कल्याणमध्ये मॅगीच्या नूडल्समध्ये आळ्या आढळल्या, पॅकेटवर 2027 पर्यंत मुदत असल्याने खळबळ
कल्याणमध्ये मॅगी शिजवताना त्यात आळ्या दिसल्याचा प्रकार समोर आला असून, पॅकेटवर फेब्रुवारी 2027 पर्यंतची मुदत नोंदवलेली होती. FDA सध्या भेसळीविरोधात कारवाई करत असतानाच हा प्रकार समोर आल्याने अन्नसुरक्षेचा मुद्दा पुन्हा ऐरणीवर आला आहे.
कल्याणमधून एक धक्कादायक घटना समोर आली आहे, जी ऐकून मॅगी खाणाऱ्यांची भूकच मरून जाईल. लहान मुलांपासून मोठ्यांपर्यंत सगळ्यांचीच फेव्हरेट असलेली, अवघ्या दोन मिनिटांत तयार होणारी मॅगी बनवताना एका व्यक्तीला त्यातल्या नूडल्समध्ये आळ्यासारखे किडे दिसले. सगळ्यात महत्त्वाची गोष्ट म्हणजे या पॅकेटवर फेब्रुवारी 2027 पर्यंतची एक्सपायरी म्हणजे बेस्ट बिफोर डेट स्पष्टपणे लिहिलेली होती. मुदत अजून बरीच शिल्लक असतानाही उत्पादनात आळ्या कशा आल्या, हा प्रश्न आता विचारला जातोय.
मिळालेल्या माहितीनुसार, संबंधित व्यक्तीने रोजच्यासारखं मॅगीचं पाकीट उघडलं आणि नूडल्स शिजवायला घेतले. तेवढ्यात त्यात आळ्यांसारखे कीटक दिसले. सुदैवाने मॅगी तोंडात जाण्याआधीच हा प्रकार लक्षात आल्यामुळे त्या व्यक्तीने ती मॅगी खाल्ली नाही.
पॅकेटवरची मुदत अजून दीड वर्षांहून अधिक शिल्लक होती, त्यामुळे उत्पादन पूर्णपणे सुरक्षित असल्याचा विश्वास ठेवून ते वापरात आणलं गेलं होतं. पण नूडल्समध्ये आळ्या सापडल्याच्या या दाव्यामुळे उत्पादनाची क्वालिटी, त्याचं पॅकिंग आणि साठवणुकीच्या पद्धतीबाबत प्रश्नचिन्ह उभं राहिलं आहे. हा दोष नेमका कुठे झाला, हे मात्र अजून स्पष्ट नाही. उत्पादन तयार होण्याच्या वेळी, वाहतुकीत, वितरणादरम्यान, दुकानात ठेवताना किंवा घरात साठवताना अशा अनेक टप्प्यांपैकी नेमकं कारण काय, हे केवळ अधिकृत तपासणी आणि प्रयोगशाळेतील चाचणीनंतरच समोर येऊ शकतं.
महाराष्ट्रात अन्न व औषध प्रशासन म्हणजे FDA सध्या खाद्यपदार्थांच्या गुणवत्तेवर बारीक नजर ठेवून कारवाई करत आहे. अशातच कल्याणमधली ही घटना उघड झाल्यामुळे अन्नसुरक्षेचा विषय पुन्हा चर्चेत आला आहे. यासंदर्भात या पाकिटाचा बॅच नंबर, उत्पादनाची तारीख, बेस्ट बिफोर आणि एक्सपायरीची माहिती तसंच ते कुठून खरेदी केलं गेलं, हे तपासून त्याच बॅचमधल्या इतर पाकिटांचेही नमुने तपासले जावेत, अशी मागणी होत आहे. हा नमुना अधिकृत लॅबमध्ये पाठवला गेला तर त्यात नेमके कोणते किडे किंवा आळ्या होत्या आणि दूषित होण्याचं संभाव्य कारण काय असू शकतं, हे अधिक स्पष्ट होऊ शकेल.
मॅगी हे मोठ्या प्रमाणावर वापरलं जाणारं पॅकेज्ड फूड प्रॉडक्ट असल्यामुळे या घटनेकडे ग्राहकांच्या सुरक्षिततेच्या दृष्टिकोनातून गंभीरपणे बघण्याची मागणी होतेय. मात्र FDA किंवा कंपनीकडून अधिकृत तपासणीचा अहवाल येण्याआधी, नूडल्समध्ये आळ्या आढळल्याचा हा उल्लेख सध्या ग्राहकाने केलेला दावा म्हणूनच बघायला हवा. या प्रकारानंतर संबंधित उत्पादनाची अधिकृत तपासणी होते का, त्या बॅचबाबत कंपनी काय स्पष्टीकरण देते आणि FDA पुढे काय कारवाई करतं, याकडे आता सगळ्यांचं लक्ष लागलं आहे.
