्याचे समोर आले आहे. मात्र तिचा तोल गेला म्हणून ती पडली की तिला जाणीवपूर्वक ढकलण्यात आले, हे अजून स्पष्ट झालेले नाही.

अधिकाऱ्यांच्या माहितीनुसार, चिमुकली खाली पडल्यानंतर ती १० वर्षांची मुलगी तिथून निघून गेली. त्यानंतर काही वेळाने ती पुन्हा पॅसेजमध्ये सायकल चालवताना सीसीटीव्ही फुटेजमध्ये दिसली. त्यामुळे पोलीस या फुटेजचा बारकाईने अभ्यास करत आहेत. घटनेच्या वेळी नेमके काय घडले, याबद्दल मुलीने दिलेली माहितीही तपासात महत्त्वाची ठरणार आहे.

मृत मुलीचे कुटुंब १ ऑक्टोबरला या इमारतीत राहायला आले होते. कुटुंबीयांच्या म्हणण्यानुसार, मांजरीवरून दोन्ही कुटुंबांत याआधी वाद झाले होते. पण त्या वादाचे नेमके कारण काय होते आणि त्याचा या घटनेशी काही संबंध आहे का, हे अजून स्पष्ट झालेले नाही. पोलीस या दिशेनेही तपास करत आहेत.

चिमुकलीच्या मृत्यूमुळे कुटुंबावर दुःखाचा डोंगर कोसळला आहे. तिचे वडील वाहनचालक आहेत, आई गृहिणी आहे आणि कुटुंबाला आणखी चार मुले आहेत. "शेजारच्या मुलीसोबत असताना माझ्या चिमुकलीचा असा मृत्यू झाला. या प्रकरणाची सखोल चौकशी करून आम्हाला न्याय मिळवून द्यावा," अशी मागणी चिमुकलीच्या आईने केली आहे.

दरम्यान, १० वर्षांच्या मुलीविरोधात थेट गुन्हा दाखल होईल का, असाही प्रश्न उपस्थित झाला आहे. भारतीय न्याय संहितेच्या कलम २१ नुसार, सात वर्षांपेक्षा जास्त आणि १२ वर्षांपेक्षा कमी वयाच्या मुलाने केलेली कृती कायदेशीरदृष्ट्या अवलंबून असते ती त्या मुलाला आपल्या कृतीचे स्वरूप आणि परिणाम समजण्याइतकी परिपक्वता आहे की नाही, यावर. त्यामुळे मुलीचे वय, तिची समज, परिस्थितीचे आकलन आणि हेतू यांचा विचार करूनच पुढचा कायदेशीर निर्णय घेतला जाण्याची शक्यता आहे.