अयोध्येनंतर आता काशी विश्वनाथ मंदिरातील सुवर्णशिखरावरील सोने गायब झाल्याचा आरोप; पंतप्रधान कार्यालयाकडून

अयोध्येतील राम मंदिरातून देणगी आणि सोन्या-चांदीचे दागिने चोरीला गेल्याच्या प्रकरणाची एसआयटी चौकशी सुरू आहे. ही चौकशी सुरू असतानाच आता वाराणसीतील काशी विश्वनाथ मंदिराबाबत नवा आरोप समोर आला आहे. मंदिराच्या सुवर्णशिखरावरील सोने गायब झाल्याचा आरोप करण्यात आला आहे.

हे प्रकरण पंतप्रधान कार्यालयापर्यंत पोहोचले असून कार्यालयाने चौकशी सुरू केली आहे. तक्रारदार अधिवक्ता नित्यानंद राय यांचा जबाबही दूरध्वनीवरून नोंदवण्यात आला आहे. तसेच मुख्यमंत्री कार्यालयाच्या निर्देशानुसार मंदिर प्रशासनानेही अंतर्गत चौकशी सुरू केली आहे.

वाराणसीतील तेलियाबाग येथील रहिवासी असलेल्या नित्यानंद राय यांनी २९ सप्टेंबर रोजी विभागीय आयुक्तांसह पंतप्रधान आणि मुख्यमंत्री कार्यालयाकडे लेखी तक्रार केली होती. मंदिराच्या उत्तर प्रवेशद्वाराच्या वरच्या बाजूला असलेले दोन सुवर्णकलश गायब असल्याचा दावा त्यांनी केला. याबाबत मंदिर प्रशासनाकडे माहिती मागूनही उत्तर मिळाले नाही, असे त्यांनी तक्रारीत नमूद केले आहे. मंदिराच्या संकेतस्थळावरही सुवर्णशिखरावरील सोने काढल्याची माहिती उपलब्ध नसल्याचे त्यांनी म्हटले आहे.

सुवर्णशिखराच्या इतर भागांतील लहान तुकड्यांमधूनही सोने गायब झाल्याचा आरोप राय यांनी केला आहे. काही भागांवरील सोन्याचा मुलामा सैल झाला असून जोरदार वाऱ्यामुळे किंवा अन्य कारणांनी तो खाली पडण्याची शक्यता असल्याचे त्यांनी सांगितले. या संपूर्ण प्रकरणाची चौकशी करून योग्य ती कारवाई करावी, अशी त्यांची मागणी आहे.

दरम्यान, मंदिर प्रशासनाने दिलेल्या माहितीनुसार उत्तर प्रवेशद्वाराच्या वर बसवलेला एक सुवर्णकलश काही दिवसांपूर्वी माकडांच्या उड्यांमुळे खाली पडला होता. हा कलश सुरक्षितपणे भांडारगृहात ठेवण्यात आला आहे. तांत्रिक तपासणीशिवाय तो पुन्हा बसवणे योग्य ठरणार नसल्याने आयआयटी मद्रासशी संपर्क साधण्यात आला आहे. संस्थेच्या पथकाने प्राथमिक पाहणी केली असून संपूर्ण सुवर्णशिखराच्या दुरुस्तीची शिफारस केली आहे.

विभागीय आयुक्त एस. राजलिंगम यांनीही एका घटनेत सुवर्णकलश खाली पडल्याच्या वृत्ताला दुजोरा दिला. हा कलश सुरक्षित ठेवण्यात आला असून आयआयटी मद्रासच्या मदतीने तो लवकरच पुन्हा बसवण्यात येईल, असे त्यांनी सांगितले.

मंदिर परिसरात ज्या ठिकाणी सोने आणि चांदीचा वापर करण्यात आला आहे, त्याची सविस्तर माहिती देणारी श्वेतपत्रिका मंदिर प्रशासनाने प्रसिद्ध करावी, अशी मागणी राय यांनी केली आहे. ही माहिती मंदिराच्या अधिकृत संकेतस्थळावरही उपलब्ध करून द्यावी, असेही त्यांनी म्हटले आहे.