जिवती ग्रामीण रुग्णालयात चार डॉक्टरांची रात्रंदिवस रुग्णसेवा

जिवती तालुक्यातील ग्रामीण भागातील लोकांना तातडीची आणि चांगली वैद्यकीय सेवा घरच्या जवळच मिळावी, उपचारासाठी लागणारा वेळ आणि पैसा वाचावा, यासाठी जिवती प्राथमिक आरोग्य केंद्राला अपग्रेड करून सुमारे वर्षभरापूर्वी ग्रामीण रुग्णालय सुरू करण्यात आले. महिनाभरापूर्वी आरोग्य विभागाने इथे तीन एमबीबीएस डॉक्टरांची नेमणूक केली आणि रुग्णालयाच्या कामाला मोठा वेग आला. डॉ. प्रमेय भगत, डॉ. मकरंद हजारे आणि डॉ. डेव्हिड देशपांडे हे तिघे नवे डॉक्टर, आणि प्राथमिक आरोग्य केंद्रातील डॉ. सुरज मडावी असे चारही वैद्यकीय अधिकारी सध्या रात्रंदिवस रुग्ण तपासत आहेत. त्यांच्या या मेहनतीमुळे जिवती परिसरातल्या रुग्णांमध्ये समाधान दिसून येत आहे.

जिवती तालुका हा दुर्गम आणि पूर्णपणे ग्रामीण भाग आहे. इथे आरोग्यासह अनेक मूलभूत सुविधांची कमतरता आहे. तालुक्यातल्या बहुतेक लोकांचा मुख्य व्यवसाय कोरडवाहू शेती असून आर्थिक परिस्थितीही बेतास बात आहे. त्यामुळे आजारपणात मोठ्या शहरात किंवा दुसरीकडे उपचारासाठी जाणे अनेक कुटुंबांना परवडणारे नाही.

आधी प्राथमिक आरोग्य केंद्रात औषधांचा साठा पुरेसा नसायचा आणि गरजेच्या सुविधाही नव्हत्या, त्यामुळे बऱ्याच रुग्णांना उपचारासाठी दुसरीकडे रेफर करावे लागत होते. यामुळे रुग्ण आणि त्यांच्या नातेवाईकांना पैशाचा आणि मानसिक त्रास सोसावा लागायचा. पण ग्रामीण रुग्णालय सुरू झाल्यापासून चित्र बदलताना दिसत आहे. आता रुग्णालयात गरजेच्या औषधांचा पुरेसा साठा आहे, शिवाय सर्पदंशावरची लस आणि रॅबीजची लसही उपलब्ध आहे. त्यामुळे बहुतेक रुग्णांवर जिवतीतच उपचार करणे शक्य होत आहे. फक्त गंभीर स्थितीतल्या रुग्णांनाच पुढच्या उपचारासाठी तज्ज्ञ डॉक्टरांकडे पाठवले जाते, असे वैद्यकीय अधिकाऱ्यांनी सांगितले.

सध्या परिसरात मलेरिया आणि टायफॉईडसारखे संसर्गजन्य आजार वाढले असून ताप, थकवा आणि इतर लक्षणे घेऊन येणाऱ्या रुग्णांची संख्या रुग्णालयात मोठी आहे. वाढत्या रुग्णसंख्येमुळे चारही डॉक्टर रात्रंदिवस सेवा देत असून रुग्णांना वेळेत उपचार मिळावेत यासाठी झटत आहेत. त्यांच्या तत्परतेमुळे अनेक रुग्ण बरे होत असल्याचे दिसते.

याआधी डॉ. विशाल पवार यांनीही जिवतीत चांगली सेवा दिली होती. आता तीन नव्या एमबीबीएस डॉक्टरांसह चार वैद्यकीय अधिकारी काम करत असल्याने जिवती आणि परिसरातील लोकांना मोठा दिलासा मिळाला आहे. रुग्णालयातल्या या सेवेला लोक 'नवसंजीवनी' म्हणत आहेत.

जिवती आणि आसपासचे शेकडो रुग्ण रोज उपचारासाठी रुग्णालयात येतात. गरजेनुसार सलाइन, इंजेक्शन किंवा औषधे दिली जातात. काही ग्रामीण रुग्ण स्वतःहून सलाइन किंवा इंजेक्शन मागतात, पण प्रत्येक आजारासाठी सलाइन किंवा इंजेक्शनची गरज नसते, हे डॉक्टर रुग्णांना समजावून सांगत असून त्यांचा गैरसमज दूर करण्याचा प्रयत्न करत आहेत.

दुर्गम भागात सेवा देणाऱ्या या तरुण डॉक्टरांना लोकांनी सहकार्य करावे, असे आवाहन केले जात आहे. त्याचबरोबर आरोग्य विभागाने जिवती ग्रामीण रुग्णालयाकडे विशेष लक्ष देऊन गरजेची वैद्यकीय यंत्रसामग्री, औषधे, तपासणी सुविधा आणि इतर मूलभूत गोष्टी पुरवल्या तर या डॉक्टरांना अजून सक्षमपणे काम करता येईल. त्यामुळे जिवती आणि परिसरातील ग्रामीण जनतेला अधिक प्रभावी, वेळेवर आणि विश्वासार्ह आरोग्यसेवा गावातच मिळण्यास मदत होईल.