इंस्टाग्रामवरचे फोटो, व्हिडिओ फोनमध्ये सेव्ह करायचेत? या सोप्या स्टेप्स फॉलो करा

इंस्टाग्राम हे सध्या सगळ्यात जास्त वापरलं जाणारं सोशल मीडिया प्लॅटफॉर्म आहे आणि याचे करोडो यूजर्स आहेत. सुरुवातीला हे ॲप फक्त फोटो पोस्ट करण्यासाठीच लाँच झालं होतं, पण नंतर यात व्हिडीओ आणि रिल्स शेअर करण्याची सुविधाही जोडली गेली. कंपनीनं वेळोवेळी नवनवीन फीचर्स आणले, त्यामुळे कमी वेळातच हे ॲप लोकांच्या पसंतीस उतरलं. आता तर इंस्टाग्रामवर असे बरेच फीचर्स आहेत, जे यूजर्सची अनेक कामं सोपी करतात. त्यापैकीच एक उपयोगी फीचर म्हणजे पोस्ट केलेले फोटो-व्हिडीओ थेट फोनमध्ये डाऊनलोड करण्याची सुविधा.

बऱ्याचदा असं होतं की इंस्टाग्रामवर फोटो किंवा व्हिडीओ पोस्ट केल्यावर आपण फोनचं स्टोरेज मोकळं करण्यासाठी तो फोटो किंवा व्हिडीओ फोनमधून डिलीट करतो. पण नंतर कधीतरी तोच फोटो किंवा व्हिडीओ परत हवा असतो, तेव्हा तो कसा मिळवायचा असा प्रश्न पडतो. अशा वेळी इंस्टाग्रामच मदतीला येतं. या ॲपमध्ये पोस्ट केलेले फोटो-व्हिडीओच नाही, तर स्टोरीजही फोनच्या कॅमेरा रोलमध्ये सहज सेव्ह करता येतात. त्यासाठी काही सोप्या स्टेप्स फॉलो कराव्या लागतात.

पोस्ट केलेला फोटो किंवा व्हिडीओ डाऊनलोड करायचा असेल तर आधी फोनमध्ये इंस्टाग्राम ओपन करा. स्क्रीनच्या खालच्या बाजूला उजव्या कोपऱ्यात असलेल्या प्रोफाईल फोटोवर क्लिक करा. त्यानंतर जो फोटो किंवा व्हिडीओ फोनमध्ये सेव्ह करायचा आहे तो निवडा आणि त्या पोस्टच्या शेअर बटनवर क्लिक करा. तिथं डाऊनलोड हा पर्याय दिसेल, त्यावर टॅप केलं की तो फोटो किंवा व्हिडीओ तुमच्या फोनमध्ये सेव्ह होईल.

याशिवाय फोटो किंवा व्हिडीओ पोस्ट करतानाच तो ऑटोमॅटिकली डाऊनलोड होण्याचा पर्यायही निवडता येतो. त्यासाठी प्रोफाईल पेजवर वरच्या बाजूला उजव्या कोपऱ्यातल्या मोअर ऑप्शन्स मेन्यूवर टॅप करा. खाली स्क्रोल करून यूवर ॲप अँड मीडिया या सेक्शनवर क्लिक करा, तिथं आर्काइव्ह अँड डाऊनलोड बटनवर टॅप करा आणि सेव्हिंग टू कॅमेरा रोल हा ऑप्शन ऑन करा.

स्टोरीतला फोटो किंवा व्हिडीओ डाऊनलोड करायचा असेल तर पद्धत थोडी वेगळी आहे. फोनमध्ये इंस्टाग्राम ओपन करून प्रोफाईल फोटोवर क्लिक करा. त्यानंतर जी स्टोरी डाऊनलोड करायची आहे तीच ओपन करा. स्क्रीनच्या तळाशी डाव्या कोपऱ्यात दिसणाऱ्या तीन डॉट्सवर टॅप करून मोअर हा मेनू उघडा आणि थेट सेव्ह बटनावर क्लिक करा. एवढं केलं की ती स्टोरी फोनमध्ये सेव्ह होते.