कल्याण ते तळोजा मेट्रो 12 चे 53.87 टक्के काम पूर्ण, मे 2028 पर्यंत सेवेत आणण्याचे उद्दिष्ट
ठाणे जिल्ह्यातील कल्याण आणि नवी मुंबईला जोडणाऱ्या मेट्रो 12 मार्गिकेचे अडीच वर्षांत 53.87 टक्के काम झाले आहे. एमएमआरडीएने मे 2028 पर्यंत सेवा सुरू करण्याचे उद्दिष्ट ठेवले आहे.
ठाणे जिल्ह्यातील कल्याण आणि नवी मुंबई यांना जोडणाऱ्या मेट्रो 12 (कल्याण-डोंबिवली-तळोजा) मार्गिकेचे काम वेगात सुरू आहे. प्रवासी अनेक दिवस या मार्गिकेची वाट पाहत आहेत. अवघ्या अडीच वर्षांत या प्रकल्पाचे 53.87 टक्के काम पूर्ण झाले आहे. मुंबई महानगर प्रदेश विकास प्राधिकरणाने (MMRDA) दिलेल्या माहितीनुसार, हा प्रकल्प पूर्ण करून मे 2028 पर्यंत प्रवाशांच्या सेवेत आणण्याचे उद्दिष्ट ठेवण्यात आले आहे.
मुंबई महानगर क्षेत्रात प्रवास अधिक गतिमान करण्यासाठी अनेक मेट्रो प्रकल्प सुरू आहेत. त्यांत ही मार्गिका आणखी एक महत्त्वाची भर ठरत आहे.
सध्या कल्याणहून नवी मुंबईला जाताना रस्त्यावर मोठ्या प्रमाणात वाहतूक कोंडीचा सामना करावा लागतो. मेट्रो 12 सुरू झाल्यानंतर प्रवाशांची या कोंडीतून सुटका होईल आणि कल्याण ते तळोजा हा प्रवास केवळ 45 मिनिटांत होणार आहे, असे सांगण्यात आले आहे.
मेट्रो प्रकल्पांना उशीर होण्याचे मुख्य कारण सहसा कारशेडसाठी जागा मिळण्यातील अडचण असते. या प्रकल्पात मात्र ही अडचण आधीच दूर झाली आहे. काम सुरू होण्यापूर्वीच निळजे-निळजेपाडा येथे अंदाजे 45 हेक्टर जागा ताब्यात घेऊन कारशेडचा प्रश्न मार्गी लावण्यात आला. सर्व अडथळे वेळेत दूर झाल्यामुळे कामाने विक्रमी वेग घेतला आहे.
मार्च 2024 मध्ये तत्कालीन मुख्यमंत्री एकनाथ शिंदे यांच्या हस्ते भूमिपूजन झाले आणि त्यानंतर या महत्त्वाकांक्षी प्रकल्पाच्या प्रत्यक्ष कामाला सुरुवात झाली. एमएमआरडीएच्या नियोजनानुसार उर्वरित काम ठरलेल्या वेळेत पूर्ण करून ही मार्गिका 2028 मध्ये नागरिकांच्या सेवेत येईल. त्यामुळे हजारो रोजच्या प्रवाशांचा प्रवास अतिशय जलद आणि आरामदायक होईल.
ही मार्गिका ठाणे-भिवंडी-कल्याण मेट्रो 5 चा विस्तार म्हणून उभारली जात आहे. तिची एकूण लांबी 23.576 किलोमीटर असून संपूर्ण मार्ग उन्नत (Elevated) असणार आहे.
प्रवाशांच्या सोयीसाठी या संपूर्ण मार्गावर एकूण 19 मेट्रो स्थानके उभारली जात आहेत. ती अशी: कल्याण, एपीएमसी कल्याण, गणेश नगर, पिसवली गाव, गोळवली, डोंबिवली एमआयडीसी, सागाव, सोनारपाडा, मानपाडा, हेदुटणे, कोळेगाव, निळजे गाव, वडवली, बाळे, वाकळण, तुर्भे, पिसारवे डिपो, पिसारवे आणि अमंडूत (तळोजा).
ही मार्गिका तळोजा येथे नवी मुंबई मेट्रोशी जोडली जाणार आहे. त्यामुळे कल्याण, डोंबिवली, ठाणे आणि नवी मुंबई यांच्यातील दळणवळण अधिक मजबूत होईल.
