अहेरीचे स्वीकृत नगरसेवक १.२० लाखांच्या लाच प्रकरणात एसीबीच्या ताब्यात

गडचिरोली जिल्ह्यातील अहेरी नगरपंचायतीचे स्वीकृत नगरसेवक अमोल विलासराव गुडेलीवार (वय ४०) यांना लाचलुचपत प्रतिबंधक विभागाच्या गोंदिया पथकाने १५ ऑक्टोबर २०२६ रोजी रंगेहाथ पकडल्याचे विभागाने सांगितले. तक्रारदाराकडून १,२०,००० रुपये लाच स्वीकारताना ही कारवाई झाल्याचे विभागाचे म्हणणे आहे. गुडेलीवार हे प्रभाग क्रमांक ९, राजे विश्वेश्वर महाराज चौक, बस स्टॉप रोड, अहेरी येथे राहतात.

तक्रारदार हे ३३ वर्षांचे पुरुष असून ते इलेक्ट्रिकल ठेकेदारीचे काम करतात. त्यांची ठेकेदारी फर्म आहे, त्यांच्याकडे परवाना आहे आणि अहेरी येथे त्यांचे इलेक्ट्रिक दुकानही आहे. त्यांच्या मित्राच्या फर्मला नगरोत्थान योजना २०२५-२६ अंतर्गत अहेरी येथे अतिरिक्त सर्विस केबल टाकण्याचे काम मिळाले होते. प्रभाग एक ते दहा साठी ९,९३,९०९ रुपये आणि प्रभाग ११ ते १७ साठी ९,९३,८५६ रुपये, असे एकूण १९,८७,७६५ रुपयांच्या निविदा मंजूर झाल्या होत्या.

प्रभाग ११ ते १७ चे काम मित्राकडून करारनामा करून तक्रारदारांनी पूर्ण केले. प्रभाग १ ते १० चे काम करणारे ठेकेदार मित्र असल्याने त्या कामावर तक्रारदार देखरेख ठेवत होते. कार्यारंभ आदेश मिळाल्यानंतर दोन्ही कामे १८० दिवसांच्या विहित मुदतीत पूर्ण झाली आणि दोन्ही कामांचे संपूर्ण बिल निघाले.

तक्रारीनुसार, बिल निघाल्यानंतर गुडेलीवार तक्रारदारांच्या दुकानात आले आणि ही कामे जिल्हा नियोजन समिती, गडचिरोली येथून आपण स्वतः आणली असून ती आपल्या कोट्यातील आहेत, असे म्हणाले. त्याचा मोबदला म्हणून एकूण बिलाच्या १५ टक्के, म्हणजे तीन लाख रुपये द्यावेत, अशी लाचेची मागणी त्यांनी वारंवार केल्याचा आरोप आहे. नाईलाजाने तक्रारदारांनी ५ ऑगस्ट २०२६ रोजी त्यांना ३०,००० रुपये रोख दिले. तरीही उर्वरित २,७०,००० रुपयांसाठी व्हाट्सअप फोनवर कॉल करून मागणी सुरू राहिल्याचे तक्रारीत म्हटले आहे. लाच देण्याची इच्छा नसल्याने तक्रारदारांनी लाचलुचपत प्रतिबंधक विभाग, गोंदिया येथे तक्रार दिली.

१५ ऑक्टोबर २०२६ रोजी तक्रारीची पडताळणी करण्यात आली. पंच आणि व्हाईस रेकॉर्डरसह तक्रारदारांना आरोपीच्या हार्डवेअरच्या दुकानावर पाठवले असता, आरोपीने तक्रारीत नमूद केल्याप्रमाणे २,७०,००० रुपयांची मागणी केली आणि जमतील तितके पैसे थोड्या वेळात आणून देण्यास सांगितले. तक्रारदारांकडे सध्या १,२०,००० रुपये असल्याचे सांगितल्यावर तेवढे पैसे थोड्या वेळात दुकानावर आणण्यास सांगण्यात आले.

त्याच दिवशी पथकाने तक्रारदारांना व्हॉइस रेकॉर्डर आणि पंचांसह लाचेची रक्कम घेऊन आरोपीच्या हार्डवेअरच्या दुकानात पाठवले. आरोपीने १,२०,००० रुपये स्वीकारताच त्याला रेडहॅन्ड पकडण्यात आले. आरोपीला ताब्यात घेतले असून, गुन्हा दाखल होताच अटक करणार असल्याचे विभागाने म्हटले आहे. अहेरी पोलीस स्टेशन, जिल्हा गडचिरोली येथे गुन्हा नोंदवण्याची प्रक्रिया सुरू आहे.

सापळा अधिकारी म्हणून पोलीस निरीक्षक अरविंद राऊत होते, तर पर्यवेक्षक अधिकारी पोलीस उपअधीक्षक निलेश लोधी होते. पथकात एएसआय चंद्रकांत करपे, हवालदार संजयकुमार बोहरे, मंगेश कहालकर तसेच संतोष शेंडे, संतोष बोपचे, प्रशांत सोनवणे आणि दिपक बाटबर्वे यांचा समावेश होता. नागपूर लाचलुचपत प्रतिबंधक विभागाचे पोलीस अधीक्षक दिंगबर प्रधान, अपर पोलीस अधीक्षक माधुरी बाविस्कर आणि विजय माहुलकर यांचे मार्गदर्शन लाभले. भ्रष्टाचाराची माहिती असल्यास किंवा लाच मागणाऱ्या लोकसेवकाविरुद्ध तक्रार असल्यास नागरिकांनी विभागाशी संपर्क साधावा, असे आवाहन करण्यात आले आहे.