सेवा संकल्प अभियानातून धोंडाअर्जुनीत ग्रामस्वच्छता व नशामुक्तीचा निर्धार
जिवती तालुक्यातील धोंडाअर्जुनी गावात ग्रामसभेत गावकऱ्यांनी स्वच्छता, नशामुक्ती आणि पेसा कायद्याच्या अंमलबजावणीचा निर्धार केला.
जिवती तालुक्यातील धोंडाअर्जुनी (गोंडगुडा) या गावात सेवा संकल्प अभियानाअंतर्गत गावकऱ्यांनी एकत्र येत गावाच्या स्वच्छतेसाठी, नशामुक्तीसाठी, ग्रामविकासासाठी आणि पेसा कायद्याच्या प्रभावी अंमलबजावणीसाठी पुढाकार घेतला. शनिवार, २७ सप्टेंबर रोजी रात्री ८ ते १० या वेळेत मुंडा निवासी पारंपरिक पद्धतीने ग्रामसभा भरवण्यात आली. उत्साहाच्या वातावरणात पार पडलेल्या या सभेत गावाच्या सर्वांगीण विकासासंबंधी अनेक महत्त्वाचे ठराव सर्वानुमते मंजूर करण्यात आले.
या ग्रामसभेला धोंडाअर्जुनी परिसरासह आसपासच्या विविध गावांतील मूळनिवासी बांधव मोठ्या संख्येने हजर होते. लेखा-मेंढा गावाच्या धर्तीवर, म्हणजे त्या गावाने जशी आपल्या व्यवस्थेत सुधारणा घडवून आणली त्याच पद्धतीने धोंडाअर्जुनी गावाच्या व्यवस्थेत सुधारणा घडवून आणणे, पेसा कायद्याची प्रभावी अंमलबजावणी करणे, समाजसुधारणा, नशामुक्ती, गावाची स्वच्छता आणि गावाच्या विकास प्रक्रियेत लोकांचा सहभाग वाढवणे या मुद्द्यांवर सभेत सविस्तर चर्चा झाली.
ग्रामसभेत घेतलेले निर्णय प्रत्यक्षात आणण्यासाठी दुसऱ्याच दिवशी, म्हणजे २८ सप्टेंबरला सकाळी गावकरी एकत्र आले. त्यांनी गावातील रस्ते, सार्वजनिक जागा, परिसर तसेच सांडपाणी साचणाऱ्या ठिकाणांची साफसफाई केली. प्रत्येक कुटुंबाने स्वतःहून यात भाग घेतल्यामुळे या स्वच्छता मोहिमेला लोकचळवळीचे रूप आले. गाव स्वच्छ, सुंदर आणि निरोगी बनवण्याचा संकल्पही यावेळी गावकऱ्यांनी केला.
ग्रामसभेतील ठरावानुसार गावकऱ्यांनी दारूमुक्त आणि नशामुक्त गाव बनवण्याचा सामूहिक निर्धार केला. जिल्हा परिषदेच्या येरमी-येसापूर प्राथमिक शाळेचे मुख्याध्यापक लिंगोराव सोयाम यांनी यावेळी नशेचे सामाजिक, आर्थिक आणि कौटुंबिक दुष्परिणाम तसेच नशामुक्तीचे फायदे याबद्दल गावकऱ्यांना सविस्तर मार्गदर्शन केले. नशामुक्त गाव घडवण्यासाठी सर्वांनी एकजुटीने प्रयत्न करावेत, असे आवाहन त्यांनी यावेळी उपस्थितांना केले.
या उपक्रमाला धोंडाअर्जुनीच्या सरपंच जुमनाके, कृषी उत्पन्न बाजार समितीचे सभापती नामदेव जुमनाके, गावपाटील गोविंदराव कन्नाके, जुगदराव सिडाम, पोलीस पाटील कोवे यांच्यासह अंगणवाडी सेविका, आशा स्वयंसेविका आणि गावातील सर्वसामान्य ग्रामस्थांचाही उत्स्फूर्त प्रतिसाद मिळाला. या सर्वांनी स्वच्छता व नशामुक्ती मोहिमेत सक्रिय सहभाग नोंदवला.
ग्रामसभेला जिवती पंचायत समितीचे प्रथम सभापती भीमराव मेश्राम, शंकर वेट्टी, जंगू मेश्राम, लिंगोराव सोयाम, संतोष सल्लाम, शित्रू गेडाम, धर्मराव मडावी, विशेषता कोटनाके, चैनराव मडावी, आदर्श गाव महापांढरवाणीचे गावपाटील मानकू धुर्वे, इसरू आडे तसेच कारगाव खुर्द, आसापूर, घारपणा, नागापूर, गढपांढरवाणी आणि महापांढरवाणी या गावांतील मान्यवर व ग्रामस्थही मोठ्या संख्येने उपस्थित होते.
