दहा हजारांची लाच घेताना जळगावचा जिल्हा परिषद अधिकारी पकडला, झडतीत ५ कोटी १६ लाखांची मालमत्ता आढळली

जळगाव जिल्हा परिषदेच्या बांधकाम विभागातील एका उपविभागीय अधिकाऱ्याला १० हजार रुपयांची लाच घेताना रंगेहात पकडण्यात आले आहे. लाचलुचपत प्रतिबंधक विभागाने म्हणजेच एसीबीने ही कारवाई केली. लाच घेताना पकडल्यानंतर या अधिकाऱ्याच्या घराची आणि बँक लॉकरची झडती घेण्यात आली. त्या झडतीत तब्बल ५ कोटी १६ लाख ८८ हजार ३८९ रुपयांची मालमत्ता आढळून आली.

मोठे पद, चांगला पगार आणि मानाची नोकरी असतानाही काही लोकांची पैशांची हाव सुटत नाही, हेच या घटनेतून पुन्हा समोर आले आहे. अवघ्या दहा हजारांच्या लाचेसाठी या अधिकाऱ्याने आपली प्रतिष्ठा गमावली आहे. ही घटना जळगावमधून समोर आली असून ती धक्कादायक मानली जात आहे.

सतीश मन्सुलाल शिसोदे असे या अधिकाऱ्याचे नाव आहे. ते जळगाव जिल्हा परिषदेच्या बांधकाम विभागात उपविभागीय अधिकारी आहेत. रस्त्याच्या एका कामाचे बिल १० लाख रुपयांचे होते. त्या बिलासाठी शिसोदे यांनी १० हजार रुपयांची लाच मागितली होती.

यानंतर एसीबीने सापळा रचला. या सापळ्यात शिसोदे यांना १० हजार रुपयांची लाच स्वीकारताना रंगेहात पकडून बेड्या ठोकण्यात आल्या. एवढ्यावरच न थांबता, या कारवाईनंतर एसीबीच्या पथकाने त्यांच्या घराची आणि बँकेच्या लॉकरची कसून झडती घेतली.

या झडतीत एसीबीला एकूण ५ कोटी १६ लाख ८८ हजार ३८९ रुपयांची मालमत्ता आढळून आली. त्यात आदर्शनगरमधील दोन आलिशान घरांचा समावेश आहे. याशिवाय ७ लाख ९७ हजार रुपयांची रोकड जप्त करण्यात आली आहे.

बँक लॉकरमध्ये ३ कोटी ७४ लाख रुपयांचे सोन्या-चांदीचे दागिने सापडले. या दागिन्यांमध्ये २ हजार ५२४ ग्रॅम सोने, ११ हजार ६३३ ग्रॅम चांदी आणि १०१ ग्रॅम प्लॅटिनमचा समावेश आहे.

इतक्या मोठ्या प्रमाणावर बेहिशोबी संपत्ती कशी जमवली, याबाबत आता एसीबीकडून सखोल पडताळणी केली जात आहे.