भलं मोठं संकट! एशियन गेम्सला चक्रीवादळाचा रेड अलर्ट; इतक्या वेगाने जपानवर धडकणार

जपानमध्ये सध्या एशियन गेम्स २०२६ ची स्पर्धा सुरू आहे, पण या स्पर्धेवर आता नैसर्गिक संकटाचे सावट पसरले आहे. जपानमध्ये अत्यंत शक्तिशाली अशा 'दुजुआन' नावाच्या चक्रीवादळाचा इशारा देण्यात आला आहे. जपानच्या हवामान विभागाने दिलेल्या माहितीनुसार हे चक्रीवादळ किनारपट्टीच्या दिशेने अत्यंत वेगाने पुढे सरकत आहे. यामुळे मुसळधार पाऊस, वादळी वारे, पूरस्थिती आणि डोंगराळ भागात भूस्खलन होण्याचा मोठा धोका निर्माण झाला आहे. टोकियो आणि नागोया या शहरांमध्ये रेड अलर्ट जारी करण्यात आला आहे, त्यामुळे या भागातील नागरिकांमध्ये चिंतेचे वातावरण पसरले आहे.

मिळालेल्या माहितीनुसार, स्थानिक वेळेनुसार सकाळी १० वाजता 'दुजुआन' चक्रीवादळ टोकियोजवळील इझू द्वीपसमूहातील हाचिजो बेटापासून अवघ्या १०० किलोमीटर नैऋत्य-पश्चिमेकडे केंद्रित झाल्याचे दिसून आले. हे वादळ ताशी २५ किलोमीटर वेगाने उत्तरेकडे पुढे सरकत आहे. या वेगामुळे पुढील काही तासांत हे वादळ जपानच्या किनारपट्टीच्या अधिक जवळ पोहोचण्याची शक्यता वर्तवली जात आहे.

वादळाचा वाढता धोका लक्षात घेऊन हवामान खात्याने आणि स्थानिक प्रशासनाने किनारपट्टीवरील भागातील नागरिकांना सतर्क राहण्याचा इशारा दिला आहे. पुराचा धोका आणि भूस्खलनाच्या शक्यतेमुळे लोकांना सुरक्षेच्या कारणासाठी तातडीने सुरक्षित ठिकाणी जाण्याचे आवाहन करण्यात आले आहे. तसेच या वादळामुळे सागरी वाहतूक आणि विमानसेवेवरही मोठा परिणाम होण्याची शक्यता वर्तवली जात आहे, त्यामुळे प्रवाशांना आणि स्थानिक यंत्रणांना सावधगिरी बाळगण्यास सांगण्यात आले आहे.

हवामान खात्याने दिलेल्या माहितीनुसार, जपानच्या सागरी हद्दीत आणि आसपासच्या भागात यंदा तयार झालेले हे २५ वे चक्रीवादळ आहे. या वादळाची तीव्रता जास्त असल्याने टोकियोसह पूर्व किनारपट्टीवरील अनेक प्रांतांना हाय अलर्टवर ठेवण्यात आले आहे. हे चक्रीवादळ सोमवारी संध्याकाळपासून ते उशिरा रात्रीदरम्यान टोकियोच्या पूर्वेला असलेल्या चिबा प्रीफेक्चरमधील बोसो प्रायद्वीपाच्या अगदी जवळून जाण्याची दाट शक्यता वर्तवण्यात आली आहे. त्यामुळे या भागातील नागरिकांना पुढील काही तास अत्यंत महत्त्वाचे मानले जात आहेत.

दरम्यान, जपानमध्ये सुरू असलेल्या एशियन गेम्स २०२६ मध्ये भारताने जोरदार सुरुवात केली आहे. अनेक क्रीडा प्रकारांत भारतीय संघाने चांगले विजय मिळवले आहेत. भारतीय संघाने टेबल टेनिस स्पर्धेत पाकिस्तानचा ३-० असा पराभव केला, त्यामुळे भारतीय चाहत्यांमध्ये विशेष आनंदाचे वातावरण आहे. यासोबतच कबड्डीतही भारताने जपानवर ४९-२३ अशा फरकाने दणदणीत विजय मिळवला आहे. चक्रीवादळाच्या इशाऱ्यामुळे या स्पर्धांवर काय परिणाम होतो याकडे आता सगळ्यांचे लक्ष लागले आहे.