जळगावात विसर्जन मिरवणुकीत डीजेला बंदी, पोलिसांचा गणेश मंडळांना इशारा

जळगावमध्ये गणेश विसर्जन मिरवणुकीआधी पोलिसांनी सार्वजनिक गणेश मंडळांना स्पष्ट शब्दात इशारा दिला आहे. मिरवणुकीत डीजे लावण्यास सक्त मनाई असून, जे मंडळ याकडे दुर्लक्ष करून डीजे लावतील त्यांच्यावर मिरवणुकीदरम्यान लगेच कारवाई केली जाणार नाही, मात्र नंतर नियमानुसार त्यांच्यावर कारवाई होणार असल्याचे पोलिसांनी सांगितले.

ही माहिती सार्वजनिक गणेश मंडळांच्या बैठकीत देण्यात आली. जळगाव महापालिकेच्या दुसऱ्या मजल्यावरील सभागृहात शहरातील सार्वजनिक गणेश मंडळांची ही बैठक आयोजित करण्यात आली होती. बैठकीच्या व्यासपीठावर जिल्हा पोलीस उपअधीक्षक नितीन गणापुरे, अपर पोलीस अधीक्षक संदीप गावित, महापालिका आयुक्त आदित्य जीवने, पोलीस निरीक्षक विशाल जैस्वाल, सागर शिंपी, उपायुक्त निर्मला गायकवाड आणि महापालिका आरोग्य विभागाचे सहायक उपायुक्त समीर बोरोले उपस्थित होते. यासोबतच सार्वजनिक गणेश मंडळाचे अध्यक्ष मुकुंद मेटकर आणि माजी अध्यक्ष सचिन नारळे हेही बैठकीला हजर होते.

विसर्जन मिरवणुकीत महापालिकेचा मानाचा गणपती सर्वात आधी असेल, असे बैठकीत ठरवण्यात आले. त्यानंतर मिरवणुकीत सहभागी होणाऱ्या पहिल्या दहा मंडळांना विसर्जनाचा क्रमांक दिला जाणार नाही, त्यांना थेट प्रवेश देण्यात येईल. तसेच मिरवणुकीत मंडळांना जास्त वाहने घेऊन जाण्यास परवानगी नसेल, केवळ दोनच वाहनांना परवानगी दिली जाणार असल्याचे पोलिसांनी कळवले. यापेक्षा जास्त वाहने मंडळांना बरोबर ठेवता येणार नाहीत. या बैठकीत मंडळाच्या पदाधिकाऱ्यांनीही आपापल्या सूचना मांडल्या आणि बैठक एकंदरीत शांततेत पार पडली.

मात्र बैठक संपल्यानंतर कार्यकर्ते बाहेर पडत असताना महापालिकेच्या प्रवेशद्वाराजवळ सार्वजनिक मंडळाचे माजी पदाधिकारी आणि मंडळाचे कार्यकर्ते यांच्यात शाब्दिक बाचाबाची झाली. यावेळी दोन्ही बाजूचे लोक एकमेकांच्या अंगावर धावून जाण्याचाही प्रकार घडला, त्यामुळे तिथे गोंधळाचे वातावरण तयार झाले. अखेर पोलिसांनी मध्यस्थी करून हा वाद मिटवला.

विसर्जन मिरवणुकीत सहभागी होणाऱ्या मंडळांना रात्री बारा वाजल्यापासून आपला क्रमांक निश्चित करायचा आहे. त्यासाठी मंडळांनी रात्रीच आपले वाहन रांगेत उभे करायचे आहे, त्यानुसारच त्यांना क्रमांक दिला जाईल. मंडळांनी मिरवणुकीसाठी दिलेल्या वेळेतच आपली मिरवणूक काढणे बंधनकारक असून, उशीर केल्यास त्यांचा ठरलेला क्रमांक काढून घेऊन त्यांना शेवटच्या क्रमांकावर टाकले जाईल, असेही स्पष्ट करण्यात आले.

मिरवणुकीच्या मार्गावर विविध संस्थांतर्फे मंडळांचे स्वागत केले जाते, मात्र काही संस्था आपले स्वागत व्यासपीठ पुढच्या बाजूला उभारतात, ज्यामुळे मिरवणुकीला अडथळा निर्माण होतो. त्यामुळे अशी स्वागत व्यासपीठे मागील बाजूला हलवावीत, अशी सूचना बैठकीत देण्यात आली.