कॅट मॉक टेस्टमध्ये स्कोअर अडकलाय? टेस्टनंतरच्या विश्लेषणाचे पाच टप्पे

एमबीए करू इच्छिणाऱ्या बहुतेक उमेदवारांची एकच तक्रार असते, की मॉक टेस्टमध्ये गुण वाढत नाहीत. कोणी १० तर कोणी १५ टेस्ट दिल्या आहेत, तरी स्कोअर आहे तिथेच अडकलेला आहे. क्वांट किंवा DILR चे अवघड सेट समोर आले की अनेकांना घाम फुटतो. तुमचेही असेच होत असेल, तर आपली रणनीती तपासायला हवी. नुसती मॉक टेस्ट देणे ही अर्धीच लढाई आहे, खरा खेळ टेस्टनंतर सुरू होतो.

अनेक उमेदवार स्कोअर पाहून निराश होतात, किंवा काहीही विश्लेषण न करता सरळ पुढच्या टेस्टकडे धावतात. कॅटसारखी मोठी परीक्षा क्रॅक करायची असेल, तर 'क्वांटिटी'पेक्षा 'क्वॉलिटी' महत्त्वाची ठरते. दिवसातून २ मॉक दिल्या आणि त्यांचे विश्लेषण केले नाही, तर त्या कुठल्याच कामाच्या नाहीत. एकच मॉक दिली आणि तिचे सखोल विश्लेषण केले, तर त्याच चुका पुन्हा करणे टळते. स्वतःच्या चुका समजतात आणि त्या सुधारण्याची संधीही वाढते.

पहिला टप्पा म्हणजे न सोडवलेल्या प्रश्नांची यादी. मॉक सबमिट केल्यावर आधी तेच प्रश्न बघा जे तुम्ही सोडवले नव्हते. स्वतःला विचारा, वेळ कमी पडला म्हणून ते सुटले की प्रश्न बघताच डोके चालेनासे झाले? वेळ कमी पडला असेल, तर टाइम मॅनेजमेंटमध्ये किंवा प्रश्न निवडण्यात कमी पडला आहात. मूळ संकल्पनाच माहीत नसेल, तर ती नोटबुकमध्ये लिहून ठेवा आणि त्या टॉपिकचे बेसिक लगेच पुन्हा वाचा.

दुसरा टप्पा सिली मिस्टेकचा 'लॉग' बनवण्याचा. कॅटमध्ये तुमचा सर्वात मोठा शत्रू म्हणजे तुमचा स्वतःचा ओव्हरकॉन्फिडन्स आणि घाई. गणनेत (Calculation) प्लस-मायनसची चूक होणे, प्रश्न नीट न वाचणे, या सिली मिस्टेक. 'Mistake Log' नावाची वेगळी डायरी करा आणि प्रत्येक मॉकनंतर या चुका तिथे लाल पेनाने लिहा. आठवड्यातून दोनदा ती वाचली, तर अशा चुका पुन्हा होणार नाहीत.

तिसरा टप्पा म्हणजे इगो ट्रॅपमधून बाहेर पडणे. क्वांट किंवा DILR मध्ये उमेदवार अनेकदा एखादा प्रश्न इगोवर घेतात. हा प्रश्न माझ्याकडून कसा सुटत नाही, ५ मिनिटे झाली, असे वाटत राहते. त्यामुळे बाकीचे सोपे प्रश्न सुटत नाहीत. विश्लेषण करताना बघा, शेवटी चुकीचा निघालेल्या एखाद्या प्रश्नावर तुम्ही ७-८ मिनिटे घालवली का. कॅटमध्ये प्रश्न सोडून देण्याची कला हीच सर्वात मोठी खुबी आहे.

चौथा टप्पा म्हणजे निगेटिव्ह मार्किंगला आळा घालणे. कॅटमध्ये ३३% प्रश्न बरोबर सोडवले तरी ९९ पर्सेंटाइल पक्के होतात. तरीही उमेदवार अंदाधुंद तुक्के मारतात. तुमचे किती प्रश्न चुकीच्या अंदाजांमुळे किंवा घाईमुळे चुकले, ते तपासा. आयआयएम प्रवेश परीक्षेत अचूकता वाढवायची असेल, तर ठरवा की ८०-९०% खात्री होईपर्यंत पर्याय टिक करायचा नाही.

पाचवा टप्पा म्हणजे री-सॉल्व्हिंगचा नियम. मॉक दरम्यान जे प्रश्न सुटले नाहीत किंवा चुकले, ते कोणतेही सोल्यूशन न बघता पेन घेऊन पुन्हा स्वतः सोडवा. व्हिडिओ सोल्यूशन बघणे सोपे असते, पण स्वतःच्या हाताने पेन चालवल्याशिवाय गोष्ट डोक्यात बसत नाही. पुढच्या मॉकपूर्वी त्या जुन्या चुकलेल्या प्रश्नांची एकदा पुन्हा प्रॅक्टिस करा.

शेवटी विश्लेषणाचा वेळेचा नियम. ३ तासांची कॅट मॉक दिल्यानंतर किमान २ तास त्याच्या विश्लेषणाला द्या. ३ तासांची टेस्ट देऊन फक्त १५ मिनिटे स्कोअरकार्ड बघितले, तर तुम्ही स्वतःच्या तयारीशी बेईमानी करता. मॉकचे विश्लेषणच तुमची खरी तयारी समोर आणते.