जेएसडब्ल्यू ग्रीनटेकचा 'ॲम्पस्टार' ब्रँड लाँच; इलेक्ट्रिक बस-ट्रक बाजारात उतरणार

जेएसडब्ल्यू ग्रुपने व्यावसायिक वाहन क्षेत्रात अधिकृतपणे एंट्री केली आहे. ग्रुपची उपकंपनी असलेल्या जेएसडब्ल्यू ग्रीनटेकने 'ॲम्पस्टार' या नावाने नवा ब्रँड लाँच केला आहे. या ब्रँडखाली शाश्वत आणि पर्यावरणपूरक इलेक्ट्रिक बस आणि ट्रक तयार केले जाणार आहेत. जेएसडब्ल्यू ग्रीनटेक कंपनीची स्थापना 2024 मध्ये झाली होती. भारतीय रस्ते आणि हवामान लक्षात घेऊन ही वाहने डिझाइन करण्यात आली आहेत.

या प्रकल्पासाठी जेएसडब्ल्यू ग्रीनटेक महाराष्ट्रातील छत्रपती संभाजीनगर इथे 90 एकरचा ग्रीनफिल्ड मॅन्युफॅक्चरिंग प्लांट उभारणार आहे. हा प्लांट कंपनीचं मुख्य उत्पादन केंद्र असणार आहे. या प्लांटमध्ये दरवर्षी 10000 इलेक्ट्रिक बस आणि 5000 इलेक्ट्रिक ट्रक तयार होतील, असं सांगण्यात आलं आहे. दुसरीकडे, छत्रपती संभाजीनगरच्या ऑरिक भागात उभारल्या जाणाऱ्या याच एकात्मिक ईव्ही प्लांटची वार्षिक क्षमता दरवर्षी 15000 इलेक्ट्रिक बस आणि ट्रक इतकी असेल, असंही सांगण्यात आलं आहे. पुण्यातल्या अत्याधुनिक संशोधन आणि विकास केंद्रात आणि जागतिक तंत्रज्ञान भागीदारांच्या मदतीने भारतीय परिस्थितीला अनुकूल अशी वाहनं विकसित केली जात आहेत. या वाहनांना ऑटोमोटिव्ह रिसर्च असोसिएशन ऑफ इंडिया म्हणजे एआरएआयकडून सीएमव्हीआर टाईप अप्रूव्हल मिळालं असून, त्यामुळे या वाहनांच्या व्यावसायिक विक्रीचा मार्ग मोकळा झाला आहे.

मुंबईत झालेल्या लाँचिंग कार्यक्रमात ॲम्पस्टारने सार्वजनिक आणि व्यावसायिक वापरासाठीच्या वेगवेगळ्या गाड्या सादर केल्या. यात 9 मीटरची सिटी बस, 12 मीटरची स्टाफ बस आणि 12 मीटरची सिटी बस यांचा समावेश आहे. कंपनीने पहिली 100 बसेसची बॅच आधीच जेएसडब्ल्यू स्टील, डोलवी इथे कर्मचाऱ्यांच्या वाहतुकीसाठी दिली आहे. पुढे 7 मीटरपासून 18 मीटर लांबीपर्यंतच्या बसचा पोर्टफोलिओ तयार केला जाईल, अशी माहिती जेएसडब्ल्यू ग्रुपचे चेअरमन आणि मॅनेजिंग डायरेक्टर सज्जन जिंदल यांनी दिली.

मालवाहतुकीसाठी सुरुवातीला 55 टन क्षमतेचा ई-ट्रक-ट्रेलर बाजारात आणला आहे. यानंतर इतर क्षमतांचे ट्रकही सादर केले जाणार आहेत. पुढच्या काळात टिपर आणि फिक्स-बॉडी डंपर ट्रकही बाजारात येतील. या वाहनांमध्ये 150 किलोवॅट ते 500 किलोवॅट क्षमतेचे मोटर आणि पॉवर सिस्टीम वापरण्यात येणार आहे. वाहनांमध्ये डबल-कूलिंग बॅटरी सिस्टीम असून, अवघ्या 7 मिनिटांत बॅटरी स्वॅपिंग करण्याची सोयही देण्यात आली आहे.

ॲम्पस्टार फक्त गाड्या विकणारा ब्रँड न राहता, ग्राहकांसाठी संपूर्ण ईव्ही इकोसिस्टीम उभारत आहे. चार्जिंगसाठीची पायाभूत सुविधा, ऑपरेटिंग सोल्यूशन्स, फायनान्सिंग आणि विक्रीनंतरची सर्व्हिस कंपनी स्वतः पुरवणार आहे. ग्राहकांना थेट खरेदीशिवाय लीझिंग आणि बॅटरी-ॲज-अ-सर्व्हिस असे मालकीचे सोपे पर्यायही निवडता येतील, ज्यामुळे वाहनाची सुरुवातीची किंमत कमी ठेवता येईल. या व्यावसायिक ईव्ही मोहिमेसाठी कंपनीने 2500 कोटी रुपयांची प्राथमिक गुंतवणूक केली आहे.