धनत्रयोदशीला जयपूरमध्ये एका दिवसात 600 हून अधिक विडा स्कूटरची डिलिव्हरी, आशिया बुक ऑफ रेकॉर्ड्समध्ये नोंद

दिवाळी आणि धनत्रयोदशीच्या मुहूर्तावर देशातल्या वाहन बाजारात उत्साहाचे वातावरण दिसले. याच मुहूर्तावर हिरो मोटोकॉर्पचा इलेक्ट्रिक मोबिलिटी ब्रँड विडा (VIDA) याने ऐतिहासिक कामगिरी करत नवा विक्रम केला आहे. कंपनीने धनत्रयोदशीच्या एकाच दिवसात आणि एकाच शहरात 600 हून अधिक इलेक्ट्रिक स्कूटर ग्राहकांच्या हाती दिल्या. त्यामुळे 'आशिया बुक ऑफ रेकॉर्ड्स'मध्ये विडाचे नाव नोंदवले गेले आहे.

इलेक्ट्रिक टू-व्हीलर सेगमेंटमध्ये विडा ब्रँड वेगाने आपले पाय रोवत आहे. हा विक्रम राजस्थानची राजधानी जयपूर येथे झाला. जयपूरमधील अधिकृत विडा एक्सपिरियन्स सेंटरवरून त्या एका दिवशी विक्रमी संख्येने विडा व्हीएक्स 2 (VIDA VX 2) स्कूटरची डिलिव्हरी देण्यात आली. कंपनीच्या या कामगिरीमुळे भारतीय इलेक्ट्रिक वाहन बाजारात विडाचा दबदबा आणखी वाढल्याचे दिसत आहे.

फक्त धनत्रयोदशीलाच नाही, तर संपूर्ण ऑक्टोबर महिना विडासाठी अत्यंत यशस्वी ठरला. ऑक्टोबर 2026 मध्ये विडाने 29,958 इलेक्ट्रिक वाहनांची विक्री केली. मागच्या वर्षीच्या तुलनेत कंपनीच्या विक्रीत 81.6 टक्क्यांची वाढ नोंदवली गेली आहे. या कामगिरीच्या जोरावर विडा आता भारतातली चौथी सर्वात मोठी इलेक्ट्रिक टू-व्हीलर कंपनी बनली आहे. बाजारातला कंपनीचा हिस्सा 11.1 टक्क्यांवरून 13.6 टक्क्यांवर पोहोचला आहे.

विडा व्हीएक्स 2 या लोकप्रिय स्कूटरमध्ये ग्राहकांसाठी अनेक अॅडव्हान्स फीचर्स आणि मजबूत परफॉर्मन्स दिला आहे. व्हीएक्स 2 प्लसचा टॉप स्पीड ताशी 90 किलोमीटर आहे. यात काढता येण्याजोगी (रिमूव्हेबल) बॅटरी मिळते, त्यामुळे चार्जिंग करणे सोयीचे ठरते. शिवाय प्रवाशांच्या सोयीसाठी वेगवेगळे रायडिंग मोड्सही आहेत.

टेक्नोलॉजीबद्दल सांगायचे तर स्कूटरला 4.3 इंचाचा टीएफटी डिस्प्ले आहे. त्यात स्मार्टफोन कनेक्टिव्हिटी, टर्न-बाय-टर्न नॅव्हिगेशन आणि ओव्हर-द-एअर (OTA) अपडेट्स अशा सुविधा मिळतात. सामानासाठी सीटखाली 33.2 लिटरची स्टोरेज स्पेस दिली आहे. सेफ्टीसाठी डिस्क आणि ड्रम ब्रेक यांचा समन्वय साधला आहे.

व्हीएक्स 2 प्लस दोन बॅटरी पर्यायांत उपलब्ध आहे. 3.4 kWh बॅटरीची स्कूटर एकदा फुल चार्ज केल्यावर 146 किलोमीटरची रेंज देते. 4.4 kWh बॅटरीचा पर्याय निवडला तर रेंज 187 किलोमीटर आहे.

कंपनीच्या दाव्यानुसार रोज 15 किलोमीटरचा प्रवास गृहीत धरला आणि विजेचा दर 10 रुपये प्रति युनिट मानला, तर या स्कूटरचा वार्षिक चालवण्याचा खर्च केवळ 1564 रुपये येतो. त्यामुळे ही स्कूटर ग्राहकांसाठी किफायतशीर ठरत असल्याचे सांगितले जाते.