लॉरेन्स बिश्नोईच्या नावाने आलेली धमकीची पत्रे स्थानिकाचा खोडसाळपणा, गँगचा संबंध नाही: नागपूर पोलीस

लॉरेन्स बिश्नोईच्या नावाने नागपूरच्या सराफा व्यापाऱ्यांना धमकीची पत्रे पाठवण्यात आली होती. हा प्रकार नागपुरातीलच कोणाचा तरी खोडसाळपणा असावा, या निष्कर्षावर पोलीस पोहोचले आहेत. पत्रांमध्ये वापरलेली भाषा आणि तपासात समोर आलेली माहिती यांच्या आधारे हा एखाद्या स्थानिक गुन्हेगाराचा खोडसाळपणा असल्याचे पोलिसांनी ठरवले आहे.

या प्रकरणामागे लॉरेन्स बिश्नोई गँगचा संबंध नाही, असे पोलिसांचे म्हणणे आहे. पत्राची शैली, त्यातला मजकूर आणि हस्ताक्षर पाहून पोलिसांनी हे मत बनवले आहे. पत्र पाठवणाऱ्या अज्ञात आरोपीचा शोध पोलीस सध्या घेत आहेत, म्हणजेच पत्र पाठवणारा नेमका कोण आहे, हे अजून समोर आलेले नाही.

याआधी 15 सप्टेंबर रोजी त्याच भागातून एका ऑटो चालकाला मिठाईचा डबा आणि शंभर रुपये देऊन एका सराफा व्यापाऱ्याकडे पत्र पाठवण्यात आले होते. त्या वेळी राणाप्रताप नगर पोलीस स्टेशनच्या हद्दीत एका व्यापाऱ्याला धमकीचे पत्र मिळाले होते. दोन्ही घटनांमधील सारखेपणा, पत्रांची भाषा आणि वापरलेले हस्ताक्षर पाहता दोन्ही पत्रे एकाच व्यक्तीने लिहिली असावीत आणि तो स्थानिक पातळीवरचा एखादा छोटा गुन्हेगार असावा, असा पोलिसांचा निष्कर्ष आहे. 15 सप्टेंबरच्या पत्रामागेही तोच आरोपी असावा, असा पोलिसांचा सध्या तरी अंदाज आहे.

त्रिमूर्ती नगर पोस्ट ऑफिसमधून 21 ऑक्टोबर रोजी एका मोठ्या लिफाफ्यात आठ छोटे लिफाफे घालून पाठवण्यात आले. हे सर्व आठ सराफा व्यापाऱ्यांचे पत्र एकाच सराफा व्यापाऱ्याकडे पाठवले होते. त्या पत्रात धमकी देऊन खंडणीची मागणी करण्यात आली होती. सोबतच महाभारत आणि रामायणातील काही दाखलेही त्यात नमूद होते.

नागपूरच्या इतवारी भागातील 8 सराफा व्यापाऱ्यांना लॉरेन्स बिश्नोईच्या नावाने मिळालेली धमकीची पत्रे नागपूरच्या खामला भागातून पोस्टाने पाठवल्याचे पोलीस तपासात उघड झाले आहे. त्यानंतर 31 ऑक्टोबर रोजी पोस्टाद्वारे आलेल्या पत्रात या सराफा व्यापाऱ्यांनी प्रत्येकी 10 लाख रुपये पाठवावेत, अन्यथा टायगर श्रॉप सारखा जीवानिशी हल्ला केला जाईल, अशी धमकी देण्यात आली होती.

या प्रकरणी आता तहसील पोलीस स्टेशनमध्ये गुन्हा दाखल करण्यात आला आहे. आरोपीला लवकरच अटक केली जाईल, असे आश्वासन पोलिसांनी सराफा व्यापाऱ्यांना दिले आहे.

दरम्यान, धमकीच्या पार्श्वभूमीवर नागपूरच्या सराफा मार्केटमध्ये पोलिसांचा बंदोबस्त वाढवण्यात आला आहे. पोलिसांसोबत नुकत्याच झालेल्या बैठकीत सराफा व्यापाऱ्यांनी सुरक्षा वाढवण्याची मागणी केली होती. त्यानंतर खबरदारी म्हणून इतवारी भागातील सराफा मार्केटमध्ये बंदोबस्त वाढवण्यात आला आहे.