स्मार्टवॉच नव्हे, थेट मेंदूवर लक्ष ठेवणारं गॅजेट, दीपिंदर गोयल यांचं Temple भारतात

फूड डिलिव्हरी कंपनी Zomato चे फाऊंडर दीपिंदर गोयल गेल्या अनेक दिवसांपासून सतत चर्चेत आहेत. त्याचं कारण म्हणजे त्यांनी भारतात Temple नावाचं एक खास डिव्हाईस लाँच केलं आहे. माणसाचं आरोग्य आणि मेंदूशी संबंधित हालचाली ट्रॅक करण्यासाठी हे गॅझेट तयार करण्यात आलं आहे. भारतात या गॅझेटसाठी प्री ऑर्डर आता सुरू झाली आहे. हे डिव्हाईस घ्यायचा विचार असेल, तर ते नेमकं कसं काम करतं, त्याची फीचर्स काय आहेत आणि किंमत किती आहे, हे आधी जाणून घेणं गरजेचं आहे.

Temple हे साधं स्मार्टवॉच किंवा फिटनेस बँड नाही. मेंदूतील रक्तप्रवाह आणि त्याच्याशी संबंधित सिग्नल टिपण्यासाठी ते डिझाईन केलं आहे. हे डिव्हाईस डोक्याच्या एका बाजूला लावायचं असतं, म्हणजे कपाळावर किंवा कानाच्या मध्यभागी. त्यात ऑप्टिकल सेन्सर बसवले आहेत. मेंदूत होणाऱ्या रक्तप्रवाहातील बदल हे सेन्सर ट्रॅक करतात. कंपनीने या तंत्रज्ञानाला BrainFlow हे नाव दिलं आहे.

दीपिंदर गोयल यांनी सादर केलेल्या या नव्या डिव्हाईसमध्ये एन्ट्रॉपी स्कोअर नावाचं एक फीचरही मिळणार आहे. यात 1 ते 250 या दरम्यान गुण दिले जातील. या गुणांवरून वापरकर्त्यांना आपल्या शरीरावरचा ताण समजू शकेल. झोप, व्यायाम, ताण आणि कॅफीन अशा वेगवेगळ्या गोष्टींचा परिणामही यात धरला जाऊ शकतो.

Temple डोक्यावर लावण्यासाठी कुठल्याही स्ट्रॅपची गरज नाही. ग्रिप्स नावाच्या एका खास चिकट टेपच्या मदतीने ते लावलं जातं. कंपनीने सांगितलं आहे की, धावताना, पोहताना आणि अंघोळ करतानाही हे डिव्हाईस लावून ठेवता येईल.

आता किमतीबद्दल. भारतात Temple ची किंमत 85,000 रुपये ठेवली आहे. यात लाइफटाइम सब्सक्रिप्शनचा पर्यायही आहे. भारतात या डिव्हाईसची प्री ऑर्डर सुरू झाली आहे. वापरकर्ते 'टेंपल' ॲपवर जाऊन किंवा temple.com या अधिकृत वेबसाइटवरून गॅझेट बुक करू शकतात. कंपनीने सांगितलं आहे की, प्रत्येक डिव्हाईस ऑर्डर मिळाल्यानंतरच तयार केलं जाणार आहे. त्यामुळे बुकिंगनंतर डिलिव्हरीला तीन महिन्यांचा वेळ लागू शकतो. डिव्हाईस शिप होण्याआधी वापरकर्ते रिफंडसाठी विनंतीही करू शकतात.

ट्रू गोल्ड, रोझ गोल्ड, ब्लॅक मिरर, रिअल जेड, डीप ब्लू आणि पर्पल फंक अशा सहा रंगांत हे डिव्हाईस खरेदीसाठी उपलब्ध आहे.

एक गोष्ट लक्षात ठेवायला हवी. Temple हे वैद्यकीय निदानाचं साधन नाही किंवा आजार शोधण्यासाठी वापरायचं डिव्हाईसही नाही. आरोग्य (वेलनेस) आणि संशोधन या उद्देशांसाठी ते डिझाईन केलं आहे. म्हणजेच हे स्मार्टवॉचपेक्षा वेगळ्या प्रकारचं उपकरण आहे. त्यामुळे ते घेण्याआधी त्याची वैशिष्ट्यं आणि वापराचा उद्देश नीट समजून घेणं गरजेचं आहे.